ដោយៈសុជាតា
ភ្នំពេញៈ អ្នកជំនាញខាងដីធ្លីបានលើកឡើងថា នៅប្រាំឆ្នាំខាងមុខនេះ វិស័យអចលនទ្រព្យនៅបណ្តោយផ្លូវជាតិលេខ១ ឆ្ពោះទៅអ្នកលឿង ខេត្តព្រៃវែង នឹងក្លាយជាទីក្រុងស៊ីវិល័យ បន្ទាប់ខណ្ឌដូនពេញ និង ខណ្ឌបឹងកេងកង។
តំបន់ខាងត្បូង ឈៀងខាងកើតរាជធានីភ្នំពេញ គឺតំបន់ដីសណ្តរទន្លេមេគង្គ និង ទន្លេបាសាក់ ដែលជាដីមានដង្ហើមទឹក សម្រាប់គម្រោងអភិវឌ្ឍន៍ធំៗនានា ជាអ្វីដែលអ្នកជំនាញកំពុងមើលឃើញ។
លោកឧកញ៉ានួន រឹទ្ធី អគ្គនាយកក្រុមហ៊ុនអចលនទ្រព្យKFA បានប្រាប់ Property Area asia នៅថ្ងៃទី ៦ ខែកញ្ញា ថា តម្លៃបានកើនឡើងឥតឈប់ឈរ ដោយបែងចែកតំបន់មួយចំនួន គឺចាប់គល់ស្ពានច្បារអំពៅមាត់ទន្លេ រហូតដល់ កោះនរា ចាប់ពី១០០០ ដុល្លារទៅ ១៥០០ ដុល្លារក្នុងមួយម៉ែត្រការ៉េ ។ ចំណែកតម្លៃដីនៅផ្លូវតូចៗ មានតម្លៃដីចាប់ពី៤០០ ដុល្លារទៅ៧០០ដុល្លារ ប៉ុន្តែសម្រាប់ដីតូច២០០០ដុល្លារ ទៅ២៥០០ដុល្លារ ក្នុងមួយម៉ែត្រការ៉េសម្រាប់ Shop lot និង Commercial land។
ចំណែកឯតម្លៃដីចាប់តំបន់កៀនស្វាយដល់ Prine manor គឺ250 ដុល្លារ ទៅដល់ ៥០០ ដុល្លារ។ .ចំណែកចាប់ពីក្រវាត់ក្រុងទីបី ទៅតំបន់កំពង់ផែ តម្លៃតំបន់នេះគឺ ចាប់ពី ១០០ ទៅ១៥០ ដុល្លារក្នុងមួយម៉ែត្រការ៉េ។ តម្លៃដីកំពង់ផែ ទៅដល់គគីរធំ គឺចាប់ផ្តើមតម្លៃដីគឺចាប់៨០ ដុល្លារ ទៅ១២០ ដុល្លារ ក្នុងមួយម៉ែត្រការ៉េ តម្លៃដីចាប់ពីគគីរធំ ដល់អ្នកលឿងគឺតម្លៃចាប់ពី៤០ ទៅ៦០ ដុល្លារក្នុងមួយម៉ែត្រការ៉េ សំរាប់តំបន់ស្ថិតនៅជាប់ផ្លូវជាតិលេខ១។
ជាមួយគ្នានេះលោកឌឹត ចណ្ណាអគ្គនាយកក្រុមហ៊ុន lucky Real Estate បានប្រាប់Property Area Asia ថា គម្រោងធំៗ ដូចជា គម្រោងអភិវឌ្ឍន៍ទីក្រុងកោះនរា តាមរយៈការតភ្ជាប់ស្ពានពីតំបន់អភិវឌ្ឍកោះពេជ្រ ទៅកាន់កោះនរា និងគម្រោងអភិវឌ្ឍន៍ធំៗជាច្រើនបាន និងកំពុងធ្វើឱ្យតម្លៃអចលទ្រព្យ នៅតាមបណ្តោយផ្លូវជាតិលេខ១ ឬតំបន់ច្បារអំពៅបានកើនឡើងខ្លាំងក្នុងរយៈពេលចុងក្រោយនេះ។
លោកបានថ្លែងបន្តថា គម្រោងមួយចំនួន ដែលកំពុងសាងសង់ មានដូចជា គម្រោងផ្សារទំនើប បុរីប៉េងហូត គម្រោងលំនៅដ្ឋាន Palm ដែលគម្រោងនេះ នៅតែរក្សាកំណើនទិញលក់ខ្លាំង៕
