ដោយនៅ វឌ្ឈនា
ភ្នំពេញ៖ ក្រុមហ៊ុនមកពីប្រទេសកូរ៉េ និងកម្ពុជាបានចុះហត្ថលេខាលើអនុស្សរណៈយោគយល់គ្នាស្តីពី ដៃគូវិនិយោគឯកជននិងសាធារណៈ រវាងទូរគមនាគមន៍កម្ពុជា ជាមួយក្រុមហ៊ុន Seatel ដើម្បីធ្វើឲ្យប្រសើរឡើងនូវប្រព័ន្ឋទូរគមនាគមន៍កម្ពុជា។
រដ្ឋមន្រ្តីក្រសូងប្រៃសណីយ៍ និងទូរគមនាគមន៍ លោកត្រាំ អ៊ីវតឹកបានមានប្រសាសន៍ក្នុងពេលអញ្ជើញជាអធិបតី ក្នុងពិធីចុះហត្ថលេខាលើអនុស្សរណៈយោគយល់គ្នាស្តីពីដៃគូវិនិយោគឯកជន និងសាធារណៈ រវាងទូរគមនាគមន៍កម្ពុជា ជាមួយក្រុមហ៊ុន Seatel នាល្ងាចថ្ងៃទី២១ កុម្ភៈកន្លងមកថា កិច្ចព្រមព្រៀងភាគីលើអនុស្សរណៈយោគយល់គ្នារបស់ដៃគូវិនិយោគឯកជន និងសាធារណៈ គឺជាការបោះជំហានមួយទៅមុខទៀតរបស់ក្រសួងក្នុងការជម្រុញអនុវត្តកម្មវិធី នយោបាយយុទ្ធសាស្ត្រចតុកោណ របស់រាជរដ្ឋាភិបាលអាណត្តិទី៦ ក្នុងការលើកកម្ពស់ និងអភិវឌ្ឍន៍វិស័យទូរគមនាគមន៍ឆ្ពោះទៅរករដ្ឋាភិបាលអេឡិកត្រូនិក និងសេដ្ឋកិច្ចឌីជីថល នាពេលអនាគត។
លោកបន្តថា “ការចុះកិច្ចព្រមព្រៀងនេះ នឹងបើកឱកាសឲ្យភាគីចូលរួមទាំងវិស័យឯកជន និងសាធារណៈ ពង្រីកសក្តានុពលភាពការវិនិយោគរបស់ខ្លួន ដែលអាចប្រើប្រាស់នូវហេដ្ឋារចនាសម្ព័ន្ធទូរគមនាគមន៍របស់ជាតិ និងឯកជនដោយប្រកបដោយសក្តានុពល និងមានប្រសិទ្ធភាព ពិសេសឈានទៅបង្កើតគម្រោងថ្មីៗជាច្រើនទៀត”។
លោករដ្ឋមន្ត្រី សង្ឃឹមថាទូរគមនាគមន៍កម្ពុជា និងក្រុមហ៊ុនSeatel បន្តសហការធ្វើការួមគ្នាបង្កើតជាផ្លែផ្កា បង្កើតជាគម្រោងលេចជារូបរាងពិតប្រាកដ និងទទួលបានជោគជ័យជាស្ថាពរ ហើយដើម្បីលើកកម្ពស់វិស័យបច្ចេកវិទ្យាគមនាគមន៍ និងព័ត៌មានឲ្យមានសន្ទុះខ្លាំងក្លា និងដើរទាន់ការរីកចម្រើននៃបច្ចេកវិទ្យារបស់បណ្តាប្រទេសក្នុងតំបន់៕
