ដោយៈ វុត្ថា
មានីលៈ ក្រុមហ៊ុន Accor ជាក្រុមហ៊ុនវិនិយោគលើសណ្ឋាគារប្រណីតលំដាប់ពិភពលោកកំពុងពង្រីកវត្តមានរបស់ខ្លួននៅក្នុងប្រទេសហ្វីលីពីន ដែលមានការវិនិយោគលើសណ្ឋាគារលំដាប់ផ្កាយ៥ ក្រោមយីហោ Pullman បន្ទាប់ពីមើលឃើញពីឱកាសងើបឡើងវិញនៃវិស័យទេសចរណ៍នៅក្នុងប្រទេសមួយនេះ។
តាមការចុះផ្សាយរបស់ព្រឹត្តិបត្ររបស់ប្រទេសហ្វីលីពីន MANILA BULLETIN កាលពីពេលថ្មីៗនេះបានឱ្យដឹងថា ក្រុមហ៊ុនAccor Group បានចុះហត្ថលេខាលើកិច្ចព្រមព្រៀងសាងសង់សណ្ឋាគារជាមួយក្រុមហ៊ុន Primex Realty Corp. ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន PRIMEX Corporation សម្រាប់យីហោសណ្ឋាគារ Pullman ទី ២ របស់ខ្លួននៅក្នុងប្រទេសហ្វីលីពីន ដែលមានទីតាំងនៅក្នុងអគារ Primex Tower នៃតំបន់ Greenhills ។
សណ្ឋាគារ Pullman Manila នឹងកាន់កាប់អគារខ្ពស់ជាងគេ ដោយជាន់ទី១០នៃអគារ Primex Tower មានកម្ពស់៥០ជាន់ ដែលគ្រោងនឹងបញ្ចប់សាងសង់នៅឆ្នាំ២០២៣។ សណ្ឋាគារនេះ នឹងក្លាយជាសណ្ឋាគារលំដាប់ផ្កាយ៥ ដែលមាន២០០បន្ទប់ស្ថិតនៅក្នុងអគារខ្ពស់ជាងគេបំផុតមួយក្នុងទីក្រុង។
អាគារ Primex Tower នឹងរួមបញ្ចូលទាំងការលក់រាយ និងការិយាល័យធ្វើការនៅជាន់ខាងក្រោម។ រីឯសណ្ឋាគារលំដាប់ខ្ពស់ នឹងស្ថិតនៅជាន់ខាងលើ១០ជាន់។ អគារដែលមានកម្ពស់៥០ជាន់នេះ មានទីតាំងស្ថិតនៅជិត នឹងបណ្តុះលំនៅដ្ឋានជនជាតិចិន – ហ្វីលីពីនកាត់ចិន ដែលរស់នៅក្នុងតំបន់ Greenhills និងនៅមិនឆ្ងាយពីផ្សារទំនើប Greenhills Shopping Complex។
សណ្ឋគារ Pullman Manila នៅអគារ Primex Tower នឹងមានភោជនីយដ្ឋានចំនួន២ កន្លែងទទួលភ្ញៀវ និងរង្គសាលនៅលើដំបូល។ សណ្ឋាគារនេះ ក៏នឹងមានមជ្ឈមណ្ឌលហាត់ប្រាណ និងអាងហែលទឹក ដើម្បីលើកទឹកចិត្តភ្ញៀវជាមួយនឹងការផ្តល់ជូននូវកន្លែងហាត់ប្រាណយ៉ាងទូលំទូលាយ។
បច្ចុប្បន្នក្រុមហ៊ុន Accor ប្រតិបត្តិការសណ្ឋាគារចំនួន៧ នៅតំបន់Greater Manila ដែលបានស្វាគមន៍ភ្ញៀវទេសចរជាង៥លាននាក់ក្នុងឆ្នាំ២០១៩។ ក្រុមហ៊ុនបដិសណ្ឋារកិច្ចមួយនេះ នៅតែបន្តពន្លឿនល្បឿនយ៉ាងលឿននៅក្នុងប្រទេសហ្វីលីពីន ដោយការចុះហត្ថលេខាយកយីហោPullman Manila នៅក្នុងអគារ Primex Tower ហើយគ្រោងនឹងបើកចំនួន១៦ សណ្ឋាគារទៀតនៅក្នុងប្រទេសក្នុងរយៈពេល៥ឆ្នាំខាងមុខ៕
