ដោយ វុត្ថា
ភ្នំពេញៈ ក្រុមហ៊ុនធំៗរបស់ប្រទេសចិនចំនួនពីរ បានទទួលធ្វើការសិក្សា និងសាងសង់ហេដ្ឋារចនាសម្ព័ន្ធធំៗនានាផ្លូវ និងស្ពានច្រើនជាងគេនៅទូទាំងប្រទេសកម្ពុជាដើម្បីជំរុញកំណើនសេដ្ឋកិច្ចសង្គម និងដឹកជញ្ជូននៅកម្ពុជា។
លោកវ៉ាស៊ីម សុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ឱ្យដឹងនៅថ្ងៃទី៥ ខែសីហា ឆ្នាំ ២០២០នេះឱ្យដឹងថា ក្រុមហ៊ុនចិនទាំងពីរនេះ រួមមានក្រុមហ៊ុន Shanghai Group និងក្រុមហ៊ុន China Road and Bridge Corporation (CRBC) ជាក្រុមហ៊ុនធំជាងគេ ដែលទទួលបានគម្រោងសិក្សា និងសាងសងហេដ្ឋារចនាសម្ព័ន្ធនៅទូទាំងប្រទេសកម្ពុជា។
លោកបន្តថា “ក្រុមហ៊ុនទាំងពីរនេះបានទទួលសិក្សា និងសាងសង់លើគម្រោងផ្លូវជាតិ ផ្លូវល្បឿន ផ្លូវខេត្តធំៗ និង ស្ពាននៅទូទាំងប្រទេស។ តែយ៉ាងណាក៏ក្រុមហ៊ុនទាំងពីរនេះ មិនទទួលបានគម្រោងសាងសង់ផ្លូវដែក កំពង់ និងអាកាសយានដ្ឋាននោះទេ “ ។ លោកបន្ថែមទៀតថា “គម្រោងហេដ្ឋារចនាសម្ព័ន្ធទាំងអស់ដែលសិក្សា និសាងសង់នៅកម្ពុជានៅតែដំណើរការធម្មតា និងធ្វើទៅតាមផែនការរបស់ខ្លួន ពុំមានការផ្អាកសកម្មភាពនោះទេ បើទោះបីកម្ពុជាប្រឈមនឹងវិបត្តិសេដ្ឋកិច្ចសកល ដោយសារការផ្ទុះឡើងនូវជំងឺ Covid-19 ” ។
លោកសូរិយាបានបន្ថែមទៀតថា ជាទូទៅក្រុមហ៊ុនចិន ដែលទទួលបានគម្រោងសាងសង់នៅកម្ពុជា មានស្ថានភាពលឿន ដោយសារបានសិក្សាពីតម្លៃ និងគម្រោងចំណាយនានាមានភាពច្បាស់លាស់ត្រឹមត្រូវ។
លោកបន្តថា “តាមការកត់សម្គាល់របស់ខ្ញុំ គឺក្រុមហ៊ុនចិនសិក្សាគម្រោងដោយខ្លួនឯង ហើយបន្តសាងសង់ថែមទៀត ជាមួយគ្នានេះ ក៏មានក្រុមហ៊ុនមួយទៀត ដែលត្រូវបានបញ្ជូនពីរដ្ឋាភិបាលចិន មកត្រួតពិនិត្យពីលើ ដើម្បីឱ្យដំណើរការសងសង់ស្របតាមស្តង់ដាររបស់ចិន” ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានមានប្រសាសន៍ប្រាប់ អ្នកសារព័ត៌មានកន្លងកនេះថា ប្រទេសចិន គឺជាប្រទេសដែលបានផ្តល់ហិរញ្ញប្បទានច្រើនជាងគេ សម្រាប់ការសាងសង់ផ្លូវថ្នល់ និងស្ពាននៅកម្ពុជា ដែលគិតមកដល់ពេលបច្ចុប្បន្ននេះ គម្រោងហេដ្ឋារចនាសម្ព័ន្ធ ដែលរួមមានផ្លូវថ្នល់ប្រើប្រាស់ហិរញ្ញប្បទាន និងជំនួយឥតសំណងរបស់ចិន បានសាងសង់រួចរាល់មានចំនួន២៧ខ្សែ ស្មើនឹងប្រវែងសរុប ២៧៧៩ គីឡូម៉ែត្រ ប្រើប្រាស់ថវិកាប្រមាណ១៦៣៦លានដុល្លារអាមេរិក។
ដោយឡែកគម្រោងដែលកំពុងសាងសង់ មានចំនួន៥ខ្សែ ស្មើនឹងប្រវែងប្រមាណ៤៩៧.២០គីឡូម៉ែត្រ ប្រើប្រាស់ថវិកាប្រមាណ៧៥៨.៨៣លានដុល្លារអាមេរិក។
លោកបានបន្ថែមទៀតថា “ផ្លូវថ្នល់ និងស្ពាន បានដើរតួនាទីយ៉ាងសំខាន់ណាស់សម្រាប់ប្រើប្រាស់ ជាប្រយោជន៍ដល់សេដ្ឋកិច្ចជាតិ តាមរយៈការដឹកជញ្ជូន ដូច្នេះរាជរដ្ឋាភិបាលបានខិតខំប្រឹងប្រែងជម្នះ ដើម្បីសម្រេចឱ្យបានទៅតាមផែនការ ដែលបានគ្រោងទុក” ។
ក្រោមជំនួយរបស់រដ្ឋាភិបាលចិន ស្ពានធំៗ ដែលបានសាងសង់រួចមានចំនួន៨ស្ពាន មានប្រវែងសរុប៧៤៣៤ ម៉ែត្រ ប្រើប្រាស់ថវិកាប្រមាណ២៣៣ លានដុល្លារអាមេរិក និងស្ពានកំពុងសាងសង់ ដូចជា ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងស្ពានឆ្លងកាត់ទន្លេបាសាក់ (សិត្បូ) នៃគម្រោងខ្សែក្រវាត់ក្រុងទី៣ជាដើម ដែលមានប្រវែងសរុប ២ ១២៧ម៉ែត្រ ប្រើប្រាស់ថវិកាប្រមាណ១១៣លានដុល្លារអាមេរិក។
សរុបគម្រោង ដែលប្រើប្រាស់ហិរញ្ញប្បទានសហប្រតិបត្តិការ និងជំនួយឥតសំណងរបស់ចិនដែលបានសាងសង់រួច និងកំពុងសាងសង់មានទឹកប្រាក់ សរុបរហូតដល់ប្រមាណ ២៧៤១លានដុល្លារអាមេរិក ៕
