ដោយៈ ប៊ី
ភ្នំពេញៈ ឯកសារ ដែលត្រូវបានផ្សព្វផ្សាយជាសាធារណៈនៅតុលាការកាលពីថ្ងៃពុធ បានចោទប្រកាន់ថានាយកប្រតិបត្តិហ្វេសប៊ុកបានច្រានចោលការស្នើសុំផ្លាស់ប្តូរការផ្សាយពាណិជ្ជកម្មរបស់បុគ្គលិក ដើម្បីធ្វើឱ្យវាកាន់តែត្រឹមត្រូវ ព្រោះពួកគេគិតថាការផ្លាស់ប្តូរនេះនឹងប៉ះពាល់ដល់ប្រាក់ចំណូល។ នេះបើយោងតាមការចេញផ្សាយរបស់សារព័ត៌មាន CNBC នៅថ្ងៃទី១៨ ខែកុម្ភៈ ឆ្នាំ២០២១។
ឯកសារទាំងនោះជាផ្នែកមួយនៃបណ្តឹងកំពុងដំណើរការក្តី ដែលដើមឡើយត្រូវបានដាក់ ដោយម្ចាស់អាជីវកម្មខ្នាតតូចក្នុងឆ្នាំ២០១៨។
ពួកគេត្រូវធ្វើការលើ “ចំនួន Reach” របស់ហ្វេសប៊ុក ដែលអនុញ្ញាតឱ្យអ្នកផ្សាយពាណិជ្ជកម្មមើលឃើញចំនួនអ្នកចូលមើល ដោយប៉ាន់ស្មានថា តើមានមនុស្សប៉ុន្មាននាក់នឹងចូលមើល ឬReach ក្នុងយុទ្ធនាការរបស់ខ្លួន ខណៈពេលកំណត់ការដេញថ្លៃ និងថវិកា (Budget) ក្នុងការផ្សព្ធផ្សាយ។ ឯកសារនេះ ត្រូវបានរាយការណ៍ជាលើកដំបូងដោយសារព័ត៌មាន Financial Times ។
យោងតាមពាក្យបណ្តឹង នាយកប្រតិបត្តិជាន់ខ្ពស់របស់ហ្វេសប៊ុកបានដឹងអំពីបញ្ហានេះអស់រយៈពេលជាច្រើនឆ្នាំមកហើយថា មុខងារ “Potential Reach” របស់ខ្លួនត្រូវបានបំប៉ោង និងបំភាន់ ប៉ុន្តែពួកគេមិនបានធ្វើសកម្មភាព និងព្យាយាមលាក់បាំងបញ្ហានោះទេ។
ពាក្យបណ្តឹងបានឱ្យដឹងទៀតថា លោកស្រី Sheryl Sandberg នាយកប្រតិបត្តិប្រចាំការិយាល័យក្រុមហ៊ុនហ្វេកប៊ុក បានទទួលស្គាល់នៅក្នុងអ៊ីមែលកាលឆ្នាំ២០១៧ ថា លោកស្រីបានដឹងអំពីបញ្ហាជាមួយ “Potential Reach” អស់រយៈពេលជាច្រើនឆ្នាំ។
ពាក្យបណ្តឹងបានឱ្យដឹងបន្តថា មុខងារ “Potential Reach” គឺជាការបំភាន់ ពីព្រោះហ្វេសប៊ុបានអះអាងថា ខ្លួនបើប្រាស់ការវាស់វែងលើ ចំនួនអ្នកប្រើប្រាស់ ហើយពិនិត្យគណនីបានល្អបំផុត។
ប៉ុន្តែហ្វេសប៊ុមិនមានចេតនាលុបគណនីស្ទួន ឬក្លែងក្លាយចេញពីការបណ្តាញរបស់ខ្លួននោះទេ។ ពាក្យបណ្តឹងក៏បានអះអាងផងដែរថា នៅដើមឆ្នាំ២០១៨ ការវិភាគតាមហ្វេសប៊ុកបានរកឃើញថា ការដកគណនីស្ទួនចេញ នឹងបណ្តាលឱ្យតួលេខ Reach ធ្លាក់ចុះ១០ភាគរយ៕
