ដោយ វុត្ថា
ភ្នំពេញ៖ ក្រុមហ៊ុន អង្គរ វ៉ាយដ៏ឡាយហ្វ៍ និង អីឃ្វារៀម បានបោះទុនបោះទុន ៧០លានដុល្លារអាមេរិក ដើម្បីអភិវឌ្ឍន៍គម្រោងលើការបង្កើតជលវប្បដ្ឋាន ត្រីទឹកសាប និង ទឹកប្រៃ ព្រមទាំងជម្រកអភិរក្សសត្វ នៅភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។
នៅក្នុងជំនួបបង្ហាញអំពីគម្រោងជាមួយ លោក ទៀ សីហា អភិបាលខេត្តសៀមរាបនៅថ្ងៃទី ១៨ ខែកុម្ភៈ ឆ្នាំ ២០១៩ កន្លងមកនេះ លោក Roger Reynolds ក្រុមប្រឹក្សាភិបាលក្រុមហ៊ុនអង្គរ វ៉ាយដ៏ឡាយហ្វ៍ និងអីឃ្វារៀមបានឲ្យដឹងថា គម្រោងនេះស្ថិតក្រោមកម្រងក្រុមហ៊ុនសហកម្មសិទ្ធិ ដោយមានភាគហ៊ុនវិនិយោគខ្មែរ អាមេរិក និងជប៉ុនរួមសហការគ្នា។
ការវិនិយោគនេះនឹងសាងសង់ ជលវប្បដ្ឋាន ត្រីទឹកសាប និងទឹកប្រៃ ព្រមទាំងជម្រកអភិរក្សសត្វព្រៃដ៏កម្រ ដែលនឹងជិតផុតអស់ពីភពផែនដី នៅលើផ្ទៃដីប្រមាណ ១០០ហិកតា ដោយប្រើប្រាស់ទុនសរុប៧០លានដុល្លាអាមេរិក។
លោកបន្តថា គម្រោងនេះត្រូវចែកចេញជាបីដំណាក់កាល ហើយក្នុងដំណាក់កាលទី១នេះប្រើប្រាស់ថវិកា២០លានដុល្លា ដែលនឹងគ្រោងបើកការដ្ឋានក្នុងខែមីនា ឆ្នាំ២០១៩ខាងមុខនេះ នឹងបើកឲ្យដំណើរការនៅចុងឆ្នាំ២០២០។ ក្នុងគម្រោងនៃដំណាក់ការទី១នេះ ក៏ជាការត្រៀមធ្វើការទាក់ទាញភ្ញៀវទេសចរណ៍ជាតិ អន្តរជាតិ បានបន្តស្នាក់នៅខេត្តសៀមរាប។
លោកបន្តទៀតថា បន្ទាប់ពីការអនុវត្តលើគម្រោង ទាំងមូលបានបញ្ចប់នោះ គម្រោងបន្តផែនការអភិវឌ្ឍន៍របស់ខ្លួន ដោយបានផ្តល់នូវការងារដល់ប្រជាពលរដ្ឋជាច្រើនទៀតផង ។ ម៉្យាងទៀតគម្រោងនេះ គឺមិនត្រឹមតែធ្វើការអភិវឌ្ឍន៍សេដ្ឋកិច្ចជាតិប៉ណ្ណោះទេ គឺផ្តល់នូវការអប់រំដល់ភ្ញៀវជាតិ អន្តរជាតិ និងប្រជាពលរដ្ឋអំពីបរិស្ថាន និង ការអភិរក្សប្រភពធនធានធម្មជាតិ តាមរយៈការបង្ហាញនូវរូបភាពឯកសារ អំពីប្រភេទមច្ឆាក្នុងទឹកដ៏កម្រ ដល់សិស្ស និសិ្សត និងប្រជាពលរដ្ឋ សំខាន់ភ្ញៀវទេសចរណ៍បរទេសបានទស្សនា សិក្សាស្វែងយល់ អំពីធនធានធម្មជាតិនៅកម្ពុជា ។
លោក ទៀ សីហា អភិបាលខេត្តសៀមរាបបានបញ្ជាក់ថា នេះជាសមិទ្ធិផលថ្មីមួយរបស់ខេត្តសៀមរាប ដែលបានទន្ទឹងជាយូមកហើយ ចំពោះការបង្កើតឲ្យមានមជ្ឈមណ្ឌល ជលវប្បដ្ឋាន ត្រីទឹកសាប និងទឹកប្រៃ និងជម្រកអភិរក្សាសត្វ ក្នុងការបម្រើនូវសេចក្តីតម្រូវ ការរបស់ភ្ញៀវទេសចរណ៍ជាតិ អន្តរជាតិ និងការបង្កើននូវការស្នាក់នៅក្រុងសៀមរាបបានយូរថ្ងៃផងដែរ។
អភិបាលខេត្តសៀមរាបរូបនេះ ក៏បានធ្វើការណែនាំមួយចំនួន ព្រមទាំងលើកនូវមតិល្អៗ ចំពោះក្រុមហ៊ុន គឺសូមឲ្យក្រុមហ៊ុនធ្វើកិច្ចសហការជាមួយបណ្តាមន្ទីរ អង្គភាព និង អាជ្ញាធរពាក់ព័ន្ធ។ អ្វីកាន់តែសំខាន់នោះ គឺសូមធ្វើការធ្វើពាក្យសុំច្បាប់សាងសង់ឲ្យបានត្រឹមត្រូវជាមុន ព្រមទាំងធ្វើការត្រួតពិនិត្យឡើងវិញនូវទីតាំងរបស់គម្រោង អំពីទីទួលបុរាណដ្ឋាន ដើមី្បជៀសវាងក្នុងពេលកំពុងដំណើរការសាងសង់ទៅ មានការរំខានធ្វើឲ្យមានការយឺតយ៉ាវដល់ការអនុវត្តគម្រោងនេះ៕
