ដោយ វុត្ថា
ភ្នំពេញ៖ យោងតាមការចុះផ្សាយពីកាសែត Myanmar Times បានអោយដឹងថាទីផ្សារអចលនទ្រព្យលំនៅដ្ឋានក្នុងទីក្រុង Mandalay ដែលជាទីក្រុងធំលំដាប់ទី២ និងក្នុងប្រ ទេសមីយ៉ាន់ម៉ា កំពុងជួបហានីភ័យគួរអោយកត់សម្គាល់ ក្នុងរយៈពេលប៉ុន្មានឆ្នាំចុងក្រោយនេះ ដោយទីផ្សារអចលនទ្រព្យលំនៅដ្ឋាន ក្នុងតំបន់មួយចំនួនក្នុងប្រទេសមីយ៉ាន់ម៉ាមានការធ្លាក់ចុះផងដែរនោះ។
លោក U Tin Maung ប្រធានសមាគមន៍អភិវឌ្ឍន៍ភ្នាក់ងារអចលនទ្រព្យនៅតំបន់ Mandalay បានថ្លែងអោយដឹងកាលពីពេលថ្មីៗនេះថា ចុះតម្លៃអលនទ្រព្យបានធ្លាក់ចុះយ៉ាងខ្លាំងរហូតដល់១ភាគ៣ នៅក្នុងតំបន់មួយចំនួនក្នុងប្រទេសមីយ៉ាន់ម៉ា ដែលធ្វើឲ្យទីផ្សារនេះមិនមានភាពប្រាកដប្រជា។
លោកបន្តថា គិតពី៥ឆ្នាំមុនរហូតដល់បច្ចុប្បន្ននេះ តម្លៃទីផ្សារអចលនទ្រព្យលំនៅដ្ឋានក្នុងទីក្រុង Mandalay បានធ្លាក់ចុះ១០ ទៅ៣០ភាគរយ ។ ការធ្លាក់ចុះនេះ ដោយសារតែមានប្រជាជននៅមានចំនួនតិច បានធ្វើអោយតម្រូវការលំនៅដ្ឋាននៅមានកម្រិត ព្រមទាំងមានការកំណត់តម្លៃមិនច្បាស់លាស់ និងពន្ធលើអចលនទ្រព្យមានតម្លៃខ្ពស់ពេក។
តម្លៃលំនៅដ្ឋានក្នុងប្រទេសមីយ៉ាន់ម៉ា ជាមធ្យមមានតម្លៃ២០,៧០០ដុល្លារ និងត្រូវបង់ពន្ធបន្ថែម១៥ភាគរយ ហើយលក្ខខណ្ឌទីផ្សារនាពេលថ្មីៗ បានឈានទៅដល់ការលិចលង់ ហើយឈានទៅរកចំណុចរបត់ថ្មីមួយ។
លោក U Tin MMaung បញ្ជាក់ទៀតថា បច្ចុប្បន្នប្រជាជនមិនបានទិញអចលនទ្រព្យសម្រាប់វិនិយោគនោះទេ តែពួកគេទិញលំនៅដ្ឋានសម្រាប់រស់នៅ។ តែយ៉ាងណាក៏យដោយ លោកមានសុទិដ្ឋិនិយមថា តម្លៃទីផ្សារអចនលទ្រព្យលំនៅដ្ឋាន នឹងវិលមករកភាពដើមវិញនាពេលឆាប់ៗខាងមុខនេះ៕
