ដោយៈ គង់ សូរិយា
ភ្នំពេញៈ លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ បានត្រៀមចុះហត្ថលេខា នាំយកសាលាបណ្តុះបណ្តាលអ្នកជំនាញអចលនទ្រព្យដ៏ល្បី របស់ប្រទេសសិង្ហបុរី Real Centre Academy (RCA) មកកាន់ទឹកដីព្រះរាជាណាចក្រកម្ពុជា។
ស្ថាបនិកក្រុមហ៊ុនភ្នាក់ងារអចលនទ្រព្យ Khompound រូបនេះ បានមានប្រសាសន៍ឲ្យដឹងកាលពីល្ងាចថ្ងៃទី២៩ សីហាកន្លងមកថា ពេលនេះលោកកំពុងនៅទីក្រុង Pattaya ប្រទេសថៃ ។ មូលហេតុដែលលោកទៅកាន់ទីនោះ ដើម្បីចុះហត្ថលេខានាំយកសាលា RCA ដែលជាសាលាបណ្តុះបណ្តាលអ្នកជំនាញអចលនទ្រព្យដ៏ល្បីមួយ នៅប្រទេសសិង្ហបុរី មកកាន់កម្ពុជា។
លោកបន្តថា “សាលាដ៏ល្បីនេះ បានបណ្តុះបណ្តាលភ្នាក់ងារអចលនទ្រព្យប្រហែល៦០% នៅទូទាំងប្រទេសសិង្ហបុរីទាំងមូល និងមានសាខានៅតាមបណ្តាប្រទេសជាច្រើនផងដែរដូចជា ថៃ ម៉ាឡេស៊ី មីយ៉ាន់ម៉ា ហុងកុង ឥណ្ឌូនេស៊ី ហ្វីលីពីន និងឥណ្ឌា”។
លោកឧកញ៉ា ឃាង ពុទ្ធីបានឲ្យដឹងថា បញ្ហាដែលកើតឡើងនិងភាពអវិជ្ជមានមួយចំនួន ក្នុងវិស័យអចលនទ្រព្យនៅប្រទេសកម្ពុជា ដោយសារការខ្វះចំណេះដឹង ការអប់រំបណ្តុះបណ្តាល និងជំនាញច្បាស់លាស់។ ដូច្នេះការនាំយកសាលាដែលមានជំនាញ វិជ្ជាជីវៈច្បាស់លាស់ ពីប្រទេសសិង្ហបុរីទៅកាន់កម្ពុជា នៅថ្ងៃនេះ គឺជាផ្នែកមួយនៃការខិតខំប្រឹងប្រែង ដើម្បីពង្រឹងសមត្ថភាពភ្នាក់ងារ និងអ្នកជំនាញអចលនទ្រព្យទាំងអស់នៅកម្ពុជា ដើម្បី ឱ្យវិស័យអចលនទ្រព្យនៅកម្ពុជា មានភាពរីកចម្រើនឲ្យដូច និងជឿនលឿនជាងប្រទេសជិតខាងកម្ពុជា៕
