ដោយ វុត្ថា
ភ្នំពេញៈ ការចុះបញ្ជីពាណិជ្ជកម្ម និងលទ្ធផលនៃបញ្ចីចុះឈ្មោះពាណិជ្ជកម្ម ដើរតួនាទីយ៉ាងសំខាន់ក្នុងសេដ្ឋកិច្ចទីផ្សារ ដោយបានផ្ដល់ឲ្យអាជីវកម្ម មានសុពលភាពស្របច្បាប់អាចជឿទុកចិត្តបាន និងទទួលបានព័ត៌មានថ្មីៗពីអាជីវកម្ម និងមុខងារក្នុងការធ្វើអាជីវកម្មប្រកបដោយប្រសិទ្ធភាព។
នៅប្រទេសកម្ពុជា ប្រព័ន្ធចុះបញ្ជីពាណិជ្ជកម្ម កំពុងមានការរីកចម្រើនក្នុងការកែលំអរ និងធ្វើឲ្យមានលក្ខណៈប្រសើរឡើង។ ភាពស្មុគស្មាញមួយចំនួននៃការចុះបញ្ជីក្រុមហ៊ុនត្រូវបានលុបបំបាត់ ឬត្រូវបានធ្វើឲ្យមានភាពងាយស្រួល សម្រាប់ការចុះបញ្ជីក្រុមហ៊ុន។
ការចុះបញ្ជីពាណិជ្ជកម្ម ជាជំហ៊ានមួយដែលបានធ្វើឡើង ដោយម្ចាស់ក្រុមហ៊ុនដើម្បីបង្កើតអាជីវកម្មមួយ ឲ្យមានលក្ខណៈជានីតិបុគ្គល ដោយអនុវត្តតាមនីតិវិធីជាលក្ខណៈស្ដង់ដារ ដែលអាជីវកម្មទាំងអស់ត្រូវតែបំពេញ។ ការចុះបញ្ជីពាណិជ្ជកម្ម គ្របដណ្ដប់ទាំងការបង្កើតអាជីវកម្មថ្មី និងការកែប្រែក្រុមហ៊ុន ដែលមានស្រាប់ជាលក្ខណៈផ្លូវការ ដូចជាការផ្លាស់ប្ដូរទីតាំងអាជីវកម្ម ការផ្លាស់ប្ដូររចនាសម្ព័ន្ធម្ចាស់ក្រុមហ៊ុន និងការរំលាយក្រុមហ៊ុន។
សកម្មភាពនៃការចុះបញ្ជីអាជីវកម្ម ទៅក្នុងបញ្ជីឈ្មោះពាណិជ្ជកម្ម មានន័យថាព័ត៌មានដែលមានសុពលភាពស្របតាមផ្លូវច្បាប់ គឺអាចប្រើប្រាស់បានជាប្រយោជន៍ទៅលើសកម្មភាពពាណិជ្ជកម្ម ហើយក៏អាចស្វែងរកបានផងដែរ តាមរយៈបញ្ជីឈ្មោះពាណិជ្ជកម្ម៕
