ដោយគង់ សូរិយា
ភ្នំពេញ៖ សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានផ្ញើលិខិតជូនសម្តេច ហេង សំរិន ប្រធានរដ្ឋសភា ដើម្បីសុំឲ្យរៀបចំការបោះឆ្នោត ផ្តល់សេចក្តីទុកចិត្តលើការតែងតាំងនិងការកែសម្រួលសមាសភាពរដ្ឋាភិបាល។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបង្ហោះលិខិតនេះ លើគណនីហ្វេសប៊ុករបស់លោក នៅយប់ថ្ងៃទី២៧ ខែមីនា ឆ្នាំ២០២០បានឲ្យដឹងថា រដ្ឋមន្ត្រីថ្មី៤រូប ដែលត្រូវបានស្នើឲ្យតែងតាំង រួមមាន លោក កើត រិទ្ធ ជារដ្ឋមន្ត្រីក្រសួងយុត្តិធម៌ ជំនួសលោក អង្គ វង្សវឌ្ឍានា លោក ព្រុំ សុខា ជារដ្ឋមន្ត្រីក្រសួងមុខងារសាធារណៈ ជំនួសលោក ពេជ្រ ប៊ុនធិន លោក ជា វ៉ាន់ដេត ជារដ្ឋមន្ត្រីក្រសួងប្រៃសណីយ៍និងទូរគមនាគមន៍ ជំនួសលោក ត្រាំ អ៊ីវតឹក, និង លោក ឈិត សុខុន ជារដ្ឋមន្ត្រីក្រសួងធម្មការនិងសាសនា ជំនួសលោក ហ៊ឹម ឆែម។
ទន្ទឹមនឹងនេះ រដ្ឋមន្ត្រីទាំង៤រូប ដែលនឹងត្រូវប្តូរចេញ ត្រូវបានសម្តេចនាយករដ្ឋមន្ត្រី ស្នើឲ្យតែងតាំងជាទេសរដ្ឋមន្ត្រី ទទួលបន្ទុកបេសកកម្មពិសេសទាំងអស់គ្នា។
រីឯលោក ចម ប្រសិទ្ធ នៅតែមានឋានៈជាទេសរដ្ឋមន្ត្រី និងកាន់ដំណែងរដ្ឋមន្ត្រីដដែល ដោយសម្តេចនាយករដ្ឋមន្ត្រី ស្នើឲ្យតែងតាំងលោក ជាទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ដែលប្តូរឈ្មោះមកពីក្រសួងឧស្សាហកម្ម និងសិប្បកម្ម។
ក្នុងលិខិតចុះនៅថ្ងៃទី២៧ ខែមីនា ឆ្នាំ២០២០ សម្តេចនាយករដ្ឋមន្ត្រី ជម្រាបជូនសម្តេចប្រធានរដ្ឋសភាថា ការស្នើសុំតែងតាំង និងកែសម្រួលសមាសភាពរដ្ឋាភិបាលនាពេលនេះ យោងទៅតាមតម្រូវការចាំបាច់ ក្នុងការបង្កើនប្រសិទ្ធភាពការងាររបស់រដ្ឋាភិបាល។
កិច្ចប្រជុំរដ្ឋសភាជាតិ នៅថ្ងៃទី៣០ ខែមីនា ឆ្នាំ២០២០ខាងមុខ រដ្ឋសភានឹងបើកកិច្ចប្រជុំពេញអង្គវិសាមញ្ញ ដើម្បីបោះឆ្នោតផ្តល់សេចក្តីទុកចិត្ត លើការតែងតាំងនិងការកែសម្រួលសមាសភាពរដ្ឋាភិបាលនេះ៕
