ដោយៈសុខុម
សេអ៊ូល: ចៅហ្វាយក្រុង Wonju នៃប្រទេសកូរ៉េខាងត្បូង បានប្រកាសកាលពីថ្ងៃច័ន្ទ ទី១៧ ឧសភា ថា ក្រុងនេះគ្រោងសាងសង់សារមន្ទីរសិល្បៈ សាធារណៈមួយនៅលើអតីតទីតាំងមូលដ្ឋានកងទ័ពសហរដ្ឋអាមេរិក (USFK) ត្រឹមឆ្នាំ២០២៣ ។ នេះបើយោងតាមការចុះផ្សាយរបស់សារព័ត៌មាន The Korea Times ។
លោក Won Chang-mug អភិបាលក្រុងនេះបានលើកឡើងថា គម្រោងអភិវឌ្ឍន៍ក្នុងទំហំទឹកប្រាក់១៣,២លានដុល្លារអាមេរិកនេះ ទើបតែឆ្លងផុតដំណាក់កាលវាយតម្លៃសមិទ្ធលទ្ធភាពដោយក្រសួងវប្បធម៌ កីឡា និងទេសចរណ៍ កាលពីពេលថ្មីៗនេះប៉ុណ្ណោះ។
លោកបញ្ជាក់ថា សារមន្ទីរកម្ពស់៣ជាន់នេះ នឹងត្រូវសាងសង់លើផ្ទៃដី៩,០០០ម៉ែត្រការ៉េលើអតីតទីតាំងមូលដ្ឋានទ័ពអាមេរិក មានឈ្មោះថា Camp Long ដែលស្ថិតនៅចម្ងាយប្រមាណ១៤០គីឡូម៉ែត្រ នាភាគខាងកើតទីក្រុងសេអ៊ូល។ ក្រុងនេះគ្រោងចាប់ផ្តើមការសាងសង់សារមន្ទីរនេះនៅឆ្នាំក្រោយ ហើយបើកសម្ពោធនៅខែមេសា ឆ្នាំ២០២៣ ។
យោធភូមិភាគនៃកងទ័ពសហរដ្ឋអាមេរិក នេះត្រូវបានបង្កើតឡើងក្នុងឆ្នាំ១៩៥៥ ដើម្បីគាំទ្រដល់អង្គភាពទ័ពអាកាស។ ទោះជាយ៉ាងណា មូលដ្ឋាននេះត្រូវបានបិទចោលក្នុងឆ្នាំ២០១០ និងប្រគល់ឱ្យទៅប្រទេសកូរ៉េខាងត្បូង វិញក្នុងឆ្នាំ២០១៩ ។
ពេលសាងសង់បញ្ចប់ជាស្ថាពរ សារមន្ទីរនេះនឹងមានសាលតាំងពិព័រណ៍ បណ្ណាល័យ និងបន្ទប់សិក្ខាសាលា ដែលមានដាក់តាំងស្នាដៃសិល្បៈ នៅក្នុងអតីតមូលដ្ឋានយោធានេះ។
សាលាក្រុងនេះ នឹងពិចារណារៀបចំការតាំងពិព័រណ៍ស្នាដៃសិល្បៈរបស់ USFK តាមរយៈការពិគ្រោះយោបល់ ជាមួយមន្ត្រីធរយោធា និងស្ថានទូតសហរដ្ឋអាមេរិក៕
