សារវិជ្ជមាន៖ ប្រមុខរដ្ឋាភិបាលតម្លៃអចលនទ្រព្យមិនធ្លាក់ចុះទេនៅមុនការបោះឆ្នោត

2

ដោយគង់ សូរិយា

ភ្នំពេញ៖ ជាសារដ៏កម្រមួយពីប្រមុខរដ្ឋាភិបាលកម្ពុជា ដែលបានលើកឡើងពីវិស័យអចលនទ្រព្យ ដោយសម្តេចតេជោហ៊ុន សែននាយករដ្ឋមន្រ្តីកម្ពុជាបានអះអាងថា តម្លៃអចលនទ្រព្យមិនមានការធ្លាក់ចុះទេ នៅមុនការបោះឆ្នោតជ្រើសតាំងតំណាងរាស្រ្តអាណត្តិទី៦ នាខែកក្កដា ខាងមុខនេះ។

សម្តេចតេជោហ៊ុន សែនបានមានប្រសាសន៍ក្នុងពេលចូលរួមពិធីសំណេះសំណាល និងប្រារពខួបអនុស្សាវរីយ៍លើកទី១៣២ ទិវាពលកម្មអន្តរជាតិ១ ឧសភា កាលពីម្សិលម៉ិញនេះថា តម្លៃអចលនទ្រព្យនៅមុនការបោះឆ្នោតមិនធ្លាក់ថ្លៃទេ បើប្រៀបធៀបទៅនឹងការបោះឆ្នោតអាណត្តិមុនៗ ដែលតម្លៃអចលនទ្រព្យមានការធ្លាក់ចុះ។

សម្តេចបានវាយតម្លៃអំពីស្ថានការណ៍នៅកម្ពុជាបច្ចុប្បន្ន អំពីស្ថានភាពអចលនទ្រព្យ បើយោងតាមអ្វីដែលកើតមានពីមុន ជាពិសេសមុនការបោះឆ្នោតម្តងៗផ្នែកអចលនទ្រព្យទាំងដីធ្លី និងផ្ទះសម្បែងគឺមិនឡើងថ្លៃនោះទេ ហាក់រង់ចាំសភាពការណ៍បោះឆ្នោតចេញលទ្ឋផលសិន។

សម្តេចតេជោហ៊ុន សែនបានបន្តថា “ បន្ទាប់មកនៅក្រោយការបោះឆ្នោតរួច ដោយដឹងថាគណបក្សប្រជាជនឈ្នះឆ្នោត ទើបដីធ្លីបានចាប់ផ្តើមឡើងថ្លៃ”។

អគ្គនាយិកាក្រុមហ៊ុន AMATAX Property Service អ្នកស្រីតាំង ហួរបានយល់ស្របនឹងការលើកឡើងរបស់សម្តេចដោយបានថ្លែងថា មិនត្រឹមតែមិនធ្លាក់ចុះថ្លៃនោះទេ ផ្ទុយទៅវិញសកម្មភាពទិញលក់អចលនទ្រព្យបានកើនឡើងផងដែរ ធៀបនឹងការបោះឆ្នោតអាណត្តិមុនៗ ពិសេសនៅខេត្តព្រះសីហនុ តម្លៃអចលនទ្រព្យ និងការទិញលក់បានកើនឡើងយ៉ាងខ្លាំង។

អ្នកស្រីបានបន្តថា “ប្រជាជនលែងខ្វល់ពីរឿងនយោបាយហើយ ពួកគេគិតពីការវិនិយោគរបស់ពួកគេដើម្បីរកផលចំណេញ ព្រោះពួកគេដឹងថា កម្ពុជានៅតែរក្សាបានសន្តិភាព និងស្ថិរភាពនយោបាយ”៕

2 COMMENTS

LEAVE A REPLY

Please enter your comment!
Please enter your name here