តំបន់ជុំវិញព្រលានយន្តហោះថ្មីកាន់តែរីកចម្រើនជាមួយនឹងកំនើនជីវភាពរបស់ប្រជាពលរដ្ឋមូលដ្ឋាន

0

ដោយៈគង់ សូរិយា

ភ្នំពេញៈ តំបន់ជុំវិញព្រលានយន្តហោះថ្មី ស្ថិតក្នុងរង្វង់ប្រមាណ១០គីឡូម៉ែត្របាននិងកំពុងទាក់ទាញការវិនិយោគលើផ្នែកដីធ្លី ជាមួយនឹងសកម្មភាពអភិវឌ្ឍន៍គំរោងលំនៅដ្ឋាន ដីឡូត៍ និងមជ្ឈមណ្ឌលពាណិជ្ជកម្ម។

ស្រុកកណ្តាលស្ទឹង ស្រុកស្អាង ក្រុងតាខ្មៅ នៃខេត្តកណ្តាល ស្រុកបាទី ក្នុងខេត្តតាកែវ ប្រជាជនក្នុងមូលដ្ឋានខាងលើសុទ្ឋតែរីកមុខមាត់ សាងសង់ផ្ទះធំៗព្រោងព្រាត ដោយសារការកើនឡើងតម្លៃដីធ្លីរបស់ខ្លួន ហើយពួកគាត់បានលក់យកមកសាងសង់ផ្ទះ និងពង្រីកមុខរបររបស់ពួកគេ។

- Video Advertisement -

តាមរយៈការចុះសង្កេតផ្ទាល់ របស់ថ្នាក់ដឹកនាំគេហទំព័រ Propertyarea.asia កាលពីថ្ងៃទី៩ មិថុនាកន្លងមកនេះបានសង្កេតឃើញថា ជីវភាពរបស់ប្រជាពលរដ្ឋនៅជុំវិញព្រ​លានយន្តហោះអន្តរជាតិភ្នំពេញថ្មីប្រមាណ៩០ភាគរយ មានភាពល្អប្រសើរឡើង បើធៀ​បនឹងមុនពេលគំរោង ព្រលានយន្តហោះអន្តរជាតិភ្នំពេញថ្មីប្រកាសសាងសង់ ដែលដីនៅតំបន់នោះ ជាដីស្រែ ជាដីបឹងមានតម្លៃត្រឹម៥០០០ ទៅ១០០០០ដុល្លារក្នុងមួយហិកតា ប៉ុន្តែបច្ចុប្បន្នតម្លៃដីបានកើនឡើងដល់៣០ម៉ឺន ទៅ១លានដុល្លារក្នុងមួយហិកតា អាស្រ័​យលើតំបន់ និងមូលដ្ឋានភូមិសាស្រ្តនិមួយៗ។

មន្រ្តីមូលដ្ឋានបានបង្ហើបឲ្យដឹងថា បើទោះបីតម្លៃកើនឡើងខ្ពស់ក្តី ប៉ុន្តែបច្ចុប្បន្ននេះ ប្រជាពលរដ្ឋនៅមូលដ្ឋានភាគច្រើន លែងមានដីនៅសល់ច្រើនទៀតហើយ ព្រោះទាំងបឹង និងដីទំនេរនានានៅជុំវិញព្រលានយន្តហោះថ្មី សុទ្ឋតែជាដីរបស់អ្នកមានអំណាច អ្នកមាន​ឥទ្ឋិពលដូចជាអ្នកឧកញ៉ា លោកឧកញ៉ា និងឈ្មួញធំៗអស់ទៅហើយ។

លោកសន សៀប ស្ថាបនិកនិងជានាយកប្រតិបត្តិក្រុមហ៊ុន Key Real Estateបានមានប្រសាសន៍ឲ្យដឹងកាលពីពេលថ្មីៗនេះថា ទោះបីមានបញ្ហាវិបត្តិកូវីដ១៩ក្តី ប៉ុន្តែសកម្ម ភាពនៃការទិញលក់ដីធ្លី សកម្មភាពនៃការអភិវឌ្ឍន៍ និងតម្លៃដីធ្លីនៅតាមតំបន់ក្រវ៉ាត់ក្រុងទី៣ តំបន់ជុំវិញព្រលានយន្តហោះថ្មី បានកើនឡើងខ្ពស់ ទាំងសកម្មភាពទិញលក់ និងតម្លៃក៏បានកើនឡើងផងដែរ។

លោកបន្តថា “តម្លៃដីនៅតែកើនឡើងក្នុងឆ្នាំ២០២១នេះ ទោះបីជាមានវិបត្តិកូវីដ១៩ក្តី ប៉ុន្តែតំបន់ដែលតម្លៃដីកើនឡើងមានចំនួនតិចតួចប៉ុណ្ណោះ”។

ជាមួយគ្នានេះ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងកាលពីសប្តាហ៍មុនថា សកម្មភាពទិញលក់ដីធ្លីបានកើនខ្ពស់ឡើងវិញហើយ ប៉ុន្តែភាគច្រើនកើតមានតែនៅក្នុងខេត្តកំពង់ស្ពឺ និងខេត្តកណ្តាលភាគច្រើនជាងគេ៕

LEAVE A REPLY

Please enter your comment!
Please enter your name here