ដោយ : ស៊ីវ ម៉េង
ភ្នំពេញ : ក្រុមហ៊ុនចិនធំៗបានចាប់អារម្មណ៍វិស័យសំណង់ និងអចលនទ្រព្យនៅកម្ពុជា ពិសេសគំរោងវិនិយោគសាងសង់រោងចក្រ ផ្គត់ផ្គង់សម្ភារៈសំណង់នៅកម្ពុជា ខណៈកម្ពុជានាំចូលសម្ភារៈសំណង់ភាគច្រើនពីបរទេស។
ប្រធានសមាគមអ្នកជំនាញអចលនទ្រព្យកម្ពុជាលោក ឃាង ពុទ្ឋី បានមានប្រសាសន៍ឲ្យដឹង បន្ទាប់ពីត្រលប់មកពីទស្សនកិច្ចប្រទេសចិន រយៈពេល៦ថ្ងៃនៅទីក្រុងសៀងហៃ, ឈីងតាវ និងទីក្រុងជេជាំង កាលពីសប្តាហ៍មុនថា ក្នុងដំណើរទស្សនកិច្ចនេះ លោកបានជួបជាមួយថ្នាក់ដឹកនាំក្រុមហ៊ុនចិនធំៗជាច្រើន រួមមាន Qingjian International Group , Weixing New Building Materials, Wold Steel Mall, Zhejiang Haitian Gasជាដើម។ លោកបន្តថា ថ្នាក់ដឹកនាំក្រុមហ៊ុនទាំងនេះ បានចាប់អារម្មណ៍វិនិយោគលើការបង្កើតផលិតផល សម្រាប់ផ្គត់ផ្គង់វិស័យសំណង់នៅកម្ពុជា។
លោកបន្តថា “អ្នកវិនិយោគចិនធំៗនៅតែចាប់អារម្មណ៍ និងមានសុទិដ្ឋិនិយមពីទីផ្សារអចលនវត្ថុកម្ពុជា ពិសេសគម្រោងវិនិយោគបង្កើតរោងចក្រ ដើម្បីផលិតសម្ភារៈសំណង់ ដើម្បីផ្គង់ផ្គង់ទីផ្សារសំណង់នៅកម្ពុជា ដែលមានការរីកចម្រើនយ៉ាងលឿននាពេលបច្ចុប្បន្ននេះ”។លោកបន្តថា “ក្រុមហ៊ុនទាំងនេះ នឹងមកវិនិយោគនៅកម្ពុជានាពេលអនាគត ហើយសមាគមអ្នកជំនាញអចលនទ្រព្យ នឹងដើរតួនាទីសំខាន់ក្នុងការជំរុញការអភិវ ឌ្ឍវិស័យអចលនទ្រព្យប្រកបដោយចីរភាព”។
ជាមួយគ្នានេះ សមាគមអ្នកជំនាញអចលនទ្រព្យកម្ពុជា នឹងឈានទៅចុះ MOU ជាមួយក្រុមហ៊ុន និងសមាគមអចលនទ្រព្យមួយចំនួននៅប្រទេសចិននាពេលខាងមុខផង
ដែរ។
វិស័យសំណង់ និងអចលនទ្រព្យកម្ពុជាមានការរីកចម្រើនយ៉ាងខ្លាំង ក្នុងរយៈពេលមួយទសវត្សរ៍ចុងក្រោយនេះ ហើយបច្ចុប្បន្នអ្នកវិនិយោគចិន បានឈរចំណាត់ថ្នាក់លេខ១ បន្ទាប់មកអ្នកវិនិយោគកូរ៉េ។ ទុនវិនិយោគក្នុងឆ្នាំ២០១៨មានទំហំទឹកប្រាក់៥២០០លានដុល្លារ ខណៈឆ្នាំ២០១៧ ទុនវិនិយោគមក្នុងវិស័យសំណង់ និងអចលនទ្រព្យមានទំហំទឹកប្រាក់រហូតដល់៦៤០០លានដុល្លារអាមេរិច៕
