ដោយៈ រ៉ាណេត
ពោធិ៍សាត់ៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចបង្កើត និងដាក់ឱ្យប្រើប្រាស់ជាផ្លូវការនូវនិមិត្តសញ្ញា «ខេត្តពោធិ៍សាត់» តាមប្រកាសលេខ៣៤៧១ប្រ.ក ចុះថ្ងៃទី១៤ ខែសីហា ឆ្នាំ២០២០ ។
យោងតាមសេចក្ដីប្រកាស និងជូនដំណឹងរបស់រដ្ឋបាលខេត្តពោធិ៍សាត់ នៅល្ងាចថ្ងៃទី២៨ ខែសីហា ឆ្នាំ២០២០ បានបញ្ជាក់ថា ក្រសួងមហាផ្ទៃ ក្រោមការសម្រេចរបស់សម្ដេចក្រឡាហោម ស ខេង បានកំណត់ និងដាក់ចេញឱ្យប្រើប្រាស់ជាផ្លូវការ នូវរូបនិមិត្តសញ្ញាខេត្តពោធិ៍សាត់ ដែលមានរូបភាពដូចបានបង្ហាញជូនខាងលើនេះ។
ចំពោះនិម្មិតសញ្ញានោះមានធាតុផ្សំ “ទឹក ដី មនុស្ស និងប្រវត្តិសាស្ត្រ” ដែលបង្ហាញពីប្រភពធនធានធម្មជាតិ ដ៏សម្បូរបែបក្នុងការអភិវឌ្ឍ ផ្តើមចេញពីភាពឧស្សាហ៍ព្យាយាមរបស់ប្រជាពលរដ្ឋ លើទឹកដីដ៏អំណោយផល ទើបអាចកំណត់បានជានិមិត្តសញ្ញា សម្គាល់ខេត្តដូចជា…
*ទី១៖ រូបមនុស្សជិះសេះស្ពាយដាវ តំណាងឱ្យវីរភាពដ៏អង់អាចក្លាហានរបស់ឧកញ៉ាពញាសួគ៌ា លោកតាឃ្លាំង មឿង រួមទាំងក្រុមគ្រួសាររបស់លោក ដែលសុខចិត្ត លះបង់ធ្វើពលីកម្មបូជានូវអាយុជីវិត ឥតស្តាយស្រណោះ ដើម្បីបុព្វហេតុជាតិមាតុភូមិ សាសនា ព្រះមហាក្សត្រ និងជាគំរូដ៏ល្អមួយសម្រាប់ដល់មនុស្សជំនាន់ក្រោយ ឱ្យខិតខំការពារកសាងជាតិមាតុភូមិឱ្យបានគង់វង្ស និងរុងរឿង។
*ទី២៖ រូបតំបន់ជួរភ្នំក្រវាញ (ផ្ទៃខាងក្រោយរូបសេះ) ភ្នំក្រវាញជាឈ្មោះភ្នំមួយនៅក្នុងខេត្តពោធិ៍សាត់ សម្បូរទៅដោយធនធានរ៉ែធម្មជាតិ អនុផលព្រៃឈើ រុក្ខជាតិជា ឱសថបុរាណ និងជាជម្រកនៃសត្វព្រៃគ្រប់ប្រភេទ។ ជួរភ្នំក្រវាញ ជាប្រភពនៃទឹកសម្រាប់ការ ងារកសិកម្ម សិប្បកម្ម ឧស្សាហកម្ម ព្រមទាំងជាប្រភពថាមពលវារីអគ្គិសនី និងជាតំបន់ទេសចរណ៍ធម្មជាតិដ៏សម្បូរបែបដ៏មានសក្ដានុពលនៃខេត្ត។
*ទី៣៖ រូបដីឬផែនថ្ម ដែលសេះឈរពីលើតំណាងឱ្យធនធានរ៉ែធម្មជាតិ ដ៏សម្បូរបែបរបស់ខេត្តដូចជា ប្រភពរ៉ែថ្មកែវ ដែលជាថ្មមានតែមួយគត់ នៅព្រះរាជាណាចក្រកម្ពុជា ជាថ្មដែលគេយកទៅច្នៃជាផលិតផលសិល្បៈសូនរូបផ្សេង។
*ទី៤៖ ដើមពោធិ៍ និងក្រូចពោធិ៍សាត់៖ ដើមពោធិ៍ គឺតំណាងឱ្យប្រវត្តិនៃឈ្មោះរបស់ខេត្តពោធិ៍សាត់ ដែលមកពីពាក្យដើមគឺ (ពោធិ៍-រសាត់) មានចំនួន១២សន្លឹក តំណាងឱ្យគុណអ្នកម្តាយ។ ក្រូចពោធិ៍សាត់តំណាងឱ្យផលានុផល ផ្លែឈើដែលត្រូវបានដាំ ក្នុងសម័យអាណានិគមនិយមបារាំង ក្នុងភូមិដប់បាត្រ ស្រុកបាកាន ខេត្តពោធិ៍សាត់ ដំបូងគេនៅកម្ពុជា ដោយស្ថានីយស្រាវជ្រាវដើមក្រូចមុនឆ្នាំ១៨៦៣ ហើយមានចំនួន២១ផ្លែ តំណាងឱ្យគុណលោកឪពុក។
*ទី៥៖ ផ្ទៃទឹក និងត្រី តំណាងឱ្យបឹងទន្លេសាប ដែលជាអាងស្តុកទឹកដ៏សំខាន់ និងជាដែនជម្រកមច្ឆាជាតិគ្រប់ប្រភេទ ដែនជម្រកជីវៈចម្រុះ និងសម្រាប់បម្រើ ឱ្យតម្រូវការ ជីវភាព រស់នៅរបស់ប្រជាពលរដ្ឋទូទាំងខេត្តពោធិ៍សាត់។
*ទី៦៖រូបគួរស្រូវក្រងជារង្វង់ស្នែងក្របី បង្ហាញអំពីភាពសម្បូរបែបនៃដំណាំស្រូវ ដែលលាតសន្ធឹងលើផ្ទៃដីកសិកម្មដ៏ធំទូលាយ ជាគ្រឹះរឹងមាំសម្រាប់ខឿនសេដ្ឋកិច្ចជាតិ។
*ទី៧៖ បូ (ពណ៌ក្រហម ខៀវ និងបៃតង) តំណាងឱ្យជាតិដែលប្រជាពលរដ្ឋទាំងមូលនៅក្នុងខេត្តពោធិ៍សាត់ នាំគ្នាស្តារ និងលើកស្ទួយក្នុងការអភិវឌ្ឍជាតិលើគ្រប់វិស័យ។
*ទី៨៖ អក្សរ «ខេត្តពោធិ៍សាត់» បញ្ជាក់ថាប្រជាជនខេត្តពោធិ៍សាត់ គោរពយ៉ាងខ្ជាប់ខ្ជួន និងបំពេញភារកិច្ចជូនជាតិមាតុភូមិ ក្រោមការដឹកនាំដ៏ត្រឹមត្រូវ របស់រាជរដ្ឋាភិបាល កម្ពុជា ដោយជ្រកក្រោមបាវចនា ជាតិ សាសនា ព្រះមហាក្សត្រ។
*ទី៩៖ ក្រវាញ គឺជារុក្ខជាតិផ្តល់នូវដើម ផ្កា និងផ្លែ សម្រាប់ប្រើប្រាស់ជាអាហារ និងឱសថមានឈ្មោះល្បីល្បាញជាយូរលង់ណាស់មកហើយ ជាមួយឈ្មោះជួរភ្នំក្រវាញ និងរបាំបេះក្រវាញ។
កាលពីថ្ងៃទី៤ ខែមិថុនា ឆ្នាំ២០២០កន្លងទៅនេះ នៅក្នុងកិច្ចប្រជុំសាមញ្ញក្រុមប្រឹក្សាខេត្តពោធិ៍សាត់ លើកទី១២ ឆ្នាំទី១ អាណត្តិទី៣ និម្មិតសញ្ញាខេត្តពោធិ៍សាត់ ត្រូវបានក្រុមប្រឹក្សាខេត្ត ប្រជុំពិនិត្យ និងអនុម័ត ដាក់សុំការសម្រេចពីក្រសួងមហាផ្ទៃ ដើម្បីអាចយកមកប្រើប្រាស់លើលិខិត រដ្ឋបាលជាផ្លូវការ និងអាចសាងសង់ក្លាយជាកន្លែងគោរពបូជា ដែលមានការទាក់ទាញពីភ្ញៀវទេសចរណ៍ ក៏ដូចជាសម្រាប់ប្រើប្រាស់ដាក់នៅកន្លែងធ្វើការងារ, ដាក់នៅលើក្បាលលិខិត ឯកសារ និងស្រោមសំបុត្រផ្លូវការ, ប្រើប្រាស់ក្នុងពិធីនានារបស់រដ្ឋបាលខេត្តពោធិ៍ និងសម្រាប់ប្រើប្រាស់ជាផ្លូវការ ក្នុងករណីផ្សេងៗទៀតដែលចាំបាច់៕
