ដោយៈ សុផារី
សៀមរាបៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានមានប្រសាសន៍ថា សម្តេចនឹងអញ្ជើញសម្ភោធដាក់ឱ្យប្រើប្រាស់ផ្លូវ៣៨ខ្សែនៅក្នុងក្រុងសៀមរាប ដែលចំណាយទឹកប្រាក់ជាង១៥០លានដុល្លាអាមេរិក នៅថ្ងៃទី៤ ខែមេសា ឆ្នាំ២០២២សប្តាហ៍ក្រោយនេះ។
សម្ដេចតេជោ ហ៊ុន សែន លើកឡើងបែបនេះនៅក្នុងពិធីសម្ពោធដាក់ឱ្យប្រើប្រាស់អគារមជ្ឈមណ្ឌលត្រចៀក ច្រមុះ បំពង់ក នៃមនី្ទរពេទ្យព្រះអង្គឌួង នៅព្រឹកថ្ងៃចន្ទ ទី២៨ ខែមីនានេះ។
សម្តេចបានមានប្រសាសន៍ថា “ខេត្តសៀមរាបក៏មានផ្លូវល្អ។ ខ្ញុំនឹងទៅសម្ភោធផ្លូវ៣៨ខ្សែ នៅខេត្តសៀមរាប ដែលបានប្រើប្រាស់ទុនជាង២០០លានដុល្លាអាមេរិក ដើម្បីធ្វើឱ្យប្រសើរឡើងនូវហេដ្ឋារចនាសម្ព័ន្ធក្នុងខេត្តសៀមរាប ដែលជាខេត្តទេសចរណ៍ដ៏សំខាន់របស់យើង”។
សម្តេចថ្លែងបញ្ជាក់ថា “ខ្ញុំទៅសម្ភោធផ្លូវ៣៨ខ្សែ នៅសៀមរាប ថ្ងៃទី៤ ឮថាចង់អស់អូតែលហើយ ព្រោះគេចង់ទៅមើលផ្លូវស្អាត”។
សម្តេចតេជោថ្លែងបន្តទៀតថា សម្តេច ក៏ទៅត្រួតពិនិត្យផងដែរនូវព្រលានយន្តហោះថ្មីមួយ ដែលបាននិងកំពុងសាងសង់ ដែលព្រលានយន្តហោះនោះ នឹងត្រូវបានសម្ពោធដាក់ឱ្យប្រើប្រាស់នាពេលខាងមុខឆាប់ៗ។
សមិទ្ធផលផ្លូវ៣៨ខ្សែ ក្នុងទីក្រុងសៀមរាបនេះ មានប្រវែងសរុប១០៦.៤២គីឡូម៉ែត្រ ដោយប្រើប្រាស់ថវិកាជាតិសរុបចំនួនជាង២០០លានដុល្លារអាមេរិក។ ហេដ្ឋារចនាសម្ព័ន្ធនេះត្រូវបានសម្ពោធបើកការដ្ឋានសាងសង់កាលពីថ្ងៃទី៣០ ខែវិច្ឆិកា ឆ្នាំ២០២០៕
