ស្ថាប័ន​ជាង១០០ស្នើសុំ​រាជរដ្ឋាភិបាល​ចេញ​វិធានការណ៍ ណែនាំ​គ្រឹះស្ថាន​ហិរញ្ញវត្ថុ និង​ធនាគារ​ផ្អាក​ការបង់​ប្រាក់កម្ចី

0

ដោយៈ រ៉ា​ណេ​ត

ភ្នំពេញៈ តំណាង​សមាគម និង​អង្គការក្រៅរដ្ឋាភិបាល​ស​រុ​ប​ជាង១០០បានចេញ​ថ្លែងការណ៍​រួម និង​ស្នើសុំ​ដល់​រដ្ឋាភិបាល​ចេញ​វិធានការណ៍ ណែនាំ​គ្រឹះស្ថាន​ហិរញ្ញ និង​ធនាគារឯកជន ឱ្យ​ផ្អាក​ការបង់​ប្រាក់កម្ចី​ប្រចាំខែ រួម​នឹង​ការប្រាក់​ពី​កូនបំណុល​ជា​បណ្តោះអាសន្ន​រយៈពេល៣ខែ។

នៅក្នុង​សេចក្ដី​ថ្លែង​ការរួម​របស់​សមាគម និង​អង្គការ​ជាង១០០នៅ​ល្ងាច​ថ្ងៃទី៦ ខែមេសា ឆ្នាំ២០២១កន្លងមក​បានលើកឡើង​ថា យើងខ្ញុំ ជា​ក្រុម​សង្គម​ស៊ីវិល សូម​ស្នើ​សុំឱ្យ​រាជរដ្ឋាភិបាល ដាក់ចេញ​ជា​វិធានការ​ណែនាំ ដល់​គ្រឹះស្ថាន​មីក្រូហិរញ្ញវត្ថុ និង​ធនាគារ​ទាំងអស់​នៅក្នុង​ប្រទេស​កម្ពុជា ដើម្បី​ផ្អាក​ការបង់​សង​ប្រាក់កម្ចី និង​ការប្រាក់​បង្គរ​ទាំងអស់​សម្រាប់​រយៈពេល​យ៉ាងតិច៣ខែ ដើម្បី​ផ្តល់ឱ្យ​អ្នក​ខ្ចីប្រាក់ នូវ​ឱកាស​ក្នុងការ​ស្នាក់​នៅផ្ទះ និង​រក្សា​សុវត្ថិភាព អំឡុងពេល​ផ្ទុះឡើង​នៃ​វីរុស​កូ​វីដ ១៩ ដែល​ពួកគេ​មិនគួរ​ត្រូវ​ភ័យខ្លាច​ក្នុងការ​បាត់បង់​ដីធ្លី ឬ​ផ្ទះសម្បែង ប្រសិនបើ​ពួកគេ​គ្មាន​លទ្ធភាព​សង​ប្រាក់​វិញ​ទេនោះ ។

- Video Advertisement -

សេចក្ដីថ្លែងការណ៍​ដដែល​បាន​បញ្ជាក់ថា “វិស័យ​កាត់ដេរ ទេសចរណ៍ សេវា​កំសាន្ត និង​សំណង់ កំពុង​ត្រូវបាន​រងគ្រោះ​ជាខ្លាំង ពី​ការរីក​រាលដាល​នៃ​ជំងឺ​នេះ។ វិស័យ​ទាំងនេះ ផ្តល់​ការងារ​ដល់​ស្ត្រី​រាប់សែន​នាក់ ខណៈ​អត្រា​នៃ​អ្នក​ខ្ចី​កម្ចី​ខ្នាតតូច គឺមាន​ស្ត្រី​ចំនួន៧៥ភាគរយ មានន័យថា​មាន​ករណី​ជាច្រើន ដែល​វិបត្តិ​ជំងឺ​រីក​រាលដាល​នេះ​ប៉ះពាល់​យ៉ាងខ្លាំង​ចំពោះ​ស្ត្រី​ជា​អ្នក​ខ្ចីប្រាក់” ។

ក្រៅពីនេះ កសិករ ពលករ​ចំណាកស្រុក សហគមន៍​ក្រីក្រ អ្នក​ប្រកបរ​បរសេដ្ឋ​កិច្ច​ក្រៅ​ប្រព័ន្ធ អ្នកធ្វើ​ជំនួញ អាជីវករ និង​អ្នកលក់ដូរ​តាម​ដងផ្លូវ ក៏​ប្រឈម​នឹង​ការធ្លាក់ចុះ​ខ្លាំង​នៃ​ប្រាក់ចំណូល​ផងដែរ។ មាន​មនុស្ស​តិចតួច​ណាស់ ដែល​មិន​ទទួលរង​ផលប៉ះពាល់​ផ្នែក​សេដ្ឋកិច្ច​ពី​ជំងឺ​កូ​វីដ១៩នេះ ។

រាជរដ្ឋាភិបាល​បាន​ចាត់វិធានការ​មួយចំនួន​រួចមកហើយ ដើម្បី​កាត់បន្ថយ​មនុស្ស​មួយចំនួន​ពី​ការ រងគ្រោះ ដែល​បង្កឡើង​ដោយ​វិបត្តិ​សេដ្ឋកិច្ច ជាង​មួយឆ្នាំ​កន្លងមកនេះ។ សាច់ប្រាក់​ដែល​ត្រូវបាន​ផ្តល់ឱ្យ ទៅ​ប្រជាពលរដ្ឋ​ជាច្រើន​ដែលមាន​ប័ណ្ណ​ក្រីក្រ និង​ប្រាក់ឧបត្ថម្ភ​សម្រាប់​ប្រាក់​ឈ្នួល​របស់​កម្មករ កម្មការិនី រោងចក្រ បានផ្តល់​ប្រភព​ដ៏​សំខាន់​មួយ​នៃ​ប្រាក់ចំណូល ដល់​ប្រជាពលរដ្ឋ​រាប់សែន​នាក់ ដែល​ត្រូវការ ជំនួយ។

ប្រសិនបើ​គ្មាន​គោលនយោបាយ​ទាំងនេះ​ទេ ការធ្លាក់ចុះ​នៃ​សេដ្ឋកិច្ច​នៃ​ការរីក​រាលដាល​ជា​សកល​នេះ នឹង​កាន់​តែមាន​ស្ថានភាព​អាក្រក់​ខ្លាំង​ជាង​នេះ។ ប៉ុន្តែ​រាជរដ្ឋាភិបាល​មិនទាន់បាន​ចាត់​វិធានការណ៍ ស្រដៀង​គ្នា​នេះ ដើម្បី​ជួយ​សម្រាល​បន្ទុក​ដល់​អ្ន​ក ខ្ចីប្រាក់​ពី​គ្រឹះស្ថាន​មីក្រូហិរញ្ញវត្ថុ​នៅឡើយ​ទេ។

ការស្នើសុំ​របស់​រាជរ​ដ្ឋា​ភិ​បាល​កាលពី​ឆ្នាំមុន ដើម្បីឱ្យ​គ្រឹះស្ថាន​មីក្រូហិរញ្ញវត្ថុ និង​ធនាគារ អនុវត្ត​ការ​សម្រាល​បន្ទុក ដល់​វិស័យ​ជាក់លាក់​មួយចំនួន ដោយ​គ្មាន​គោលការណ៍​ណែនាំ​ច្បាស់លាស់​ថា តើ​អ្នក​ខ្ចីប្រាក់​ណាខ្លះ ដែលមាន​លក្ខណៈសម្បត្តិ​គ្រប់គ្រាន់ ឬ​ប្រភេទ នៃ​ការជួយ​សម្រាល​បន្ទុក​អ្វី​សម្រាប់​ផ្តល់​នោះ បានអនុញ្ញាត​ឱ្យ​វិស័យ​មីក្រូហិរញ្ញវត្ថុ កំណត់​គោលការណ៍​ខ្លួនឯង​យ៉ាង​មាន​ប្រសិទ្ធភាព ក្នុងការ​រៀបចំ​ឥណទាន​ឡើងវិញ។

នេះ​មានន័យថា ស្ទើរតែ​គ្រប់​ករណី ដែល​យើងខ្ញុំ​បាន​តាមដាន​ធនាគារ និង​គ្រឹះស្ថាន​មីក្រូហិរញ្ញវត្ថុ កំពុងតែ​ផ្អាក​ការបង់ប្រាក់​ដើម ប៉ុន្តែ​នៅតែ​បន្ត​ប្រមូលយក​ការបង់ថ្លៃ​ការប្រាក់ ព្រមទាំង​គណនា​ការប្រាក់​លើ​ឥណទាន​ទាំងនេះ។ ការណ៍​នេះ បាន​នាំឱ្យមាន​កំណត់ត្រា​ប្រាក់ចំណេញ​ខ្ពស់ សម្រាប់​អ្នកផ្តល់​កម្ចី​ឥណទាន​ខ្នាតតូច​មួយចំនួន ខណៈ ដែល​ប្រាក់ចំណូល​នៅក្នុង​គ្រួសារ​បន្ត​ធ្លាក់ចុះ ដោយសារតែ​វិបត្តិ​រីក​រាលដាល​នៃ​ជំងឺ​កូ​វីដ១៩ និង​បន្ទុក​បំណុល​កាន់តែ​ធំ​សម្រាប់​អ្នក​ខ្ចីប្រាក់ បន្ទាប់ពី​បញ្ចប់​ការរៀបចំ​ឥណទាន​ឡើងវិញ។ ការអនុវត្ត​បែបនេះ មិនមែន​ជាការ​សម្រាល​បន្ទុក​ពិតប្រាកដ​នោះទេ ។

ខណៈដែល​ប្រទេស​កម្ពុជា​ពេលនេះ កំពុង​ប្រឈម​នឹង​ការឆ្លង​រីក​រាលដាល​ជា​សហគមន៍ និង​ការទទួល​មរណភាព​ជា​បន្តបន្ទាប់ ដោយសារ​ជំងឺ​កូ​វីដ១៩ ការអនុវត្ត​ក្នុង​ការជួយ​សម្រាល​បន្ទុក​បំណុល បែប​ទូលំទូលាយ​គឺ​ត្រូវការ​ជា​ចាំបាច់។ ការរៀបចំ​ឥណទាន​ឡើងវិញ​មិន​ពេញលេញ សម្រាប់​កម្ចី​ឥណទាន​ខ្នាតតូច​ប្រមាណ១០ភាគរយ ដែល​ត្រូវបាន​រាយការណ៍ ដោយ​វិស័យ​មីក្រូហិរញ្ញវត្ថុ គឺ​មិន​គ្រប់គ្រាន់​ដើម្បី​ដោះស្រាយ​ជាមួយ​ទំហំ​នៃ​វិបត្តិ​នេះ​ទេ។

សេចក្តីថ្លែងការណ៍​បាន​បន្តថា “យើងខ្ញុំ​សូម​ស្នើសុំ​ជាថ្មី​ម្តងទៀត នូវ​សំណើ​ដែល​បាន​ស្នើសុំ​ដំបូង​កាលពី​ជិត​មួយ​ឆ្នាំមុន សូមឱ្យ​ផ្អាក​ការបង់​សង​កម្ចី​ទាំងអស់ រួមទាំង​ប្រាក់​ដើម និង​ការប្រាក់ ក៏ដូចជា ការប្រាក់​បង្គរ (ការប្រាក់​ដែល​ត្រូវបាន​កត់ត្រា​ទុក​និង​ត្រូវ​ទូទាត់​នៅពេល​ក្រោយ​យ៉ាងតិច៣ខែ” ។

ការបន្ត​រីក​រាលដាល​នៃ​ជំងឺ​វីដ១៩ក្នុង “ព្រឹត្តិការណ៍២០ កុម្ភៈ បានអូសបន្លាយ​ពេល​ជាង​មួយខែ​មកហើយ និង​កំពុង​បន្ត​ប៉ះពាល់​យ៉ាងខ្លាំង ដល់​ជីវភាព​រស់នៅ​របស់​ប្រជាពលរដ្ឋ​ជាច្រើន។

សេចក្តីថ្លែងការណ៍​ដដែល​បាន​បន្តថា បញ្ហា​ទាំងនេះ បានក្លាយ​ជាការ​អំពាវនាវ​ជាបន្ទាន់​ពី​ប្រជាពលរដ្ឋ ឬ​ក្រុមមនុស្ស​មកពី​មជ្ឈដ្ឋានផ្សេងៗគ្នា សូមឱ្យ​មានការ​ជួ​យស​ម្រា​ល​បន្ទុក​បំណុល ក៏ដូចជា ការចាត់វិធានការ​ពី​សំណាក់​រាជរដ្ឋាភិបាល។ យុវជន​ចំនួន៦នាក់ ត្រូវបាន​ចាប់ខ្លួន​កាលពីពេល ថ្មីៗនេះ និង​ត្រូវបាន​ឃាត់ខ្លួន​ឆ្លង​យប់​ផងដែរ បន្ទាប់ពី​ចែកចាយ​ញត្តិ​អំពាវនាវ ឱ្យមាន​ការផ្អាក​ការបង់​សង​ប្រាក់ ទៅ​គ្រឹះស្ថាន​មីក្រូហិរញ្ញវត្ថុ និង​ធនាគារ ក៏ដូចជា វិធាន​ការជួយ​សម្រួល​បន្ទុក​សេ​ដ្ធ​កិច្ច​ផ្សេងទៀត។

ខណៈដែល​មនុស្ស​ជាច្រើន ភ័យខ្លាច​បាត់បង់​ដីធ្លី ឬ​ផ្ទះសម្បែង​របស់​ពួកគេ ដោយសារ​ការបង់ប្រាក់​យឺត កម្មវិធី​រៀបចំ​ឥណទាន​តាម​ករ​ណី​ជាក់ស្តែង គឺ​មិន​គ្រប់គ្រាន់​នោះទេ។ សម្ពាធ​បណ្តាលមកពី​កម្ចី​ឥណទាន​ខ្នាតតូច របស់​គ្រឹះស្ថាន​មីក្រូហិរញ្ញវត្ថុ និង​ធនាគារ បាន​កំពុង ធ្វើឱ្យប៉ះពាល់​ដល់​សុខភាព​សាធារណៈ និង​សុវត្ថិភាព​កម្មសិទ្ធិ​ដីធ្លី។

សមាគម និង​អង្គការក្រៅរដ្ឋាភិបាល​ទាំង​នោះបាន​បន្តថា យើងខ្ញុំ​សូម​ស្នើសុំ​យ៉ាងទទូច​ឱ្យ​រាជរដ្ឋាភិបាល ជួយ​ប្រជាពលរដ្ឋ​រាប់លាន​នាក់ ដោយ​ដាក់ចេញ​វិធានការ​ណែនាំ​ឱ្យ​វិស័យ​មីក្រូហិរញ្ញវត្ថុ​ដែល​រកប្រាក់​ចំណេញ ដើម្បី​ជួយ​ទទួលបន្ទុក​សេដ្ឋកិច្ច​ខ្លះ​របស់​អ្នក​ខ្ចីប្រាក់។ អ្នក​ខ្ចីប្រាក់​មួយចំនួន កំពុង​ត្រូវ​បាត់បង់​ដីធ្លី​របស់​ពួកគេ មិន​ទទួលបាន​ការថែទាំ​សុខភាព និង​ប្រឈម​នឹង​ហានិភ័យ​នៃ​សុខភាព និង​សុវត្ថិភាព​របស់​ពួកគេ​អំឡុងពេល​មាន​វិបត្តិ​ជំងឺ​នេះ ដើម្បី​ទុក​លទ្ធភាព​បង់​សងបំណុល​ទាំងនេះ។

សេចក្តីថ្លែងការណ៍​ដដែល​បាន​បញ្ជាក់ថា “ការផ្អាក​ការបង់​សង​ប្រាក់​រយៈពេល៣ខែ ជាមួយ​លក្ខខណ្ឌ​ដែល​អាច​បន្ត​ការ ផ្អាក​នេះ​បន្តទៀត នឹង​ជួយ​អ្នក​ខ្ចីប្រាក់​ឱ្យ​ស្នាក់​នៅផ្ទះ រក្សា​សុវត្ថិភាព និង​ពង្រឹង​ស្ថានភាព​ទូទៅ​នៅក្នុង​ប្រទេស​វិញ” ៕

-Video Advertisement -

LEAVE A REPLY

Please enter your comment!
Please enter your name here