ដោយដួង ចន្រ្ទា
ភ្នំពេញ ធនាគារអភិវឌ្ឍន៍អាស៊ី (ADB)បានព្យាករណ៍ពីសេដ្ឋកិច្ចកម្ពុជា នឹងសម្រេចបានកំនើន៧ភាគរយ ដោយសារកំណើនសេដ្ឋកិច្ចដ៏រឹងមាំរបស់កម្ពុជា បានមកពីការនាំចេញដ៏រឹងមាំ និងកំណើនលំហូរចូលនៃការវិនិយោគដោយផ្ទាល់ពីបរទេស សកម្មភាពក្នុងវិស័យទេសចរណ៍ និងតម្រូវការក្នុងស្រុក ព្រមទាំងភាពរឹងមាំនៃកំណើនសេដ្ឋកិច្ចសកលលោក។
លោក Jan Hansen សេដ្ឋវិទូជាន់ខ្ពស់របស់ធនាគារអភិវឌ្ឍន៍អាស៊ីប្រចាំប្រទេសកម្ពុជាមានប្រសាសន៍ក្នុងពេលចេញផ្សាយ របាយការណ៍ស្ដីពីទស្សនៈវិស័យអភិវឌ្ឍន៍អាស៊ី ដែលជារបាយការណ៍សេដ្ឋកិច្ចប្រចាំឆ្នាំរបស់ធនាគារអភិវឌ្ឍន៍អាស៊ី ដែលចេញផ្សាយនៅថ្ងៃទី១១ មេសានេះថា“ទោះជាយ៉ាងណាក៏ដោយ ការកើនឡើងប្រាក់ឈ្នួល ភាពលំបាកក្នុងការធ្វើធុរកិច្ច និងភាពប្រកួតប្រជែងកាន់តែខ្លាំងអាចប៉ះពាល់ដល់ការប្រកួតប្រជែងរបស់កម្ពុជា”។លោកបន្តថា “គោលនយោបាយសម្រួលដំណើរការ និងនីតិវិធីដែលចាំបាច់សម្រាប់ធ្វើធុរកិច្ច នឹងជួយលើកកម្ពស់សហគ្រិនភាព ធ្វើឱ្យសមាហរណកម្មក្រុមហ៊ុនក្នុងស្រុក ជាមួយនឹងវិស័យកម្មន្តសាល កាន់តែមានលក្ខណៈស៊ីជម្រៅបន្ថែមទៀត ព្រមទាំងជួយបង្កើតការងារល្អៗបន្ថែមទៀត”។
របាយការណ៍បានឱ្យដឹងថា ទិន្នផលឧស្សាហកម្មរបស់កម្ពុជាទំនងជានឹងបន្តកើនឡើង៩,៦% នៅឆ្នាំនេះ ជាមួយនឹងការថមថយកំណើននៃឧស្សាហកម្មកាត់ដេរ និងស្បែកជើង ដែលអាចកាត់កងដោយកំណើនខ្ពស់ជាងមុនក្នុងឧស្សាហកម្ម ដែលទើបនឹងលេចចេញជារូបរាង ដូចជា ឧស្សាហកម្មផលិតគ្រឿងអគ្គិសនី គ្រឿងបន្លាស់រថយន្ត កង់ អង្ករ និងកៅស៊ូ ជាដើម។ កំណើនក្នុងវិស័យសេវាកម្ម និងបន្តមានភាពល្អប្រសើរ ពោលគឺ៧.១%នៅឆ្នាំនេះ ដោយសារភ្ញៀវទេសចរណ៍មានចំនួនច្រើន។ សន្មតថា អាកាសធាតុមានស្ថានភាពអំណោយផល កសិកម្មរបស់ប្រទេសកម្ពុជានឹងមានកំណើន១,៨% ក្នុងឆ្នាំ ២០១៨។
គោលនយោបាយសារពើពន្ធ នឹងមានលក្ខណៈពង្រីកបន្ថែមនៅឆ្នាំនេះ ជាងកាលពីឆ្នាំ២០១៧ ដោយកំណើនប្រាក់ចំណូល នឹងត្រូវស្រូបយកដោយចំណាយខ្ពស់ជាងមុន និងដោយឱនភាពសារពើពន្ធ ដែលអាចកើនឡើងទៅដល់៥,១% នៃផលិតផលក្នុងស្រុកសរុប។ ឱនភាពគណនីចរន្ត (ដោយមិនរាប់បញ្ចូលការផ្ទេរធនធានជាផ្លូវការ) នឹងមានការកើនឡើងនៅឆ្នាំនេះ ដោយសារចំណាយសម្រាប់ប្រេង និងផលិតផលនាំចូលដទៃទៀត មានការកើនឡើងក្នុងប្រទេស ដែលមានសេដ្ឋកិច្ចរីកចម្រើនលឿនមួយនេះ។
របាយការណ៍ដដែលបានបន្តថា កំណើនលំហូរចូលនៃការវិនិយោគផ្ទាល់ពីបរទេស និងឥណទានផ្លូវការពីក្រៅប្រទេស ទំនងនឹងអាចរ៉ាប់រងឱនភាពគណនីចរន្តបាន ព្រមទាំងអាចបង្កើនទុនបម្រុងក្រៅប្រទេសរហូត ដល់ប្រមាណ១០ពាន់លានដុល្លារត្រឹមចុងឆ្នាំ២០១៨ ពោលគឺអាចរ៉ាប់រងការនាំចូលប្រមាណ ៦,១ខែ។
ទស្សនៈវិស័យសេដ្ឋកិច្ចនេះ អាចប្រឈមនឹងហានិភ័យនៅផ្នែកខាងក្រោម ដោយសារភាពងាយរងគ្រោះនៃវិស័យហិរញ្ញវត្ថុរបស់ប្រទេសកម្ពុជា ចំពោះភាពមិនប្រាកដប្រជា នៃវិស័យហិរញ្ញវត្ថុសកលលោក ដែលគេអាចសង្កេតឃើញកន្លងមក ដូចជា ការបង្កើនផលធៀបឥណទានធនាគារ ជាមួយនឹងផលិតផលក្នុងស្រុកសរុបទ្វេដងនៅក្នុងរយៈពេល៥ឆ្នាំចុងក្រោយនេះ រហូតដល់៧៦%កាលពីឆ្នាំមុននេះ។ ខណៈពេលដែលបទប្បញ្ញត្តិគ្រប់គ្រងហានិភ័យឥណទាន និងការបង្កើនទុនបម្រុង ដែលត្រូវបានដាក់ឱ្យអនុវត្តកាលពីពេលថ្មីៗនេះ បានជួយកាត់បន្ថយកំណើនឥណទានរបស់ធនាគារ មកនៅត្រឹម ១៥%គិតត្រឹមចុងឆ្នាំមុននេះ ឥណទានសម្រាប់វិស័យអចលទ្រព្យ មានការកើនឡើងរឹតតែឆាប់រហ័សទៅទៀត៕