ដោយ សុខុម
ញូវយ៉កៈ ក្រុមហ៊ុនរីសត និងកាស៊ីណូដំដាប់ខ្ពស់ Las Vegas Sands Corp ដ៏ធំមួយបានលក់ក្នុងតម្លៃ ៦,២៥ពាន់លានដុល្លារ។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី៣ មីនា។
ក្រុមហ៊ុនគ្រប់គ្រងមូលធន Apollo Global Management និងក្រុមហ៊ុនអចលនទ្រព្យ Vici Properties កំពុងចាប់ដៃគូសហការ ដើម្បីទិញយកសណ្ឋាគារប្រណីត និងរីសតកាស៊ីណូ The Venetian Las Vegas ដែលមាន ៧.០០០បន្ទប់ នៅតាមបណ្ដាយកំណាត់មហាវិថី Las Vegas Strip ជិតមជ្ឈមណ្ឌលពិព័រណ៍ និងសន្និបាត Sands Expo and Convention Center។
ក្រុមហ៊ុន Apollo នឹងចេញលុយ ២,២៥ពាន់លានដុល្លារ ទិញយកក្រុមហ៊ុនប្រតិបត្តិការរបស់Venetian ហើយក្រុមហ៊ុន Vici នឹងចំណាយលុយ ៤ពាន់លានដុល្លារ ដើម្បីទិញយកដី និងទ្រព្យសកម្មផ្សេង។
ក្រុមហ៊ុន Apollo និយាយថា ការទិញនេះគឺជាការប្រថុយប្រថានដ៏ធំ ខណៈចំនួនភ្ញៀវទេសចរ និងអាជីវកម្មសន្និបាតនៅឡាសវេហ្គាស បានដាំក្បាលចុះខ្លាំងក្នុងរយៈពេលមួយឆ្នាំកន្លងមកនេះ ដោយសារការឆ្លងរាតត្បាតវីរុសកូវីដ-១៩ ។
ក្រុមហ៊ុននេះបានបន្ថែមទៀតថា “ការវិនិយោគនេះ ក៏ឆ្លុះបញ្ចាំងផងដែរពីការជឿជាក់យ៉ាងមុតមាំរបស់យើងថា សេដ្ឋកិច្ចនៅឡាស វេហ្គាស នឹងងើបឡើងវិញខ្លាំង ខណៈវ៉ាក់សាំងជំរុញឱ្យវិស័យកម្សាន្ដ និងទេសចរណ៍បើកដំណើរឡើងវិញ នៅសហរដ្ឋអាមេរិក និងទូទាំងពិភពលោក” ។
ក្រុមហ៊ុន Las Vegas Sands បានបង្រួមឈ្មោះរបស់ខ្លួនមកនៅត្រឹម Sands ដោយសារត្រូវផ្លាស់ចេញពីក្រុងឡាស វេហ្គាស។ ក្រុមហ៊ុននេះ បានចេញសេចក្តីប្រកាសព័ត៌មានថា ការផ្លាស់ប្តូរនេះគឺ “សប្បាយលាយក្រៀមក្រំ” ហើយនឹងជួយឱ្យខ្លួនងាកមក ផ្តោតលើទីផ្សារ ដែលកំពុងរីកចម្រើនលឿនដូចជាតំបន់អាស៊ីជាដើម។
លោក Robert Goldstein នាយកប្រតិបត្តិនៃក្រុមហ៊ុន Sands បានលើកឡើងថា “Venetian បានផ្លាស់ប្តូរមុខមាត់ នៃការអភិវឌ្ឍកាស៊ីណូនាពេលអនាគត ហើយនឹងពង្រឹងកេរដំណែលរបស់លោក Sheldon Adelson ក្នុងនាមជាបុគ្គលម្នាក់ ក្នុងចំណោមបុគ្គលមានឥទ្ធិពលបំផុត នៅក្នុងប្រវត្តិសាស្ត្រនៃឧស្សាហកម្មល្បែង និងបដិសណ្ឋារកិច្ច។ សណ្ឋាគារប្រណីត និងរីសតកាស៊ីណូ Venetian បានបើកដំណើរការក្នុងឆ្នាំ១៩៩៩ ដែលជួយជំរុញឱ្យ Sands ក្លាយជាក្រុមហ៊ុនកាស៊ីណូធំបំផុតក្នុងពិភពលោក។
សារព័ត៌មានជាច្រើនបានចុះផ្សាយថា កាលពីនៅមានជីវិត លោក Sheldon Adelson ធ្លាប់បានពិចារណាលក់កាស៊ីណូ របស់លោកនៅឡាស វេហ្គាសផងដែរ មុនពេលលោកទទួលមរណភាព នៅថ្ងៃទី១១ ខែមករា ដើមឆ្នាំ២០២១ នេះក្នុងវ័យ៨៧ ឆ្នាំ៕
