វិភាគ​៖ តើ​កម្ពុជា​ត្រូវ​អភិវឌ្ឍន៍​ និង​ប្រឈម​បញ្ហា​អ្វីខ្លះ​ដើម្បី​ទាញ​យក​ប្រយោជន៍​ពេញលេញ​ពី​សេដ្ឋកិច្ច​ឌីជីថល​?

0

ដោយ​នៅ​ ស៊ី​វុត្ថា​

ភ្នំ​ពេញៈ​ បើ​ទោះបី​កម្ពុជា​កំពុង​ស្ថិត​ នៅក្នុង​ដំណាក់កាល​ជា​ប្រទេស​កំពុង​អភិវឌ្ឍ​ក៏ដោយ​ ប៉ុន្តែ​កម្ពុជា​ជា​ប្រទេស​មួយ​ ដែល​មាន​សក្ដានុពល​ខ្ពស់​ប្រកបដោយ​និរន្ត​ភាព​ក្នុង​ការ​ក្ដាប់​យក​នូវ​កាលានុវត្ត​ភាព​ពី​បដិវត្តន៍​ឧស្សាហកម្ម​ទី៤​ ដែល​ពឹងផ្អែក​លើ​បច្ចេកវិទ្យា​ ប៉ុន្តែ​ត្រូវការ​ពេល​ប្រមាណ៥ទៅ១០ឆ្នាំ​ ឬច្រើនជាង​នេះ​ ដើម្បី​តម្រង់​ទិស​ទៅជា​សេដ្ឋកិច្ច​ឌីជីថល​ពេញលេញ​មួយ​។

ឧបនាយក​រដ្ឋមន្ត្រី​ រដ្ឋមន្ត្រី​ក្រសួងសេដ្ឋកិច្ច​ និង​ហិរញ្ញវត្ថុ​ លោក​ អូន​ ព័ន្ធ​មុនី​រ័ត្ន​ធ្លាប់​បាន​ថ្លែង​ឲ្យដឹង​កន្លងមក​ថា​ ដើម្បី​ផ្លាស់ប្ដូរ​សេដ្ឋកិច្ច​បែប​បច្ចេកវិទ្យា​ឲ្យ​ទាន់ពេល​វេលា​ ត្រូវ​ផ្អែកលើ​កត្តា​ចំនួន៤​ ដូចជា​ទី១​ ភាព​អំណោយផល​ផ្នែក​ប្រជាសាស្ត្រ​ ដោយសារ​វត្តមាន​នៃ​ចំនួន​យុវជន​ដ៏​ច្រើន​ដែល​មានការ​អប់រំ​ខ្ពស់​ និង​ងាយ​ទទួលយក​នូវ​បច្ចេកវិទ្យា​ឌីជីថល​យ៉ាង​ឆាប់រហ័ស​ ទី២​ ការ​កើនឡើង​យ៉ាង​ឆាប់រហ័ស​នៃ​ការប្រើ​ប្រាស់​ទូរស័ព្ទ​ដៃ​ និង​ឧបករណ៍​ឆ្លាត​ (Smart​ Device​) ទី៣​ ការ​រីកចម្រើន​យ៉ាង​រហ័ស​លើ​ផ្នែក​បច្ចេកវិទ្យា​ តាមរយៈ​លំហូរ​វិនិយោគ​ផ្ទាល់​ពី​បរទេស​ និង​ទី៤​ ឥទ្ធិពល​ដ៏​លឿន​នៃ​ឌីជីថល​ភា​វូ​នី​យក​ម្ម​ដែល​កំពុង​មាននៅ​ក្នុង​គ្រប់​វ័យ​សំខាន់​នៃ​សេដ្ឋកិច្ច​ជាតិ​។

លោក​បាន​បន្ត​ថា​ “សេដ្ឋកិច្ច​ឌីជីថល​នៅ​កម្ពុជា​កំពុង​លេច​រូប​រាង​បណ្ដើរ​ៗ ដូចជា​ការប្រើ​ប្រាស់​ការ​ទូទាត់​សាច់ប្រាក់​តាម​ឌីជីថល​ ការកម្សាន្ត​តាម​អន​ឡាញ​ សកម្មភាព​ពាណិជ្ជកម្ម​អេ​ឡិច​ត្រូ​និច​ និង​ការ​បញ្ជាទិញ​តាម​អន​ឡាញ​ជាដើម​”។ លោក​បន្ត​ថា​ “ការ​ប្រែក្លាយ​ឆ្ពោះទៅ​រក​សេដ្ឋកិច្ច​ផ្នែក​ឌីជីថល​ ស្រប​ពេល​ការ​រីកចម្រើន​នៃ​បដិ​វឌ្ឍ​ឧស្សាហកម្ម​ទី៤​ (ឧស្សាហកម្ម​ ៤.០​) អាច​នឹង​ក្លាយជា​ក្បាលម៉ាស៊ីន​ថ្មី​មួយ​ សម្រាប់​ជំរុញ​កំណើន​សេដ្ឋកិច្ច​កម្ពុជា​ ដើម្បី​សម្រេច​បាន​ផែនការ​ប្រែក្លាយ​កម្ពុជា​ ជា​ប្រទេស​ប្រទេស​មាន​ប្រាក់​ចំ​ណូ​លម​ធម្យ​មក​ម្រិ​តខ្ពស់​នា​ពេល​ខាងមុខ​”។

តើ​អ្វី​ជា​សេដ្ឋ​កិ​ច្ច​ឌី​ជិ​ថល​?

លោក​ វង្សី​ វិស្សុត​ រដ្ឋលេខាធិការ​ នៃ​ក្រសួងសេដ្ឋកិច្ច​ និង​ហិរញ្ញវត្ថុ​ ធ្លាប់​បានឱ្យ​ដឹង​ថា​ សេដ្ឋកិច្ច​ឌីជីថល​ ជា​សេដ្ឋកិច្ច​មួយ​ដែល​ពឹងផ្អែក​ទៅលើ​បច្ចេកវិទ្យា​ឌីជីថល​ ដែល​បច្ចេកវិទ្យា​ឌីជីថល​នេះ​ នឹង​ជះឥទ្ធិពល​ដល់​ការផលិត​ទំនិញ​ និង​សេវា​ ការចែកចាយ​ និង​ការ​ផ្គត់ផ្គង់​ រួម​ទាំង​ការប្រើ​ប្រាស់​ប្រចាំថ្ងៃ​ផង​ដែរ​។ ការ​ចាប់​យក​បច្ចេកវិទ្យា​ឌីជីថល​នេះ​ នឹង​ក្លាយជា​កត្តា​គន្លឹះ​ និង​កត្តា​កំណត់​ចាញ់​ឈ្នះ​ នៅក្នុង​ការ​អភិវឌ្ឍ​សេដ្ឋកិច្ច​ ហើយ​ប្រទេស​ណា​ ដែល​មាន​សមត្ថភាព​ ចាប់​យក​បច្ចេកវិទ្យា​នេះ​បាន​ល្អ​ប្រសើរ​ជាងគេ​ ប្រទេស​នោះ​នឹង​ក្លាយជា​អ្នកឈ្នះ​នៅក្នុង​ល្បែង​នេះ​។

លោក​បន្ថែម​ថា​ “កម្ពុជា​យើង​ត្រូវ​រួមដៃគ្នា​ ទាំង​ជា​ស្ថាប័ន​ ទាំង​ធនធានមនុស្ស​ ដើម្បី​ពន្លឿន​ការ​អភិវឌ្ឍ​ឌីជីថល​នៅ​កម្ពុជា​ឱ្យ​អាច​រត់ទាន់​គេ​នៅក្នុង​តំបន់​”។

យន្តការ​របស់​រដ្ឋាភិបាល​ជួយ​លើ​សេដ្ឋកិច្ច​ឌីជីថល​

ទស្សនទាន​ បញ្ហា​ប្រឈម​ កាលានុវត្តន៍​ភាព​ យន្តការ​ និង​អាទិភាព​គោលនយោបាយ​ដែល​គួរ​ដាក់ចេញ​ សម្រាប់​ត្រៀមខ្លួន​អនុវត្ត​សេដ្ឋកិច្ច​ឌីជីថល​នៅ​កម្ពុជា​ នៅក្នុង​ក្របខ័ណ្ឌ​ នៃ​កិច្ច​ដំណើរការ​អភិវឌ្ឍន៍​សេដ្ឋកិច្ច​ ឆ្ពោះទៅ​រក​គោលដៅ​ជា​ប្រទេស​មាន​ចំណូល​មធ្យម​កម្រិតខ្ពស់​នៅ​ឆ្នាំ២០៣០​ និង​ក្លាយជា​ប្រទេស​មាន​ចំណូល​ខ្ពស់​នៅ​ឆ្នាំ២០៥០​។ កម្ពុជា​ត្រូវលើ​កកម្ពស់​សហគ្រិនភាព​ និង​នវានុវត្តន៍​ផង​ដែរ​ ដើម្បី​បង្កើន​តម្លៃ​ និង​ការងារ​នៅក្នុង​សេដ្ឋកិច្ច​កម្ពុជា​បន្ថែម​ទៀត​។

កន្លងមក​រាជរដ្ឋាភិបាល​កម្ពុជា​ បាន​ជួយ​ទ្រទ្រង់​ដល់​វិស័យ​នេះ​ជាបន្តបន្ទាប់​។ តែ​រាជរដ្ឋាភិបាល​ប្រកាន់យក​នូវ​គោលការណ៍​ទីផ្សារ​ ហើយនឹង​មិន​ធ្វើអន្តរាគមន៍​ណាមួយ​ ដែល​ធ្វើ​ឱ្យ​ខូច​ទៅដល់​គោលការណ៍​ទីផ្សារ​នោះ​ទេ​។ នៅក្នុង​រយៈពេល​ខ្លី​ និង​វែង​ទៅមុខ​ ក្រៅពី​ការបង្កើត​មូលនិធិ​គាំទ្រ​សហគ្រិនភាព​ និង​មជ្ឈមណ្ឌល​អភិវឌ្ឍន៍​សហគ្រិនភាព​ រាជរដ្ឋាភិបាល​នឹង​ដាក់ចេញ​នូវ​យន្តការ​គាំទ្រ​ជា​កញ្ចប់​ផ្សេងទៀត​ សម្រាប់​គាំទ្រ​ដល់​សហគ្រិនភាព​ ដូចជា​ ទី១​ ការបង្កើត​ធនាគារ​សហគ្រាស​ធុន​តូច​និង​មធ្យម​ (SME​ Bank​) ការបង្កើត​មូលនិធិ​អភិវឌ្ឍន៍​ជំនាញ​ ដែល​ឆ្លើយតបទៅនឹង​តម្រូវការ​រីកចម្រើន​របស់​ SME​ ការ​គិតគូរ​ទៅដល់​ការកាត់បន្ថយ​ថ្លៃដើម​ នៅក្នុង​ការ​ធ្វើ​ធុរកិច្ច​របស់​SME​ តាមរយៈ​ការកាត់បន្ថយ​ថ្លៃ​អគ្គិសនី​ និង​ដឹកជញ្ជូន​ រួម​ទាំង​ចំណាយ​លើ​បែបបទ​ច្បាប់ទម្លាប់​ និង​ពន្ធដារ​ ព្រមទាំង​ប្រព័ន្ធ​នៃ​ការ​ផ្លាស់​ប្តូរ​ រំលែក​ចំណេះដឹង​ ជំនាញ​ បច្ច​កវិទ្យា​ និង​បទពិសោធន៍​ផង​ដែរ​។

បញ្ហា​ប្រឈម​លើ​ការប្រើ​ប្រាស់​បច្ចេកវិទ្យា​

មូលដ្ឋាន​នេះ​ បាន​បង្កើត​ឱកាស​សម្រាប់​អាជីវ​កម្ម​ថ្មី​ៗ និង​ការ​ច្នៃប្រឌិត​មួយចំនួន​ រួម​ទាំង​សហគ្រិនភាព​ឱ្យ​មានការ​រីកចម្រើន​ជា​បណ្តើរ​ៗ ស្រប​នឹង​និន្នាការ​ប្រទេស​ក្នុង​តំបន់​។ ក៏ប៉ុន្តែ​សមត្ថភាព​ចាប់​យក​ និង​សកម្មភាព​នៃ​ការប្រើ​ប្រាស់​ បច្ចេកវិទ្យា​ឌីជីថល​នេះ​នៅ​មានកម្រិត​ទាប​នៅឡើយ​ មិនថា​នៅក្នុង​វិស័យ​សាធារណៈ​ ឬនៅ​ក្នុង​វិស័យ​ឯកជន​ទេ​។ ទន្ទឹម​នឹង​នេះ​ការ​ទទួលយក​បច្ចេកវិទ្យា​ទូរស័ព្ទចល័ត​ ជំនាន់​ក្រោយ​មាន​ភាពយឺត​យ៉ាវ​ ហើយ​ការ​ទទួលយក​សេវា​ 4G​ វិញ​ កាន់តែ​មាន​អត្រា​ទាប​ថែមទៀត​។

អា​ត្រា​នៃ​ការប្រើ​ប្រាស់​សេ​វា​អ៊ី​នធើ​ណែ​តអចល័ត​ ដែល​អាច​មាន​សមត្ថភាព​បញ្ជូន​ទិន្ន​ន័យ​ធំៗ​វិញ​ នៅ​មានកម្រិត​ទាប​នៅឡើយ​។ ម្យ៉ាងវិញទៀត​ ការ​វិនិយោគ​ដោយ​វិស័យ​ឯកជន​ ក្នុង​បច្ចេកវិទ្យា​ឌីជីថល​នេះ​ក៏​មានការ​យឺតយ៉ាវ​ផង​ដែរ​ ដែល​ឆ្លុះបញ្ចាំង​ពី​សម្ពាធ​នៃ​ការប្រកួត​ប្រជែង​ និង​បរិយាកាស​ វិនិយោគ​ស្រប​ពេល​ដែល​ការ​ទទួលយក​បច្ចេកវិទ្យា​ឌីជីថល​ ដោយ​មជ្ឈដ្ឋាន​ធនាគារ​ហាក់​មានកម្រិត​ទាប​នៅឡើយ​។

លើស​ពីនេះ​ទៀត​ ការយល់​ដឹង​អំពី​បច្ចេកវិទ្យា​ឌីជីថល​ នៅក្នុងចំណោម​ប្រជាជន​ ជាពិសេស​នៅ​ទី​ជនបទ​នៅ​មានកម្រិត​ទាប​នៅឡើយ​ ក្នុង​ខណៈ​ដែល​ការអប់រំ​ផ្នែក​នេះ​ នៅ​មាន​បរិមាណ​តិចតួច​នៅឡើយ​។ ក្នុង​ន័យ​នេះ​ការ​យកចិត្ត​ទុកដាក់​ គួរតែ​ផ្តល់​អាទិភាព​លើ​រៀបចំ​ និង​ការ​វិនិយោគ​បន្ថែម​លើ​ហេ​ដ្ឋា​រចនា​សម័ន្ធ​ឌីជីថល​ ព្រមទាំង​ការរៀបចំ​ និង​កែ​លំ​អរ​ក្របខ័ណ្ឌ​ច្បាប់​ចាំបាច់​នានា​ រួម​ទាំង​ការ​លើកទឹកចិត្ត​ផ្នែក​សារពើពន្ធ​ សម្រាប់​គាំទ្រ​ដល់​សេដ្ឋកិច្ច​ឌីជីថល​នៅ​កម្ពុជា​៕

LEAVE A REPLY

Please enter your comment!
Please enter your name here