ដោយៈគង់ សូរិយា
ភ្នំពេញៈ ទីប្រឹក្សាផ្ទាល់សម្តេចតេជោហ៊ុន សែននាយករដ្ឋមន្រ្តីនៃកម្ពុជា ជារដ្ឋលេខាធិកាក្រសួងព៌តមាន លោកជុំ កុសលបានមានប្រសាសន៍ថា សេរីភាពគឺជាភាពនៃសិទ្ឋឬអំណាចលើខ្លូន ប៉ុន្តែសិទ្ធិឬអំណាចនេះត្រូវតែស្ថិតក្នុងរង្វង់ច្បាប់។
លោកជុំ កុសលដែលបានផ្តល់កិត្តិយសដ៏ខ្ពង់ខ្ពស់ជាឧត្តមទីប្រឹក្សារបស់គេហទំព័រPropertyarea.asiaផងដែរនោះ បានសរសេរលើបណ្តាញទំនាក់ទំនងសង្គមរបស់ខ្លួនថា មានអ្នកខ្លះនៅតែយល់ថា សេរីភាព គឺជាសិទ្ធិឬអំណាចឯករាជ្យផ្ទាល់ខ្លួនមិនពាក់ព័ន្ធ ដូច្នេះការធ្វើអ្វីៗគឺជាស្វ័យសម្រេច។
លោកបន្តថា “ការយល់បែបនេះហើយ ដែលជាហេតុនាំឲ្យ ការប្រព្រឹត្តខ្លះត្រូវបានចេញឆ្ងាយពីបន្ទាត់ច្បាប់ ប្រែទៅជាអាណាធិបតេយ្យភាព”។ លោកបន្តថា “ប៉ុន្តែបើនិយាយតាមភាពជាក់ស្តែង អ្នកដែលរិះគន់ពីការរឹតត្បិតសេរីភាពនៅកម្ពុជា គឺអ្នកនោះឯង ដែលជាអ្នកប្រើសេរីភាពខ្លួន ចេញក្រៅរង្វង់ច្បាប់ដោយចេតនា ហើយចាំវាយបកចំពោះការអនុវត្តច្បាប់របស់រាជរដ្ឋាភិបាលវិញ”។
លោកជុំ កុសលបានបន្តថា វាគឺជារឿងលើគោកពេក ហើយក៏មិនមែនជារឿងថ្មីដែរសម្រាប់អ្នកវាយតម្លៃកម្ពុជាទាំងនោះ។ គ្មានអ្វីប្រែប្រួលទេ លំហសេរីភាពនៅកម្ពុជានៅតែមានវិសាលភាពទូលំទូលាយ មិនថាសេរីភាពសារព័ត៌មាន ឬសេរីភាពផ្សេងៗទៀតឡើយ ។ ប៉ុន្តែរាល់សេរីភាពទាំងអស់គឺត្រូវស្ថិតនៅក្នុងរង្វង់ច្បាប់ជាកំហិត៕
