ឧកញ៉ា​ម៉ន សុខា៖ ទិញ​ដីឡូត៍​គឺជា​ការ​សន្សំទ្រព្យ​ដោយ​មិនដឹង​ខ្លួន

0

ដោយៈ រ៉ា​ណេ​ត

ភ្នំពេញៈ ទោះជា​នៅក្នុង​បរិការណ៍ ដែល​កំពុង​ជួប​នាពេល​បច្ចុប្បន្ននេះ ទីផ្សារ​ដីឡូត៍​នៅតាម​តំបន់​ជាយក្រុង និង​ក្បែរ​ទីប្រជុំជន​មួយចំនួន​ជុំវិញ​ក្រុង នៅតែមាន​សកម្មភាព ខណៈដែល​ការទិញ​ឡូត៍ បានផ្តល់​ផលចំណេញ​ទាំង​អតិថិជន ដែលមាន​ចំណូល​មធ្យម ចំណេញ​ទាំង​អ្នកលក់ ចំណេញ​ទាំង​សេដ្ឋកិច្ចជាតិ។

ប្រធាន​សមាគម​អ្នក​អភិវឌ្ឍន៍​ដីឡូត៍​កម្ពុជា ឧកញ៉ា​ម៉ន សុខា បាន​មានប្រសាសន៍​ឲ្យ​ដឹង​កាលពីពេលថ្មីៗថា ទីផ្សារ​ដីឡូត៍​នៅតែមាន​ប្រជាប្រិយភាព ព្រោះ​អ្នកមាន​តម្រូវការ​ដី​សម្រាប់​សាងសង់​លំនៅដ្ឋាន​ជា​កម្មសិទ្ធិ​ផ្ទាល់ខ្លួន នៅមានកម្រិត​ច្រើន ហើយ​ម្ចាស់​អភិវឌ្ឍន៍​គម្រោង​ដីឡូត៍ ក៏បានផ្តល់​ឱកាស​ដល់​អ្នក​ដែលមាន​ចំណូល​តិច ឬ​មធ្យម ដែល​គ្មាន​លទ្ធភាព​ទិញ​ដី ទំហំ​ដោយ​ការបង់​ផ្ដាច់​នោះ អាចធ្វើ​ការទិញ​តាមរយៈ​វិធីសាស្ត្រ​នៃ​ការបង់​រំ​លោះ​ប្រចាំខែ​បាន​យ៉ាង​សុវត្ថិភាព។

- Video Advertisement -

លោក​ឧកញ៉ា​បាន​បន្តថា “មិន​ថា​ពេលនេះ ឬ​បន្ត​ទៅមុខ៥-១០ឆ្នាំ​ទៀត​នោះទេ ទីផ្សារ​ដីឡូត៍ នៅតែមាន​ប្រជាប្រិយភាព​ខ្ពស់ ព្រោះ​អ្នក​ដែលមាន​តម្រូវការ​នៅមានកម្រិត​ច្រើន ហើយ​អ្នក​អភិវឌ្ឍន៍​មិនសូវ​ពិបាក​ក្នុង​ការរក​ទីផ្សារ​នោះទេ” ។ លោក​បន្តថា “លើសពីនេះ តាមរយៈ​ការ​ពុះ​គម្រោង​ដីឡូត៍ លក់​ជូន​ដល់​អ្នកមាន​ចំណូល​តិ និង​ចំណូល​ដែល​ចង់បាន​ដី​កម្មសិទ្ធិ​ស្រប​ច្បា ប់​សម្រាប់​សាងសង់​លំនៅដ្ឋាន​នេះ អ្នក​អភិវឌ្ឍន៍​បាន​សប្បាយចិត្ត​ក្នុងការ​ចូលរួម​ជួយ​លើកកម្ពស់​សង្គម​ផងដែរ” ។

លោក​ម៉ន សុខា បាន​បញ្ជាក់ថា តាម​ការពិត​ទីផ្សារ​ដី​ឡូ​តិ៍​បាន​ចូលរួម​ជួយ​សង្គមជាតិ​ដោយ​ប្រយោល ដែល​មនុស្ស​មួយចំនួន​មើលមិនឃើញ។ គម្រោង​ដីឡូត៍​ស្របច្បាប់ បាន​ជួយ​សម្រួល​ដល់​បងប្អូន​ប្រជាពលរដ្ឋ ដែល​ចំណូល​តិច​គ្មាន​លទ្ធភាព​ទិញ​ដី​ទំហំ​ធំ​ដោយ​ការបង់​ផ្តាច់​រាប់ម៉ឺន​ដុល្លារ ឱ្យមាន​លទ្ធភាព​គ្រប់គ្រាន់ ក្នុង​មាន​ដី​ជា​កម្មសិទ្ធិ​ស្របច្បាប់​សម្រាប់​សាងសង់​លំនៅដ្ឋាន​ស្នាក់ ដោយ​ការលក់​ក្នុងតម្លៃ​ទាប ជួយ​សម្រួល​ដល់​លក្ខខណ្ឌ​នៃ​ការបង់ប្រាក់ ឬ​បង់​រំ​លោះ​ប្រចាំខែ។

លោក​ឧកញ៉ា​ម៉ន សុខា​បាន​បន្តថា “ទោះជា​ពួកគាត់​មិន​ទិញ សម្រាប់​សាងសង់​លំនៅដ្ឋាន ដែលជា​តម្រូវការ​ជាក់ស្ដែង ប៉ុន្តែ​ក្រោយពេល​បង់​រំលស់​អស់ ពួកគាត់​នឹង​សល់​ជា​ទ្រព្យ ប្រៀប​ដូច​គាត់​សន្សំ​ប្រាក់​យ៉ាង​ដូច្នោះ” ។ លោក​បន្ថែមថា “បន្ថែម​ពីនេះ តម្លៃ​ដី​ពីមួយ​ឆ្នាំទៅ​មួយឆ្នាំ​តែងមាន​កំណើន ដូច្នេះ​ពួកគាត់​ក្រៅពី​ជាការ​សន្សំ​ប្រាក់​ថែមទាំង​អាច​ទទួលបាន​ចំណេញ​ថែមទៀត” ៕

-Video Advertisement -

LEAVE A REPLY

Please enter your comment!
Please enter your name here