ភ្នំពេញ៖ ក្រសួងសាធារណការ និងដឹកជញ្ជូន បានចេញសេចក្ដីជូនដំណឹងថា រថភ្លើងដឹកអ្នកដំណើរ ភ្នំពេញ-ព្រលានយន្តហោះអន្តរជាតិភ្នំពេញ នឹងដាក់ឲ្យប្រើប្រាស់ជាបណ្តោះអាសន្ន ថ្ងៃអង្គារ ទី១០ ខែមេសា ឆ្នាំ២០១៨។
ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តី ក្រសួងសាធារណការ និងដឹកជញ្ជូន នឹងអញ្ជើញជាអធិបតីភាព នៅក្នុងពិធីបើកឲ្យប្រើប្រាស់ជាបណ្តោះអាសន្នគម្រោងរថភ្លើងដឹកអ្នកដំណើរ ភ្នំពេញ-ព្រលានយន្តហោះអន្តរជាតិភ្នំពេញ ដែលនិងប្រព្រឹត្តិទៅនៅ ថ្ងៃអង្គារ ទី១០ ខែមេសា ឆ្នាំ២០១៨ វេលាម៉ោង ០៦:៣០ នាទីព្រឹក នៅស្ថានីយរថភ្លើងភ្នំពេញ។
សម្រាប់ការដាក់ឲ្យប្រើប្រាស់ជាបណ្តោះអាសន្ននេះ ប្រជាពលរដ្ឋអាចធ្វើដំណើរតាមរថភ្លើងដោយឥតគិតថ្លៃ ចាប់ពីថ្ងៃទី១០ ខែមេសា រហូតដល់ថ្ងៃទី៣១ ខែកក្កដា ឆ្នាំ២០១៨។
រថភ្លើងដឹកអ្នកដំណើរនេះ ចំណាយពេលប្រមាណ ៣០ នាទីក្នុងការដឹកជញ្ជូនអ្នកដំណើរពីស្ថានីយរថភ្លើងភ្នំពេញទៅព្រលានយន្តហោះ និង អាចផ្ទុកអ្នកដំណើររួមទាំងអ្នកអង្គុយនិងអ្នកឈរ ប្រមាណ ១០០នាក់ ផងដែរ។
ក្រសួងសាធារណការ និងដឹកជញ្ជូន សូមគោរពអញ្ជើញអ្នកសារព័ត៌មានទាំងអស់ចូលរួមយកព័ត៌មាន និងចុះទៅផ្តិតយកទិដ្ឋភាព នៃពិធីបើកឲ្យប្រើប្រាស់ជាបណ្តោះអាសន្នគម្រោងរថភ្លើងនេះដោយផ្ទាល់៕
