លោក​ឧបនាយករដ្ឋមន្ត្រី ជា សុផារ៉ា កំពុង​ពិនិត្យមើល​បញ្ហាដីធ្លី និង​ផែនការ​ប្រើប្រាស់​ដី​នៅក្នុង​ខេត្ត​មណ្ឌល​គី​រី

0

ដោយ ៖ រ៉ា​ណេ​ត

មណ្ឌល​គី​រី ៖ លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី​នគរូបនីយកម្ម និង​សំណង់ បាន និង​កំពុង​ត្រួតពិនិត្យ​ទៅលើ​ការងារ​ចុះបញ្ជី​ដីធ្លី ការដោះស្រាយ​វិវាទ​ដីធ្លី រួម​ជាមួយនឹង​ការកសាង​ផែនការ​ប្រើប្រាស់​ដី​នៅក្នុង​ខេត្ត​មណ្ឌល​គី​រី​ដែលជា​ខេត្ត​កំពុងមាន​គម្រោង​អភិវឌ្ឍន៍​ហេដ្ឋារចនាសម្ព័ន្ធសំខាន់ៗជាច្រើន​ជាពិសេស​គម្រោង​សាងសង់​ព្រលានយន្ដហោះ​ក្នុង​តំបន់។

- Video Advertisement -

ជាមួយនឹង​ផែនការ​នៃ​ការរៀបចំ​ផែនការមេ​ក្នុងការ​អភិវឌ្ឍន៍​ហេដ្ឋារចនាសម្ព័ន្ធ​នានា​នៅតាម​បណ្តា​ខេត្ត​ក្រុង​ទូទាំងប្រទេស លោក​ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួង​រៀបចំ​ដែនដី​នគរូបនីយកម្ម និង​សំណង់ នៅ​ថ្ងៃទី១៩ ខែមករា ឆ្នាំ២០២១បាន​ដឹកនាំ​កិច្ចប្រជុំ​អន្តរក្រសួង​ស្ដីពី​ការអនុវត្ត​លើ​ការងារ​ចុះបញ្ជី​ដីធ្លី កាត​ដោះស្រាយ​វិវាទ​ដីធ្លី ជាពិសេស​ការកសាង​ផែនការ​នៃ​ការប្រើប្រាស់​ដី​នៅក្នុង​ខេត្ត​មណ្ឌល​គី​រី​ដើម្បី​ប្រាកដថា​មាន​ភាពត្រឹមត្រូវ និង​មាន​លទ្ធផល​វិជ្ជមាន​ក្រោ​ការអនុវត្ត។

បច្ចុប្បន្ន​ខេត្ត​មណ្ឌល​គី​រី​បាន​ក្លាយជា​គោលដៅ​វិនិយោគ និង​អភិវឌ្ឍន៍​ពី​សំណាក់​វិស័យ​ឯកជន​ជាច្រើន ជាពិសេស​ផ្តោត​សំខាន់​ទៅលើ​វិស័យ​អចលនទ្រព្យ​បែប​កម្សាន្ត​ដូចជា​តំបន់​រមណីយដ្ឋាន​ធម្មជាតិ​បែប​កែច្នៃ និង​ការអភិវឌ្ឍ​ជា​ផ្ទះ​លំហែរ​កាយ​ពី​សំណាក់​វិនិយោគិន​ក្នុងស្រុក ក្រោម​ការ​សម្លឹង​ឃើញ​ពី​សក្ដានុពល​នៃ​តំបន់​ដែលមាន​អំណោយផល​ពី​ធម្មជាតិ ជាពិសេស​ក្រោយពេល​គម្រោង​ស្ថាបនា​ព្រលានយន្ដហោះ​ក្នុង​តំបន់​ដែល​កំពុង​ត្រូវបាន​ចាប់ផ្តើម​សិក្សា​លម្អិត និង​ឈានទៅរក​ដំណើរការ​សាងសង់​នៅក្នុងឆាប់ៗខាងមុខនេះ។

បន្ថែម​ពីនេះ ខេត្ត​មណ្ឌល​គី​រី​ក៏មាន​គម្រោង​អភិវឌ្ឍន៍​ជាច្រើន​ទីតាំង​ទៀត​ក្រោម​ការរៀបចំ និង​គ្រប់គ្រង​ដោយ​ក្រសួងទេសចរណ៍ និង​ក្រសួងបរិស្ថាន សហការ​ជាមួយនឹង​វិស័យ​ឯកជន ដូចជា​គម្រោង​សាងសង់​ទី​ចំណត​យន្ដហោះ​លើទឹក និង​ផែនការ​នៃ​ការបង្កើត​ក្រុង​រណប​បែប​ទាន់សម័យ​ស្ថិតនៅក្នុង​តំបន់​អូ​រាំង​ក្បែរ​ទីតាំង​សាងសង់​ព្រលានយន្តហោះ​ផងដែរ ដើម្បី​អាច​បង្កើន​ភាព​ទាក់ទាញ​លើ​ការវិនិយោគ​ក្នុង​វិស័យ​ទេសចរណ៍​ពាណិជ្ជកម្ម​កម្រិត​ខ្ពស់​នៅ​ថ្ងៃ​អនាគត។

លោក​ឧកញ៉ា​នួន រិទ្ធី អគ្គនាយក​ក្រុមហ៊ុន​អចលនទ្រព្យ Khmer Foundation Appraisal ដែលជា​អ្នក​អភិវឌ្ឍន៍​លំនៅដ្ឋាន និង​តំបន់​កម្សាន្ត​នៅក្នុង​ខេត្ត​មណ្ឌល​គី​រី​បាន​មានប្រសាសន៍ថា គ្រប់​ផែនការ និង​គម្រោង​អភិវឌ្ឍន៍​របស់​រាជរ​ដ្ឋា​ភិ​បាល ដែល​បាន​ដាក់ចេញ​ឱ្យ​អនុវត្ត​រហូតមកដល់​ពេលនេះ ដូចជា​មិនទាន់មាន​គម្រោង​ណាមួយ​ដែល​ធ្វើ​មិនបាន​នោះទេ ផ្ទុយទៅវិញ​គឺមាន​តែ​ការអនុវត្ត​លឿន​និង​បញ្ចប់​មុន​ផែនការ។

លោក​ឧកញ៉ា​បាន​បន្តថា “ក្នុង​យុទ្ធសាស្ត្រ​ចតុកោណ​របស់​សម្ដេច​តេ​ជោ​ហ៊ុន សែន គឺ​តែង​ទទួលបាន​នូវ​ភាពជោគជ័យ ជាមួយ​លទ្ធផល​ផ្លែផ្កា​គួរ​ជាទី​មោទន ស្ទើរ​គ្រប់ផ្នែក ដែល​ក្នុងនោះ​មិន​ថា​ការបង្កើត​ក្រវាត់ក្រុង ការអភិវឌ្ឍ​ហេដ្ឋារចនាសម្ព័ន្ធ​នៅតាម​បណ្តា​ខេត្ត​ក្រុង​នៅ​ទូទាំងប្រទេស ក៏ដូចជា​គម្រោង​អភិវឌ្ឍន៍​សេដ្ឋកិច្ចជាតិ​ផងដែរ” ។

លោក​ឧកញ៉ា​បន្តថា “ជាក់ស្ដែង នៅត្រឹម​ដំណាក់កាល​នាពេលនេះ យើង​ឃើញ​មាន​វិស័យ​ឯកជន​បាន​បណ្តាក់ទុន​យ៉ាង​ស​ន្ឋឹ​ក​សន្ធាប់ ទៅលើ​ការវិនិយោគ​ក្នុង​វិស័យ​ទេសចរណ៍​ដូចជា​ការបង្កើត​តំបន់​កម្សាន្ត ការបង្កើត​ជា​បឹង​ហ្គា​ឡូ​ជាដើម ដើម្បី​ផ្គត់ផ្គង់​តម្រូវការ​ទេសចរ​ដែល​កើនឡើង​យ៉ាងគំហុក​នៅក្នុង​ខេត្ត​មណ្ឌល​គី​រី​មួយ​នេះ ហើយ​ទាំងអស់នេះ​ក៏​ជា​ផ្នែក​មួយ​ស្ថិតនៅក្នុង​ផែនការមេ​របស់​រាជរ​ដ្ឋា​ភិ​បាល​រួចជាស្រេច” ៕

-Video Advertisement -

LEAVE A REPLY

Please enter your comment!
Please enter your name here