ដោយ: សុធារី
ភ្នំពេញ: ក្រសួងមហាផ្ទៃបានដាក់ពាក្យស្នើសុំទៅកាន់ក្រសួងប្រៃសណីយ៍និងទូរគមនាគមន៍ តាមរយៈលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ ផ្តល់សេវា INTERNET តាមខ្សែកាកាបដើម្បីតភ្ជាប់ឧបករណ៍ត្រួតពិនិត្យល្បឿន អចល័តចំនួន២០ គ្រឿង លើ១០ទីតាំង តាមបណ្ដោយផ្លូវជាតិលេខ៣។
គោលបំណងនៃការភ្ជាប់ឧបករណ៍ត្រួតពិនិត្យល្បឿនអចល័តនេះ ដើម្បីរួមចំណែកកាត់បន្ថយគ្រោះថ្នាក់ចរាចរណ៍ផ្លូវគោក ដែលបង្កដោយការបើកបរល្មើសល្បឿនកំណត់។ អគ្គស្នងការដ្ឋាននគរបាលជាតិសហការជាមួយក្រសួង សាធារណការ និងដឹកជញ្ជូនកំពុងបំពាក់ឧបករណ៍ត្រួតពិនិត្យល្បឿនអចល័តចំនួន២០(ម្ភៃ)គ្រឿង លើ១០ (ដប់)ទីតាំងតាមបណ្តោយផ្លូវជាតិលេខ៣ ចាប់ពីរង្វង់មូលចោមចៅ ដល់ក្រុងកំពត ដែលស្ថិតនៅចំណុច គីឡូម៉ែត្រ១៨ គីឡូម៉ែត្រ៣៣ គីឡូម៉ែត្រ៤៣ គីឡូម៉ែត្រ៧៤ គីឡូម៉ែត្រ៨៦ គីឡូម៉ែត្រ១០២ គីឡូម៉ែត្រ១០៩ គីឡូម៉ែត្រ១៣៤ គីឡូម៉ែត្រ១៥១ និងគីឡូម៉ែត្រ១៦១។
ឧបករណ៍ត្រួតពិនិត្យល្បឿនអចល័តទាំងនេះ ត្រូវការជាចាំបាច់នូវសេវា INTERNET ដើម្បីធ្វើការបញ្ជូនរូបភាពយានយន្តល្មើសដែលថតបាននៅតាមទីតាំងនីមួយៗ មកកាន់មជ្ឈមណ្ឌលបញ្ហាតាំង នៅអគ្គស្នងការដ្ឋាននគរបាលជាតិ ដើម្បីចាត់ការបន្តតាមនីតិវិធីច្បាប់៕
