ដោយៈ ប៊ី
ភ្នំពេញៈ អ្នកជំនាញល្បីៗក្នុងវិស័យអចលទ្រព្យនៅកម្ពុជា បានលើកឡើងថា វិស័យអចលនទ្រព្យនៅរាជធានីភ្នំពេញ និងខេត្តព្រះសីហនុ មានរីកចម្រើនយ៉ាងខ្លាំង ខណៈការវិនិយោគរបស់ចិនបានជំរុញឲ្យតំបន់ទាំងពីរនេះក្លាយកន្លែងវិនិយោគអចលនទ្រព្យដ៏រីកចម្រើន។
ប្រធានក្រុមប្រឹក្សាភិបាល សមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោកលឹម សុជាតិ បានលើកឡើងនៅថ្ងៃទី២០ ខែ កុម្ភៈ ឆ្នាំ ២០២១ នេះថា ចិនជាកំលាំងចលករមួយ ដែលបានជម្រុញការរីកចម្រើនវិស័យសេដ្ឋកិច្ច មិនមែនតែកម្ពុជាប៉ុណ្ណោះទេ ហើយថែមនៅក្នុងអាស៊ានទាំងមូល។
លោកបានបន្តថា ក្នុងនោះសម្រាប់ក្របខណ្ឌគោលនយោបាយ ដែលប្រទេសចិនបានអនុវត្តន៍ជាមួយកម្ពុជា គឺមានគ្រប់ផែនការអភិវឌ្ឍន៍ និងគញរប់ជ្រុងជ្រោយ ដូចជានាពេលកន្លងមកនេះ កម្ពុជា-ចិន បានចុះកិច្ចព្រមព្រៀងពាណិជកម្មសេរីបន្ថែម ដែលការចុះកិច្ចព្រមព្រៀងនេះ គឺបានជួយពេញផ្ទៃប្រទេស ដោយមិនបានកំណត់នូវតំបន់ប៉ូលណាមួយឡើយ។
លោកបានបន្តថា ពាក់ព័ន្ធកិច្ចសហប្រតិបត្តិការនេះ សម្រាប់ក្របខណ្ឌជាតិ ចិនមានកិច្ចសហការស្ទើរគ្រប់ប៉ូលសំខាន់ៗទាំងអស់ ប៉ុន្តែកម្រិតថ្នាក់ក្រោមជាតិ អ្នកវិនិយោគទុន គឺបានចាប់យកការវិនិយោគ ឬឱកាសណា ដែលមានផលវិជ្ជមានត្រឡប់មកវិញ ដូចជាការវិនិយោគលើវិស័យសំណង់ និងវិស័យឧស្សាហកម្មកាត់ដេរជាដើម ជាក់ស្តែងយើងសង្កេតឃើញថា តំបន់ចំនួនពីរគឺ រាជធានីភ្នំពេញ និងខេត្តព្រះសីហនុ គឺជាតំបន់ប៉ូលសេដ្ឋកិច្ចល្អលើផ្នែកអចលចនទ្រព្យ ដែលកំពុងមានសន្ទុះរីកចម្រើន។
លោកសន សៀបអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានថ្លែងថា បើតាមរបាយណ៍ប្រធានប្រតិបត្តិក្រុមប្រឹក្សាភិបាលចិន-អាស៊ាន បានបង្ហាញថា ចិនមានការវិនិយោគលើគោលដៅធំៗចំនួន៥ គឺការវិនិយោគលើហេដ្ឋារចនាសម្ព័ន្ធ ខ្សែក្រវ៉ាត់មួយផ្លូវមួយ គម្រោងវិស្វរកម្ម គម្រោងអចលនទ្រព្យ E-commers និងឌីជីថល Economic និងផ្នែកផលិតកម្ម និងបង្គុំជាដើម ដែលបញ្ហានេះ អ្នកវិនិយោគចិនកំពុងចាប់អារម្មណ៍ក្នុងការវិនិយោគផងដែរ។
លោកបានថ្លែងបន្តថា ជាក់ស្តែងនៅឆ្នាំ២០២០ ចិនជាអ្នកទី១ សម្រាប់ការវិនិយោគនៅកម្ពុជា ហើយលោកសង្ឃឹមថា បន្ទាប់ពីស្ថានភាពជម្ងឺកូវីដ ១៩ បានធូរស្រាល ចិននៅតែនាំមុខគេ លើការវិនិយោគនៅកម្ពុជាដ៏ដែល ។
លោកឧកញ៉ាចេង ខេងអគ្គនាយកក្រុមហ៊ុន CPL Cambodia Properties Limited បាននិយាយថា កម្ពុជានៅទាក់ទាញអ្នកវិនិយោគចិនបន្ថែមទៀត បន្ទាប់ពីកម្ពុជាបានចុះកិច្ចព្រមព្រៀងពាណិជ្ជកម្មសេរីជាមួយចិន បច្ចុប្បន្នចិនក៏កំពុងសម្លឹងមើលការវិនិយោគលើផ្នែកកសិកម្មបន្ថែម សម្រាប់បម្រើទីផ្សារនាំចេញទៅកាន់ប្រទេសរបស់ខ្លួន ព្រោះទីផ្សារសេរីនៅប្រទេសចិនប្រាកដជានាំចូលបន្ថែម ចំពោះផលិតផលសក្តានុពលដែលកម្ពុជាមាន ខណៈដែលបច្ចុប្បន្នផលិតផលសក្តានុពលទាំងនោះ កំពុងចាប់អារម្មណ៍ពីអ្នកវិនិយោគទុនបរទេសផងដែរ៕
