ដោយ : ដួង ចន្រ្ទា
ភ្នំពេញ : រដ្ឋាភិបាលតាមរយៈក្រសួងទេសចរណ៍ និងរដ្ឋបាលខេត្តព្រះសីហនុគ្រោង នឹងរៀបចំគម្រោងអភិវឌ្ឍន៍តំបន់ទេសចរណ៍នាគរាជ នៅខេត្តព្រះសីហនុ ដើម្បីបង្កើនការទាក់ទាញភ្ញៀវទេសចរពីជុំវិញពិភពលោកចូលមកកំសាន្ត និងស្នាក់នៅកាន់តែយូរនៅកម្ពុជា។
ទីតាំងដែលរដ្ឋាភិបាលគ្រោងបង្កើត ជាតំបន់អភិវឌ្ឍន៍ទេសចរណ៍នាគរាជនេះមានទំហំ២២១១ហិកតា មានទីតាំងនៅភូមិសាស្ត្របឹងកង្កែប និងតំបន់ពយម៉ាចូវ(ក្នុងភូមិគគីរឃុំបិតត្រាំង)នៃស្រុកព្រៃនប់ ខេត្តព្រះសីហនុ។
មន្រ្តីជាន់ខ្ពស់ក្រសួងទេសចរណ៍បានមានប្រសាសន៍ឲ្យដឹង ក្នុងកិច្ចប្រជុំកាលពីពេលថ្មីនេះថា គោលដៅសំខាន់នៃការបង្កើតតំបន់ទេសចរណ៍នាគរាជនេះ ធ្វើឡើងដើម្បីបង្កើនឱ្យមានការទាក់ទាញភ្ញៀវទេសចរអន្តរជាតិនានា មកពីជុំវិញពិភពលោក ចូលមកកំសាន្តនៅកម្ពុជាជាពិសេសខេត្តព្រះសីហនុ និងស្នាក់នៅកាន់តែយូរនៅកម្ពុជា។
លោក ថោង ខុន រដ្ឋមន្រ្តីក្រសួងទេសចរណ៍បានអះអាងថា “ខេត្តព្រះសីហនុ អនាគតនឹងមានភ្ញៀវមកច្រើន និងមានការអភិវឌ្ឍលឿនជាងគេ ដោយហេតុថាខេត្តព្រះសីហនុ មានសក្តានុពលខ្លាំងលើវិស័យទេសចរណ៍ ឧស្សាហកម្ម ពាណិជ្ជកម្ម និងសេវាកម្មផ្សេងៗទៀត”។ លោកបន្តថា “សម្រាប់ដំណាក់កាលនេះ ក្រុមការងារពិសេសេថ្នាក់ក្រសួង និងថ្នាក់ខេត្តព្រះសីហនុ នឹងចុះកំណត់ទីតាំងជាក់ស្តែងនៃទីតាំង គ្រោងអភិវឌ្ឍជាតំបន់ទេសចរណ៍នាគរាជ ការរស់នៅ កាន់កាប់ដីធ្លីក្នុងតំបន់នោះរបស់ប្រជាជន និងសិក្សាផលប៉ះពាល់បរិស្ថាន និងសង្គម ដើម្បីរកដំណោះស្រាយជូនពួកគាត់ ឱ្យទទួលបានផលប្រយោជន៍ដោយសមធម៌។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា កម្ពុជាគួរតែមានការវិនិយោគលើរមណីយដ្ឋានកែច្នៃបន្ថែមទៀត ក្រៅពីប្រាសាទអង្គរវត្តដែលជាសម្បត្តិបេតិកភ័ណ្ឌពិភពលោក ព្រោះការមានគោលដៅទេសចរណ៍ច្រើន និងមានរមណីយដ្ឋានទេសចរណ៍ច្រើននឹងទាក់ទាញភ្ញៀវឲ្យស្នាក់នៅបានយូរ និងចំណាយប្រាក់ច្រើននៅទីនេះ។
លោកបន្តថា “ហេតុនេះអ្នកវិនិយោគក្នុងស្រុក គួរវិនិយោគលើរមណីយដ្ឋានកែច្នៃឲ្យបានច្រើន ដើម្បីធ្វើពិពិធកម្មផលិតផលទេសចរណ៍កម្ពុជាឲ្យកាន់តែសម្បូរបែប និងទាក់ទាញភ្ញៀវទេសចរណ៍ឲ្យបានកាន់តែច្រើន”៕