ដោយ គង់ សូរិយា
ភ្នំពេញ៖ ការចុះហត្ថលេខាដើម្បីការពារអ្នកវិនិយោគ ជារឿងចាំបាច់មួយ ដើម្បីផ្តល់ទំនុកចិត្ត ទាក់ទាញអ្នកវិនិយោគអន្តរជាតិ មកធ្វើការវិនិយោគនៅកម្ពុជា។
អគ្គលេខាធិការរងនៃក្រុមប្រឹក្សាភិបាលវឌ្ឍន៍កម្ពុជា លោកជា វុទ្ឋីបានថ្លែងឲ្យដឹងកាលពីចុងសប្តាហ៍មុនថា រហូតមកទល់ពេលនេះ កម្ពុជាបានចុះហត្ថលេខាជាមួយប្រទេសជាង៣០ហើយ ដើម្បីផ្តល់ភាពកក់ក្តៅ និងទាក់ទាញអ្នកវិនិយោគអន្តរជាតិ ឬពីបណ្តាប្រទេសទាំងនោះមកវិនិយោគនៅកម្ពុជា ហើយក្នុងចំណោមបណ្តាប្រទេសទាំងនោះ មានតែប្រទេសជប៉ុនទេ ដែលប្រមុខរដ្ឋាភិបាលកម្ពុជា សម្តេចតេជោហ៊ុន សែន និងលោកស៊ីនហ្សូ អាបេនាយករដ្ឋមន្រ្តីជប៉ុនបានចុះហត្ថលេខារួមគ្នា។
លោកបន្តថា “បន្ទាប់ពីមានការចុះហត្ថលេខា រវាងប្រមុខរដ្ឋាភិបាលនៃប្រទេសទាំងពីរ អ្នកវិនិយោគជប៉ុនកាន់តែច្រើនបានមកវិនិយោគនៅកម្ពុជា”។លោកបន្តថា “យើងចង់បានអ្នកវិនិយោគជប៉ុនកាន់តែច្រើនថែមទៀត មកវិនិយោគនៅកម្ពុជា ដើម្បីរួមចំណែកអភិវឌ្ឍន៍កម្ពុជា ហើយអ្នកវិនិយោគជប៉ុនមិនមែនមកតែជាមួយទុនវិនិយោគទេ តែពួកគេយកបេះដូងមកជាមួយផងដែរ”។
លោកជា វុទ្ឋីបានបន្តថា សម្តេចតេជោបានធ្វើការងារដោយគ្មានការនឿយហត់នោះទេ ក្នុងការធ្វើយ៉ាងណាទាក់ទាញអ្នកវិនិយោគអន្តរជាតិមកវិនិយោគនៅកម្ពុជា ខណៈដែលកម្ពុជាមានច្បាប់វិនិយោគទូលំទូលាយមែនទែន ដើម្បីលើកទឹកចិត្តទាំងអ្នកវិនិយោគក្នុងស្រុក និងអន្តរជាតិ។
កម្ពុជាបច្ចុប្បន្នបានស្ថិតក្នុងគោលដៅរបស់អ្នកវិនិយោគអន្តរជាតិ ដោយសារតែកត្តាសុខសន្តិភាព ស្ថិរភាពនយោបាយ និងកំនើនសេដ្ឋកិច្ចដ៏រ៉ឹងមាំរបស់ប្រទេសនេះ ព្រោះរយៈពេលជាងពីរទសវត្សរ៍ចុងក្រោយនេះសេដ្ឋកិច្ចកម្ពុជារក្សាបានកំនើនជាមធ្យមជាង៧ភាគរយ។ ច្បាប់វិនិយោគកម្ពុជា ក៏ជាផ្នែកមួយទាក់ទា ញការវិនិយោគផងដែរ ដោយអ្នកវិនិយោគអន្តរជាតិអាចបោះទុន១០០ភាគរយនៅប្រទេសនេះ៕