ដោយៈគង់ សូរិយា
ភ្នំពេញៈ វិញ្ញាបនបត្រសម្គាល់ម្ចាស់ឯកជន ជាផ្នែកថ្មីមួយនៃនិតិវិធី ដែលមានចែកក្នុងច្បាប់ស្តីពី “សហកម្មសិទ្ធិ” ដែលរដ្ឋាភិបាលបានអនុម័តដាក់ឲ្យប្រើប្រាស់កាលពីឆ្នាំ២០១០ ។
ដោយសារកម្ពុជាបានរៀបចំនិងអនុម័តច្បាប់នេះ ទើបការវិនិយោគខុនដូបានរីកចម្រើនយ៉ាងលឿននៅកម្ពុជា ដោយសារច្បាប់ស្តីពីអចលនទ្រព្យសហកម្មសិទ្ឋ បានអនុញ្ញាត្តឲ្យជនបរទេសអាចមានសិទ្ឋគ្រប់គ្រង និងទិញផ្ទះចាប់ពីជាន់ទី១ឡើង។
ទាក់ទងនឹងវិញ្ញាបនបត្រសម្គាល់ម្ចាស់ចំណែកកជន ជាការសំដៅដល់អ្នកទិញយូនីត ឬបន្ទប់ នៃអគារសហកម្មសិទ្ធិនីមួយៗ នឹងត្រូវបានអ្នកអភិវឌ្ឍ ឬម្ចាស់អគារផ្តល់អោយ នូវវិញ្ញាបនប័តសម្គាល់ម្ចាស់ចំណែកឯកជន ដើម្បីសម្គាល់ថា អ្នកទិញនោះ គឺជាកម្មសិទ្ធិករស្របច្បាប់ នៃបន្ទប់ ឬយូនីតដែលខ្លួនបានទិញនោះ (សូមមើលគំរូ វិញ្ញាបនប័តសម្គាល់ម្ចាស់ចំណែកឯកជន ខាង ក្រោមនេះ )។
វិញ្ញាបនប័ត្រនេះ គឺជាប្លង់រឹងស្របច្បាប់ដែលបញ្ជាក់ថា អ្នកទិញគឺជាកម្មសិទ្ធិករ ស្របច្បាប់ នៃចំណែកឯកជន ក្នុងអគារសហកម្មសិទ្ធិ ដែលខ្លួនបានទិញពីម្ចាស់គម្រោង ជារៀងរហូត មិនមែនជាកម្មសិទ្ធិ៩៩ឆ្នាំ ៧០ឆ្នាំ ឬ៥០ឆ្នាំ ដូចអ្នកខ្លះបានគិត ឬលើកឡើងនោះឡើយ។
មានន័យថា បើលោក-អ្នកបានទិញខុនដូ (អគារសហកម្មសិទ្ធិ)ណាមួយ អ្នកលក់ ឬម្ចាស់គម្រោងនៃអគារសហកម្មសិទ្ធិនោះ ត្រូវតែចេញវិញ្ញាបនប័ត្រ សម្គាល់ម្ចាស់ចំណែកឯកជនជូនលោក-អ្នក ជាដាច់ខាត។ បើគេមិនចេញអោយ ឬផ្តល់អោយមានន័យថា អគារសហកម្មសិទ្ធិនោះមានបញ្ហាផ្លូវច្បាប់ ដែលអ្នកទិញគ្រប់រូបមិនគួរទិញ គម្រោងនោះទេ៕
