ដោយៈ ម៉ាណេត
ភ្នំពេញៈ ពហុកីឡដ្ឋានជាតិមរតកតេជោ ត្រូវបានសាងសង់ឡើងដោយឈរលើទស្សនទានបៃតង ដោយលក្ខណៈពិសេសរបស់កីឡដ្ឋានធំនេះ មានច្រកសុវត្ថិភាពច្រើន ដែលអាចរំដោះមនុស្ស៦ម៉ឺននាក់ ក្នុងរយៈតែប៉ុន្មាននាទីប៉ុណ្ណោះ និងមិនចាញ់ពហុកីឡដ្ឋានអន្តរជាតិផ្សេងៗនោះទេ។
ពហុកីឡដ្ឋានជាតិមរតកតេជោ ត្រូវបានបើកការដ្ឋានសាងសង់ដំណាក់កាលទី១ កាលពីថ្ងៃទី១២ ខែមេសា ឆ្នាំ២០១៣ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ពហុកីឡដ្ឋានជាតិមរតកតេជោ គ្រោងចំណាយថវិកាសាងសង់ចន្លោះពី ១០០លាន ទៅ២០០លានដុល្លារអាមេរិក ដែលថវិកាមួយភាគធំ ជាជំនួយឥតសំណងរបស់រដ្ឋាភិបាលចិន។
ពហុកីឡដ្ឋានជាតិមរតកតេជោ ស្ថិតនៅសង្កាត់ព្រែកតាមាក់ ខណ្ឌឬស្សីកែវ រាជធានីភ្នំពេញ។ ពហុកីឡដ្ឋាននេះ មានចម្ងាយ១២គីឡូម៉ែត្រពីវត្តភ្នំ សាងសង់លើផ្ទៃដីទំហំជាង៨៥ហិកតា។
ការសាងសង់ពហុកីឡដ្ឋានជាតិ មរតកតេជោ ត្រូវបានសាងសង់ឡើងដោយឈរលើទស្សនទានបៃតង «Green Sport» ដោយមានសំណង់អគារតែ ៣០ភាគរយប៉ុណ្ណោះ ហើយ៧០ភាគរយជាតំបន់បៃតង មានដូចជាដើមឈើ ស្មៅ និងទឹក… ហើយក៏មានការកាត់បន្ថយប្រើប្រាស់ថាមពលអគ្គិសនី ដោយប្រើប្រាស់បច្ចេកទេសរចនាប្លង់ ដែលមានខ្យល់ចេញចូល និងពន្លឺព្រះអាទិត្យចេញចូលគ្រប់កន្លែង។
ពហុកីឡដ្ឋានធំនេះ ក៏មានសណ្ឋាគារចំនួន៣៤បន្ទប់ ហាងលក់ទំនិញសម្លៀកបំពាក់កីឡា ឧបករណ៍ សម្ភារៈកីឡាគ្រប់ប្រភេទ និងផលិតផលផ្សេងៗ មានបំពាក់កន្លែងកម្សាន្តរបស់កុមារ មានសាលហាត់កីឡាមួយចំនួនក្រោមអគារធំ ហើយលក្ខណៈពិសេសនោះរបស់កីឡដ្ឋានធំនេះ គឺមានច្រកសុវត្ថិភាពច្រើន ដែលអាចរំដោះមនុស្ស៦ម៉ឺននាក់ក្នុងរយៈតែ៧នាទីប៉ុណ្ណោះ។
ពហុកីឡដ្ឋានជាតិមរតកតេជោ គឺជាពហុកីឡដ្ឋានជាតិ ដ៏ទំនើបមួយរបស់កម្ពុជា ដែលសាងសង់ឡើង ដើម្បីត្រៀមធ្វើជាម្ចាស់ផ្ទះនៃការប្រកួតស៊ីហ្គេមនៅឆ្នាំ២០២៣ ។
ជាមួយនេះ លោកវ៉ាត់ ចំរើនរដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បានបញ្ជាក់នៅព្រឹកថ្ងៃទី៦ ខែឧសភា ឆ្នាំ២០២១ថា ពហុកីឡដ្ឋានមរតកតេជោ ត្រូវបានសាងសង់បាន៩៥ភាគរយហើយ ខណៈនៅសល់៥ភាគរយទៀត ក្រុមការងារនឹងបន្តធ្វើឱ្យរួចរាល់ឆាប់ៗនេះ ដើម្បីត្រៀមប្រកួតកីឡាស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។
លោកវ៉ាត់ ចំរើនបានឱ្យដឹងយ៉ាងដូច្នេះថា “សម្តេចពិជ័យសេនាទៀ បាញ់ បានអារម្មណ៍រំភើបរីករាយជាខ្លាំង ដោយសារតែរៀបចំការកសាងកីឡដ្ឋាននេះ (ពហុកីឡដ្ឋានមរតកតេជោបាន៩៥ភាគរយហើយ គឺថានៅសេសសល់រឿងបន្តិចបន្តួចទេ ដែលកំពុងតែបន្ថែម និងកែលម្អតែប៉ុណ្ណោះ កៅអីក៏បានបំពាក់ ស្មៅក៏ឃើញល្អ ប៉ុន្តែ នៅសល់តែបន្តិចបន្តួចទេ ដោយគ្រោងនឹងបញ្ចប់ឆាប់ៗនេះ” ។
លោកបានឱ្យដឹងថា នៅក្នុងអញ្ជើញចូលទស្សនកិច្ច ពហុកីឡដ្ឋានមរតកតេជោនេះដែរ សម្តេចពិជ័យសេនា ទៀ បាញ់ បានវាយតម្លៃខ្ពស់ចំពោះសមិទ្ធផលនេះ ដោយសម្តេចបានលើកឡើងនេះជាសម្បត្តិដ៏មហាសាល និងជាមរតកសម្រាប់កូនខ្មែរជំនាន់ក្រោយទៀត ជាពិសេសគឺយុវជនផងដែរ៕
