ដោយ ដែន ចែងចាំង
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ នឹងបន្តអនុវត្តន៍គោលនយោបាយម៉ាក្រូសេដ្ឋកិច្ចដោយប្រុងប្រយ័ត្ន និងការប្រកាន់យកនូវគោលនយោបាយហិរញ្ញវត្ថុសាធារណៈ គោលនយោបាយរូបិយវត្ថុដើម្បីជំរុញកំនើនសេដ្ឋកិច្ច និងបរិយាកាសវិនិយោគកាន់តែល្អប្រសើរ។
យោងតាមគោលនយោបាយនៃក្រសួងសេដ្ឋកិច្ច និងហិរញ្ញវត្ថុ ដែលបានចែងក្នុង យុទ្ធសាស្ត្រចតុកោណដំណាក់កាលទី៤នេះ ក្រសួងសេដ្ឋកិច្ច និងហិរញ្ញវត្ថុបានប្តេជ្ញាកែលម្អបរិយាកាសកំណើនសេដ្ឋកិច្ចខ្ពស់ និងស្ថិរភាពល្អប្រសើរផ្នែកម៉ាក្រូសេដ្ឋកិច្ច ការកែលម្អបរិយាកាសធុរកិច្ច និងការរៀបចំមូលដ្ឋានចាំបាច់ ដើម្បីធានាការប្រកួតប្រជែងដោយស្មើរភាព នឹងការបន្តអនុវត្តន៍គោលនយោបាយម៉ាក្រូសេដ្ឋកិច្ច ដោយប្រុងប្រយ័ត្ន ការប្រកាន់យកនូវគោលនយោបាយហិរញ្ញវត្ថុសាធារណៈ គោលនយោបាយរូបិយវត្ថុ និងការកែទម្រង់រចនាសម្ព័ន្ធ ដែលមានលក្ខណៈបុរេសកម្មដោយប្រយ័ត្នប្រយែង ដើម្បីធានាបាននូវស្ថិរភាពកំណើន អតិផរណាទាប ស្ថិរភាពអត្រាប្តូរប្រាក់ និងជម្រុញដល់ការវិនិយោគជាដើម។
ក្រសួងសេដ្ឋកិច្ច និងហិរញ្ញវត្ថុ នឹងរៀបចំយន្តការគ្រប់គ្រងវិបត្តិ និងហានីភ័យផ្នែកសេដ្ឋកិច្ច ដែលអាចកើនឡើងនៅក្នុងវិស័យហិរញ្ញវត្ថុ ទាំងវិស័យធនាគារ និងវិស័យមិនមែនធនាគារ វិស័យអចនទ្រព្យ និងវិស័យដ៏ទៃទៀត ជាពិសេសការជម្រុញរៀបចំកំណែទម្រង់ប្រព័ន្ធពន្ធដារ ក្នុងគោលដៅបង្កើនប្រសិទ្ធភាពចំណូលថវិការជាតិ និងការបន្តសម្រួលដល់ផ្នែកពាណិជ្ជកម្ម ការកែសម្រួលត្រួតពិនិត្យតាមព្រំដែនឲ្យស្ថិតក្នុងកម្រិតអប្បបរមា និងការកាត់បន្ថយនូវនីតិវិធីផ្សេងៗជាចាំបាច់ ដែលជាឧបសគ្គដល់ការធ្វើពាណិជ្ជកម្ម។
យោងតាមការវាយតម្លៃរបស់ក្រុមបេសកម្មមូលនិធិរូបិយវត្ថុអន្តរជាតិ (Article IV)កាលពេលថ្មីៗនេះ បានបង្ហាញថា សេដ្ឋកិច្ចកម្ពុជាមានភាពល្អប្រសើរ ដោយបានជម្រុញកំណើនសេដ្ឋកិច្ច ស្ថិតក្នុងអត្រាកំនើន៧,២៥ភាគរយនៅឆ្នាំ២០១៨នេះ និងអត្រាអតិផរណាមានកម្រិតទាបត្រឹម២,៥ភាគរយ ស្របពេលវិស័យសារពើពន្ធមានមូលដ្ឋានរ៉ឹងមាំ ជាពិសេសគឺការប្រមូលចំណូល និងការគ្រប់គ្រងបំណុលសាធារណៈបានល្អប្រសើរ៕
