ដោយវុត្ថា
ភ្នំពេញៈ សម្តេចតេជោ ហ៊ុន សែន បានអនុម័តឱ្យក្រសួងការបរទេស ហប្រតិបត្តិការអន្តរជាតិ បើកបើកស្ថានទូតចំនួន២ផ្សេងទៀង នៅនៅអាហ្វ្រិក និងអាមេរិកឡាទីន តបតាមសំណើររបស់លោក ប្រាក់ សុខុន ឧបនាយករដ្ឋមន្ត្រី ខណៈកម្ពុជាបច្ចុប្បន្នបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយមានស្ថានតំណាងប្រចាំនៅបរទេសចំនួន៦៣។
សម្ដេចតេជោហ៊ុន សែន នៅក្នុងសន្និបាតបូករុបការងារប្រចាំ២០១៩ និងលើកទិសដៅឆ្នាំ២០២០នៅព្រឹកថ្ងៃទី៣១ មករានេះ ឱ្យដឹងថាស្ថានទូតទាំងពីរនេះ អាចបង្កើតឡើងនៅចន្លោះឆ្នាំ២០២១ ទៅ២០២២ខាងមុខ។ ជាមួយគ្នានេះ សម្តេចក៏បានសម្រេច ឱ្យក្រសួងការបរទេស ពិនិត្យលទ្ធភាពរៀបចំថវិកាសាងសង់អាគារ និងសម្រាប់ជួលបុគ្គលិកបំពេញការងារនៅទីនោះផងដែរ ។
លោកឧបនាយករដ្ឋមន្ត្រី ប្រាក់ សុខុនរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិឱ្យដឹងដែរថា ការបង្កើតទូតថ្មីនេះ គឺដើម្បីពង្រឹងទំនាក់ទំនងការទូតបន្ថែមទៀត តាមយុទ្ធសាស្ត្របង្កើនមិត្តខាងក្រៅ ដែលរដ្ឋាភិបាលបានដាក់ទិសដៅ។
បើតាម លោកឧបនាយករដ្ឋមន្ត្រី ប្រាក់ សុខុនបានឲ្យដឹងថា មកដល់ពេលនេះ កម្ពុជាបានភ្ជាប់ទំនាក់ទំនងការទូតជាមួយប្រទេសចំនួន១៧៤ ហើយមានស្ថានតំណាងប្រចាំនៅបរទេសចំនួន៦៣។ កាលពីឆ្នាំ២០១៩ កម្ពុជាចាប់ផ្តើមស្តារទំនាក់ទំនងការទូតនិងមិត្តភាពជាមួយប្រទេសនានា ដែលជាមិត្តចាស់របស់យើងមានសាធារណរដ្ឋឆែក ប៊ុល ហ្គារី ហុងគ្រី រ៉ូម៉ានី ស៊ែប៊ី ហើយបានទិញអាគាររៀបចំស្ថានទូតនៅទីក្រុងអង់ការ៉ា ចាប់ផ្តើមជួសជុលស្ថានទូតយើងនៅទីក្រុងសូហ្វីយ៉ា និងបែលក្រាដ បើកស្ថានអគ្គកុងស៊ុលថ្មីនៅទីក្រុងហៃគូ និងកំពុងគិតគូរបើកស្ថានទូតថ្មីនៅទីក្រុងប៊ូដាប៉េស ប្រទេសហុងគ្រីផងដែរ។
ក្នុងរយៈពេលជិត៤ឆ្នាំនេះ រដ្ឋាភិបាលកម្ពុជា បានធ្វើការកែទម្រង់ជាច្រើននៅក្នុងក្រសួង ដូចជា លក្ខខណ្ឌការងារសំរាប់មន្ត្រីត្រូវបានកែលំអ ដោយមានរបបប្រាក់រង្វាន់សំរាប់មន្ត្រី និងបុគ្គលិក ក្នុងក្រសួងការតំឡើងប្រាក់ខែជូនមន្ត្រីការទូត នៅឯក្រៅប្រទេស ការបង្កើនកញ្ចប់ថវិកាចំណាយទូទៅ សំរាប់ស្ថានតំណាងនៅបរទេសចំនួន១០ភាគរយ ការកែលម្អរកន្លែងធ្វើការ ការបង្កើតវិទ្យាស្ថាន ដើម្បីបំពាក់បំប៉ន និងបណ្តុះបណ្តាលមន្ត្រីការទូតជាដើម៕
