ដោយ៖ សុផារី
ភ្នំពេញ៖ អាហារតាមផ្លូវ “លតឆាកម្ពុជា” ត្រូវបានសារព័ត៌មាន និងទូរទស្សន៍លំដាប់ពិភពលោក CNN ចាត់ចំណាត់ថ្នាក់ក្នុងចំណោមអាហារតាមផ្លូវល្អបំផុតទាំង៥០ប្រចាំទ្វីបអាស៊ី។
យោងតាមចំណាត់ថ្នាក់អាហារតាមផ្លូវល្អបំផុតទាំង៥០ប្រចាំទ្វីបអាស៊ី របស់ CNN ចេញផ្សាយនៅថ្ងៃទី២៤ ខែសីហា ឆ្នាំ២០២២កន្លងមក បានឱ្យដឹងថា ប្រទេសកម្ពុជាមានមួយមុខគឺ លតឆា បានជាប់ចូលក្នុងបញ្ជីអាហារតាមផ្លូវល្អបំផុតទាំង៥០ប្រចាំទ្វីបអាស៊ី។
សារព័ត៌មាននេះសរសេរអធិប្បាយអំពីលតឆាកម្ពុជាថា “លតឆា ជាធម្មតាត្រូវបានរៀបចំលក់ នៅក្នុងរទេះរុញ និងនៅតាមផ្សារនានា។ ឡុតឆាមានគ្រឿងផ្សំ ដូចជា លត ខ្ទឹមបារាំង ផ្កាខាត់ណាខៀវ សណ្តែកបណ្តុះ ម្ទេស ខ្ទឹម និងសាច់គោ បន្ទាប់មកដាក់ពងមាន់ចៀន និងទឹកជ្រលក់ពិសេស”។
អត្ថបទដដែលរៀបរាប់បន្តថា “ទឹកម្ទេសក្រហមដែលមានជាតិជូរបែបខ្មែរ កាន់តែជួយបង្កើនរសជាតិ”។
ក្រៅពីនេះ ប្រទេសជិតខាងកម្ពុជា រួមមាន ប្រទេសវៀតណាមមានបីមុខគឺ បាញ់មី (នំប៉័ងសាច់) កាហ្វេទឹកកក និងហ្វឺ រីឯថៃវិញមាន បីមុខដែរគឺ ពងទាចៀនសាច់ក្តាម ស៊ុបមីបំពង (ខាវសយ) និងសាច់ក្រកឥសាន ហើយប្រទេសឡាវ មានពីរមុខគឺ បាយដំណើបលាបពងអាំង និងណែមញាំបាយបំពង៕
