តើ​អ្នកណា​ជា​កំពូល​ស្ថាបត្យករ​ប្រចាំ​ដើម​សតវត្សរ៍​ទី២១ និង​ជា​ជនជាតិ​អ្វី? និង​មាន​ស្នាដៃ​មហស្ចារ្យ​ដូចម្តេច?

0

ដោយ សុខុម

អាមេរិក: អគារ Burj Khalifa  ដែលមាន​កម្ពស់​សរុប​រហូតដល់​ទៅ៨២៩,៨ម៉ែត្រ​នៅក្នុង​ទីក្រុង​ឌូ​បៃ នៃ​ប្រទេស​អារ៉ាប់​រួម​អេ​មី​រ៉ា​ត ក្នុង​តំបន់​មជ្ឈិមបូព៌ា (Middle East) ជា​ស្ថាបត្យកម្ម​ដ៏​កំពូល និង​ល្បី​រន្ទឺ​ដែល​ជាប់​ឈ្មោះ​អគារ​កប់​ពពក​ខ្ពស់បំផុត​ក្នុង​លោក។

ប៉ុន្តែ​អ្នក​ទាំងអស់គ្នា​ប្រហែលជា​មិនបាន​ដឹងថា តើ​កំពូល​ស្ថាបត្យករ​រូប​ណា​ជា​អ្នក​ឌី​ហ្សា​ញ​អគារ​កប់​ពពក​ខ្ពស់បំផុត​ក្នុង​លោក​នេះឡើយ។ អញ្ចឹង​តោះ! មក​ស្គា​ល់ពី​ប្រវត្តិ​របស់​កំពូល​ស្ថាបត្យករ​រូបនោះ​ទាំងអស់គ្នា!

- Video Advertisement -

អគារ​នេះ​ត្រូវបាន​ឌី​ហ្សា​ញ​ឡើង​ដោយ​កំពូល​ស្ថាបត្យករ​ជនជាតិ​អាមេរិក លោក Adrian D. Smith មកពី​ក្រុមហ៊ុន​ស្ថាបត្យកម្ម នគរូបនីយកម្ម និង​វិស្វកម្ម​ពិភពលោក Skidmore, Owings & Merrill (SOM) ដែលមាន​មូលដ្ឋាន​នៅ​សហរដ្ឋអាមេរិក។

*កុមា​រវ័យ និង​ប្រវត្តិ​អប់រំ

លោក Adrian D. Smith បានប្រសូត​នៅ​ថ្ងៃទី១៩ សីហា ឆ្នាំ១៩៤៤ (បច្ចុប្បន្ន​វ័យ៧៧ឆ្នាំ) នៅក្នុង​ទីក្រុង​ឈី​កា​ហ្គោ (Chicago) រដ្ឋ​អ៊ី​លីណ​យ (Illinois) សហរដ្ឋអាមេរិក។ នៅ​អាយុ៤ឆ្នាំ ក្រុមគ្រួសារ​របស់លោក​បាន​ផ្លាស់​ទីលំនៅ​ទៅ​រស់នៅ​រដ្ឋ​កាលីហ្វ័រ​ញ៉ា​ភាគខាងត្បូង ហើយ​លោក​ក៏​ធំ​ដឹងក្ដី​នៅ​ទីនោះ។ ដោយសារតែ​លោក​មាន​និស្ស័យ​ស្រលាញ់​គូររូប​តាំងពី​តូច ម្ដាយ​របស់លោក​ក៏បាន​ជំរុញ​ឱ្យ​លោក​ចាប់យក​ជំនាញ​ផ្នែក​ស្ថាបត្យកម្ម។

លោក Adrian D. Smith បាន​បន្ត​ការសិក្សា​នៅ​សាកលវិទ្យាល័យ Texas A&M University ថ្នាក់​បរិញ្ញាបត្រ​ស្ថាបត្យកម្ម ខណៈពេលដែល​លោក​ចូលរួម​ក្នុង​សមាគមនិស្សិត​យោធា​នៅ​សាកលវិទ្យាល័យ​នេះ។ ទោះជា​យ៉ាងណា លោក​មិនបាន​បញ្ចប់​ការសិក្សា​ត្រឹមត្រូវ​ទេ​នៅពេលនោះ ហើយ​បានចាប់ផ្ដើម​ចូលធ្វើការ​នៅ​ក្រុមហ៊ុន​ស្ថាបត្យកម្ម នគរូបនីយកម្ម និង​វិស្វកម្ម​ពិភពលោក Skidmore, Owings & Merrill (SOM) ក្នុង​ឆ្នាំ១៩៦៧ ។ ក្រោយមក លោក​បានបញ្ចប់​ការសិក្សា​ពី​មហាវិទ្យាល័យ​ស្ថាបត្យកម្ម និង​សិល្បៈ Chicago College of Architecture and Arts នៃ​សាកលវិទ្យាល័យ University of Illinois ក្នុង​ឆ្នាំ១៩៦៩ ។ ក្នុង​ឆ្នាំ២០១៣ លោក​ទទួល​សញ្ញាប័ត្រ​ប​ណ្ឌិ​ត​កិត្តិយស (Honorary Doctorate of Letters) ពី​សាកលវិទ្យាល័យ Texas A&M University ។

*ការចូល​ប្រឡូក​ក្នុង​អាជីព​ការងារ

លោក Adrian D. Smith បាន​ចំណាយពេល​ធ្វើការ​ជាច្រើន​ឆ្នាំ​នៅ​ក្រុមហ៊ុន Skidmore, Owings & Merrill (SOM) ក្នុង​ទីក្រុង​ឈី​កា​ហ្គោ ដោយ​ចាប់ផ្តើម​ក្នុង​ឆ្នាំ១៩៦៧ ហើយ​បានក្លាយ​ដៃគូ​សហការ​ផ្នែក​ឌី​ហ្សា​ញ​ពី​ឆ្នាំ១៩៨០ ដល់​ឆ្នាំ២០០៣ និង​ជា​ដៃគូ​សហការ​ផ្នែក​ផ្ដល់​ប្រឹក្សា​ខាង​ឌី​ហ្សា​ញ​ពី​ឆ្នាំ២០០៣ ដល់​ឆ្នាំ២០០៦ ។ ក្នុង​ឆ្នាំ២០០៦ លោក​បាន​បង្កើត​ក្រុមហ៊ុន​ស្ថាបត្យកម្ម និង​ឌី​ហ្សា​ញ​ខ្នាត​អន្តរជាតិ​មួយ​ដោយ​ដាក់ឈ្មោះថា Adrian Smith + Gordon Gill Architecture (AS+GG)។  ក្នុង​ឆ្នាំ២០០៨ លោក​បាន​រួមគ្នា​បង្កើត​ក្រុមហ៊ុន​មួយទៀត​មាន​ឈ្មោះថា PositivEnergy Practice (PEP) ដែលមាន​ឯកទេស​ខាង​វិស្វកម្ម​បរិស្ថាន នៃ​ស្ថាបត្យកម្ម​សន្សំសំចៃ​ថាមពល​ខ្ពស់។

*ពានរង្វាន់​ដែល​លោក​ទទួលបាន

គម្រោង​នានា​ដែល​លោក Adrian D. Smith ឌី​ហ្សា​ញ បានឈ្នះ​ពានរង្វាន់​រហូតដល់​ទៅ១២៥ ដោយ​ក្នុងនោះ​រួមមាន​ពានរង្វាន់​អន្តរជាតិ​ចំនួន៥ ពានរង្វាន់​ចំនួន៩ពី​វិទ្យាស្ថាន National American Institute of Architects ពានរង្វាន់ State and Chicago AIA Awards ចំនួន៣៥ និង​ពានរង្វាន់ Urban Land Institute Awards for Excellence ចំនួន៣ ។ ស្នាដៃ​របស់លោក​នៅ​ក្រុមហ៊ុន Skidmore, Owings & Merrill (SOM) មាន​យ៉ាងច្រើន​នៅតាម​សារមន្ទីរ​ក្នុង​សហរដ្ឋអាមេរិក អាមេរិក​ខាងត្បូង អឺរ៉ុប អាស៊ី និង​តំបន់​មជ្ឈិមបូព៌ា។ លោក​ក៏​ជា​សមាជិក​ជាន់ខ្ពស់​នៃ​បណ្ដាញ​អ្នកជំនាញ​ឈានមុខ​គេ​ផ្នែក​ឌី​ហ្សា​ញ និង​ការសាងសង់​អន្តរជាតិ​មួយ​ដែលមាន​ឈ្មោះថា Design Futures Council ផងដែរ។

*គម្រោងធំៗទូទាំង​ពិភពលោក​ដែល​លោក​បានបញ្ចប់​ជា​ស្ថាពរ

– សាល​ពិព័រណ៍ Expo 2017  បញ្ចប់​ក្នុង​ឆ្នាំ២០១៧ នៅ​ប្រទេស​កា​ហ្សា​ក់​ស្ថាន

– អគារ Waldorf Astoria Beijing   បញ្ចប់​ក្នុង​ឆ្នាំ២០១៤ នៅ​ប៉េកាំង ប្រទេស​ចិន

– អគារ FKI Tower បញ្ចប់​ក្នុង​ឆ្នាំ២០១៣ នៅ​សេ​អ៊ូ​ល កូរ៉េខាងត្បូង

– ការធ្វើផែនការ​កាត់បន្ថយ​ការបញ្ចេញ​ឧស្ម័ន​កាបូន Chicago Central Area Decarbonization Plan បញ្ចប់​ក្នុង​ឆ្នាំ២០១១ នៅ​ឈី​កា​ហ្គោ សហរដ្ឋអាមេរិក

– អគារ Pearl River Tower បញ្ចប់​ក្នុង​ឆ្នាំ២០១១ នៅ​គ័ង​ចូ​វ ប្រទេស​ចិន

– អគារ​កប់​ពពក Burj Khalifa បញ្ចប់​ក្នុង​ឆ្នាំ២០១០ នៅ​ឌូ​បៃ ប្រទេស​អារ៉ាប់​រួម​អេ​មី​រ៉ា​ត

– អគារ Zifeng Tower  បញ្ចប់​ក្នុង​ឆ្នាំ២០១០ នៅ​ណាន​ជី​ង ប្រទេស​ចិន

– អគារ Trump International Hotel and Tower បញ្ចប់​ក្នុង​ឆ្នាំ២០០៩ នៅ​ឈី​កា​ហ្គោ សហរដ្ឋអាមេរិក

– អគារ Broadgate Tower  បញ្ចប់​ក្នុង​ឆ្នាំ២០០៩ នៅ​ក្រុង​ឡុង​ដ៍ អង់គ្លេស

– អគារ Chemsunny Plaza  បញ្ចប់​ក្នុង​ឆ្នាំ២០០៨ នៅ​ប៉េកាំង ប្រទេស​ចិន

– ថែវ​ឧទ្យាន Jubilee Park Pavilion  បញ្ចប់​ក្នុង​ឆ្នាំ២០០៤ នៅ​ក្រុង​ឡុង​ដ៍ ប្រទេស​អង់គ្លេស

– អគារ Tower Palace III  បញ្ចប់​ក្នុង​ឆ្នាំ២០០៤ នៅ​សេ​អ៊ូ​ល កូរ៉េខាងត្បូង

– អគារ​ទីស្នាក់ការ​កណ្ដាល​ធនាគា​រ​អន្តរជាតិ Canary Wharf បញ្ចប់​ក្នុង​ឆ្នាំ នៅ​ក្រុង​ឡុង​ដ៍ ប្រទេស​អង់គ្លេស

– អគារ 601 Congress Street, Manulife Financial  បញ្ចប់​ក្នុង​ឆ្នាំ២០០៣ នៅ​ប៊ូ​ស្តុ​ន សហរដ្ឋអាមេរិក

– អគារ General Motors Renaissance Center  បញ្ចប់​ក្នុង​ឆ្នាំ២០០៣ នៅ​សហរដ្ឋអាមេរិក

– ការធ្វើ​ផែនការមេ​នៃ​ឧទ្យាន Millennium Park និង Millennium Park បញ្ចប់​ក្នុង​ឆ្នាំ២០០២ នៅ​ឈី​កា​ហ្គោ សហរដ្ឋអាមេរិក

– អគារ Sede do BankBoston  បញ្ចប់​ក្នុង​ឆ្នាំ២០០២ នៅ​ប្រេ​ស៊ី​ល

– អគារ​សាកលវិទ្យាល័យ Washington University Arts and Sciences បញ្ចប់​ក្នុង​ឆ្នាំ២០០០ នៅ​សហរដ្ឋអាមេរិក

– អគារ Jin Mao Tower   បញ្ចប់​ក្នុង​ឆ្នាំ១៩៩៨ នៅ​សៀង​ហៃ ប្រទេស​ចិន

– អគារ​សាកលវិទ្យាល័យ Washington University Psychology បញ្ចប់​ក្នុង​ឆ្នាំ១៩៩៦ នៅ​សហរដ្ឋអាមេរិក

– គម្រោង Summer of New Hope – Warren Blvd Project បញ្ចប់​ក្នុង​ឆ្នាំ១៩៩៦ នៅ​ឈី​កា​ហ្គោ សហរដ្ឋអាមេរិក

– អគារ Aramco Headquarters Office បញ្ចប់​ក្នុង​ឆ្នាំ១៩៩៣ នៅ​ប្រទេស​អា​រ៉ា​ប៊ី​សា​អូឌីត

– អគារ 10 Ludgate Place បញ្ចប់​ក្នុង​ឆ្នាំ១៩៩២ នៅ​ក្រុង​ឡុង​ដ៍ ប្រទេស​អង់គ្លេស

អគារ USG Building (បច្ចុប្បន្ន​ជា​អគារ AT&T Corporate Center) បញ្ចប់​ក្នុង​ឆ្នាំ១៩៩១ នៅ​ឈី​កា​ហ្គោ សហរដ្ឋអាមេរិក

– អគារ NBC Tower  បញ្ចប់​ក្នុង​ឆ្នាំ១៩៨៩ នៅ​ឈី​កា​ហ្គោ សហរដ្ឋអាមេរិក

– អគារ Rowes Wharf  បញ្ចប់​ក្នុង​ឆ្នាំ១៩៨៨ នៅ​ប៊ូ​ស្តុ​ន សហរដ្ឋអាមេរិក

– អគារ Olympia Centre  បញ្ចប់​ក្នុង​ឆ្នាំ១៩៨៦ នៅ​ឈី​កា​ហ្គោ សហរដ្ឋអាមេរិក

– អគារ United Gulf Bank Building  បញ្ចប់​ក្នុង​ឆ្នាំ១៩៨៦ នៅ​ប្រទេស​បា​រ៉ែ​ន

– អគារ Banco de Occidente  បញ្ចប់​ក្នុង​ឆ្នាំ១៩៨០ នៅ​ប្រទេស​ក្វា​តេ​ម៉ា​ឡា៕

-Video Advertisement -

LEAVE A REPLY

Please enter your comment!
Please enter your name here