ដោយៈ រ៉ាណេត
ភ្នំពេញៈ នៅពេលឆាប់ៗខាងមុខនេះ សភាពាណិជ្ជកម្មកម្ពុជា នឹងដាក់ការិយាល័យតំណាងនៅតាមបណ្តាប្រទេស និងរដ្ឋនានានៅប៉ែកអឺរ៉ុប ជាពិសេសនៅតំបន់ដែលមានសមាគមអ្នកវិនិយោគកម្ពុជា ដែលអាចមានប្រសិទ្ធភាព ក្នុងការទាក់ទាញវិនិយោគិនអន្តរជាតិមកកាន់កម្ពុជាបន្ថែមទៀត។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ឲ្យដឹងក្នុងកិច្ចសម្ភាសន៍ពិសេសកាលពីពេលថ្មីៗនេះថា គម្រោង និងផែនការនៃការដាក់ការិយាល័យតំណាងសភាពាណិជ្ជកម្ម នៅតាមបណ្តាប្រទេស និងរដ្ឋមួយចំនួននៅប៉ែកខាងអឺរ៉ុបគឺមានជាយូរមកហើយ ហើយក៏នឹងត្រៀមដាក់លើកដំបូង នៅក្នុងប្រទេសកាណាដា ព្រោះប្រទេសកាណាដាមានប្រជាជនខ្មែររស់នៅច្រើន។
លោកឧកញ៉ា បានមានប្រសាសន៍បន្តថា “ជាជំហ៊ានដំបូងយើងបង្កើតនៅប្រទេសកាណាដា ហើយនឹងពង្រាយនៅតាមបណ្តារដ្ឋផ្សេងៗទៀត ដែលមានពាណិជ្ជករខ្មែរនៅទីនោះធ្វើជាអ្នកតំណាង” ។ លោកបន្ថែមថា “ក្រោយពីនេះទៀត យើងនឹងដាក់នៅតាមបណ្តាប្រទេសអភិវឌ្ឍន៍ និងប្រទេសដែលមានសេដ្ឋកិច្ចធំៗ ដូចជាសហរដ្ឋអាមេរិក បារាំង និងបណ្តាប្រទេសផ្សេងទៀតដែលស្ថិតនៅអឺរ៉ុប” ។
តាមរយៈគម្រោង និងផែនការនៃការពង្រីកវិសាលភាព របស់សភាពាណិជ្ជកម្មកម្ពុជានេះ ក្រៅពីអាចធ្វើការផ្សព្វផ្សាយពីសក្ដានុពល និងឱកាសវិនិយោគនៅកម្ពុជាទៅកាន់ទីផ្សារអន្តរជាតិ ថែមទាំងមានលទ្ធភាពខ្ពស់ ក្នុងទាក់ទាញវិនិយោគិនអន្តរជាតិ ដែលមានឥទ្ធិពលធំៗមកធ្វើជាដៃគូជាមួយកម្ពុជាយើងបានផងដែរ។
ពាក់ព័ន្ធទៅនឹងការពង្រីកវិសាលភាព និងបង្កើតការិយាល័យ នៅតាមបណ្តាប្រទេស និងរដ្ឋនានានៅប៉ែកអឺរ៉ុបនេះ លោកឧកញ៉ាលឹម ហេង ក៏បានបញ្ជាក់ប្រាប់ផងដែរថា “យើងជឿជាក់ថា នឹងទទួលបានវិនិយោគិនអន្តរជាតិ ចូលមកកាន់កម្ពុជាកាន់តែច្រើន ជាពិសេសបន្ទាប់ពីចាប់ផ្ដើមអនុវត្តន៍ នូវលក្ខខណ្ឌនៃកិច្ចព្រមព្រៀងពាណិជ្ជកម្មសេរីកម្ពុជា-ចិន” ។
លោកបន្តថា គ្រប់ការធ្វើជំនួញរកស៊ីទាំងអស់ សុទ្ធតែក្នុងគោលបំណងទទួលយកផលចំណេញទាំងអស់ ដូច្នេះ ស្ថិតនៅក្រោមកិច្ចព្រមព្រៀងពិសេសមួយនេះ តាមរយៈកម្ពុជានឹងផ្តល់ផលប្រយោជន៍យ៉ាងច្រើន ដល់ពួកគេក្រោមការនាំចេញផលិតផល ពីកម្ពុជាអាចរួចផុតពីរបាំងពន្ធ៕
