តើកត្តាអ្វីខ្លះជំរុញឱ្យខណ្ឌសែនសុខក្លាយជាជម្រើសទី១សម្រាប់គម្រោងអភិវឌ្ឍន៍លំនៅដ្ឋានផ្ទាល់ដី?

0

ដោយៈ ប៊ី

ភ្នំពេញៈ ខណ្ឌសែនសុខត្រូវបានមើលមានសន្ទុះលើតម្រូវការអចលនទ្រព្យយ៉ាងឆាប់រហ័ស ពិសេសអភិវឌ្ឍលើវិស័យបុរីលំនៅដ្ឋាន ហើយលក្ខណៈភូមិសាស្ត្រពិសេស នៅក្នុងខណ្ឌនេះជំរុញឱ្យតំបន់ក្លាយជម្រើសទី១សម្រាប់ការអភិវឌ្ឍន៍លំនៅដ្ឋាន។

យោងតាមរបាយការណ៍របស់ក្រុមហ៊ុន CBRE Cambodia ចេញផ្សាយកាលពីថ្មីៗនេះបានឱ្យដឹងថា ខ័ណ្ឌសែនសុខ នៅតែជាជម្រើសទី១ សម្រាប់គម្រោងអភិវឌ្ឍលំនៅដ្ឋានផ្ទាល់ដីជាច្រើន ដោយសារតែផ្ទៃរៀបស្មើដ៏ធំទូលាយរបស់ខ័ណ្ឌមួយនេះ ការរីកចម្រើននូវបណ្ដាញផ្លូវថ្នល់ និងការកើនឡើងវត្តមានស្ថាប័ន សម្រាប់បម្រើឱ្យវិស័យពាណិជ្ជកម្ម ដែលជម្រុញឱ្យមានចលនាសកម្មភាពសេដ្ឋកិច្ច និងសង្គមនៅក្នុងតំបន់។

- Video Advertisement -

ខ័ណ្ឌច្បារអំពៅ ដែលស្ថិតនៅម្ខាងទៀតនៃទីក្រុងភ្នំពេញ ឈរនៅលេខរៀងឆ្ងាយទី២ សម្រាប់ការផ្គត់ផ្គង់គេហដ្ឋាននាពេលបច្ចុប្បន្ន។ ខ័ណ្ឌដែលមានលក្ខណៈជ្រោយកោះមួយនេះ ជាទិសដៅប្រកបដោយភាពពេញនិយម សម្រាប់អ្នកអភិវឌ្ឍបុរី។ ទោះបីជាយ៉ាងណាក៏ដោយ ខ័ណ្ឌដង្កោរ នឹងវ៉ាដាច់ខ័ណ្ឌច្បារអំពៅ សម្រាប់ការផ្គត់ផ្គង់លំនៅដ្ឋាន បើសិនជារាល់គម្រោង ដែលត្រូវបានចុះបញ្ជីរទាំងអស់ក្នុងខ័ណ្ឌមួយនេះ ត្រូវបានបញ្ចប់។

លោកស្រី តាំង ហួរនាយិកាក្រុមហ៊ុនអចលនទ្រព្យ AMATAK Property Service បានថ្លែងប្រាប់ថា បច្ចុប្បន្នខណ្ឌសែនសុខ បានប្រែក្លាយជាតំបន់ពាណិជ្ជកម្មកម្រិតខ្ពស់រួចទៅហើយ ព្រោះតំបន់នេះបានបំពេញ ទៅដោយគម្រោងបុរីលំនៅដ្ឋានធំៗ ក៏ដូចជាបណ្តុំលំនៅដ្ឋានកម្រិតខ្ពស់ រួមជាមួយវត្តមាននៃអគារខ្ពស់ៗ ដែលបម្រើឱ្យវិស័យពាណិជ្ជកម្ម។

លោកស្រីបញ្ជាក់ថា “កាលពីមុនតំបន់ខណ្ឌសែនសុខ សម្បូរទៅនឹងការវិនិយោគលើគម្រោងលំនៅដ្ឋានកម្រិតមធ្យម និងក្រោមមធ្យម ប៉ុន្តែឥលូវខុសពីមុន”។

លោកស្រីបានបន្តថា “ការវិនិយោគលើគម្រោងលំនៅដ្ឋានកម្រិតមធ្យមនៅតំបន់នេះ លែងមានទៀតហើយ ប៉ុន្តែសម្រាប់គម្រោងមជ្ឈមណ្ឌល ពាណិជ្ជកម្មគឺនៅមានឱកាស ជាពិសេសវិស័យខុនដូកម្រិតមធ្យម ដោយសារតែតម្លៃដីនៅតំបន់ខណ្ឌនេះ បានឡើងខ្ពស់ផុតពីកម្រិតនៃការអភិវឌ្ឍវិស័យលំនៅដ្ឋានកម្រិតទាប ឬក្រោមមធ្យមនោះទៀតហើយ”។

ទិន្នន័យដែលចេញផ្សាយដោយក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ទុនវិនិយោគវិស័យសំណង់នៅកម្ពុជាក្នុងឆមាសទី១ ឆ្នាំ ២០២០ នេះមានតម្លៃជាង៣,៨៤ពាន់លានដុល្លារ កើនឡើង១៣,២៦ ភាគរយ ធៀបនឹងឆមាសទី១ ឆ្នាំមុន។ នៅក្នុងឆមាសទី១ ឆ្នាំនេះការស្នើសុំគម្រោងវិនិយោគលើវិស័យសំណង់មានចំនួន២ ៥២២គម្រោង កើនឡើង៤៧៥ ធៀបនឹងឆមាសទី ១ ឆ្នាំមុនមានចំនួន២ ០៤៧គម្រោង៕

LEAVE A REPLY

Please enter your comment!
Please enter your name here