ដោយ គង់ សូរិយា
ភ្នំពេញ៖ កម្មវិធីសិក្សាថ្មីមួយ FasTracKids ដែលមានមូលដ្ឋាននៅសហរដ្ឋអាមេរិក ត្រូវបានផ្សព្វផ្សាយនៅកម្ពុជា ដែលកម្មវិធីនេះផ្តោតលើការជំរុញទេពកោលសល្យកុមារ ដើម្បីឲ្យពួកគេអាចបង្កើនសក្តានុពលសម្រាប់ជីវិតរបស់ពួកគេ។
លោក Johnson Lim ដៃគូកម្មវិធី Fastrackids ប្រចាំកម្ពុជា បានលើកឡើងក្នុងសន្និសីទសារព៌តមាននាព្រឹកថ្ងៃទី១៣ កក្កដានេះថា កម្មវិធីនេះត្រូវបានយកមកផ្សព្វផ្សាយនាពេលនេះ ដើម្បីផ្តល់ព៌តមានជូនសាលាណា ដែលមានចំណាប់អារម្មណ៍ទិញកម្មវិធីនេះមកប្រើប្រាស់នៅតាមសាលារបស់ពួកគេ។ លោកបន្តថា កម្មវិធីសិក្សានេះ ត្រូវបានប្រទេសក្នុងតំបន់ដូចជា ប្រទេសថៃ ជប៉ុន កូរ៉េនិងប្រទេសប្រមាណ៤០ទៀត បានទិញយកទៅប្រើប្រាស់ក្នុងកម្មវិធីសិក្សារបស់ពួកគេរួចហើយ។
លោកបន្តថា “កម្មវិធីនេះ ផ្តោតសំខាន់លើការជំរុញភាពក្លាហានរបស់កុមារ និងជំរុញកុមារឲ្យរកឃើញ សក្តានុពលនៃទេពកោសល្យរបស់ខ្លួន ដើម្បីធ្វើឲ្យគុណភាពជីវិតពួកគេប្រសើរឡើង”។លោកបន្តថា “កម្មវិធីអប់រំដ៏មានសារៈសំខាន់នេះ ផ្តោតលើកុមារដែលមានអាយុចាប់ពី៦ខែ ដល់៨ឆ្នាំប៉ុណ្ណោះ”។
លោកស្រី Nancy Faunce នាយកប្រតិបត្តិនៃកម្មវិធី Fastrackids មកពីសហរដ្ឋអាមេរិកបានថ្លែងថា ដោយសារកម្មវិធីនេះ ត្រូវបានអនុវត្តន៍យ៉ាងទូលំទូលាយលើពិភពលោ ក និងទទួលបានការកោតសរសើរ ទើបយើងចង់យកកម្មវិធីនេះមកផ្សព្វផ្សាយនៅកម្ពុជាដើម្បីជំរុញកម្មវិធីសិក្សានៅទីនេះ និងជំរុញសក្តានុពលកុមារឲ្យរកឃើញទេពកោសល្យរបស់ពួកគេ ដើម្បីពង្រឹងគុណភាព និងបែបផែនជីវិតរបស់ពួកគេប្រសើរឡើង។លោកស្រីបន្តថា នៅប្រទេសខ្លះឪពុកម្តាយបានឲ្យកុមារធ្វើតាមខ្លួន និងមិនធ្វើតាមឧបនិស្ស័យរបស់ពួកគេ ដែលការអប់រំបែបនេះ មិនបានជួយកុមារឲ្យរកឃើញសក្តានុពលជីវិតរបស់ពួកគេនោះទេ។
លោកស្រីបន្តថា “កុមារចូលចិត្តនិយាយ និងបង្ហាញទេពកោសល្យរបស់ពួកគេជាធម្មជាតិ ហេតុនេះការអប់រំកុមារឲ្យមានការអប់រំប្រកបដោយគុណភាព និងត្រឹមត្រូវមួយ ពិតជាមានសារៈសំខាន់ណាស់”៕
