ដោយៈស៊ីវ ម៉េង
ភ្នំពេញៈ ប្លង់ស្ថាបត្យកម្មអគារកប់ពពក ដែលនឹងសាងសង់លើទីក្រុងកោះនរាបានបង្ហាញរូបរាងពិតហើយ តាមរយៈការបង្ហើបឲ្យដឹងពីថ្នាក់ដឹកនាំជាន់ខ្ពស់ នៃក្រុមហ៊ុន OCIC។
អគារកប់ពពក ដែលជាមជ្ឈមណ្ឌលពាណិជ្ជកម្មលំដាប់អន្តរជាតិនេះ គ្រោងសាងសង់តាំងពីខែមិថុនា កន្លងមកនេះ ប៉ុន្តែអ្វីៗត្រូវបានពន្យាពេល ដោយសារការរាតត្បាតជំងឺកូវីដ១៩។
អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍ឲ្យដឹងតាមទូរស័ព្ទកាលពីរសៀលថ្ងៃទី១៤ កញ្ញាកន្លងមកថា អាគារកប់ពពកនេះ ជាគម្រោងអស្ចា រ្យមួយ បើធៀបនឹងគំរោងអគារកំពស់៥៥៥ម៉ែត្រ ដែលគ្រោងសាងសង់នៅលើទីក្រុងកោះពេជ្រ។
លោកបន្តថា អគារដ៏ខ្ពស់នេះ នឹងអាចពន្យាពេលសាងសង់បន្ថែមទៀត ដោយសារវិបត្តិសេដ្ឋកិច្ចសកល ដែលបណ្តាលមកពីជំងឺកូវីដ១៩”។
ទោះជាយ៉ាងណាលោកសំណាង មិនទាន់បង្ហើបពីគំរោងនេះមានកំពស់ប៉ុន្មានជាន់ និងស្មើនឹងប៉ុន្មានរយម៉ែត្រនៅឡើយទេ និងចំណាយទឹកប្រាក់ប៉ុន្មានរយឬពាន់លានដុល្លារនោះទេ គ្រាន់តែប្រាប់ថាវាខ្ពស់ និងជាស្ថាបត្យកម្មដ៏អស្ចារ្យមួយ។
លោកបន្តថា អគារនេះ នឹងសាងសង់នៅក្បែរ ស្ពានឆ្លងពីទីក្រុងកោះពេជ្រ ទៅកាន់ទីក្រុងកផះនរា ពោលគឺស្ថិតនៅតំបន់ប្រជុំក្បាលកោះ នៃគម្រោងទីក្រុងរណបកោះនរា។ គំរោងនេះនឹងក្លាយជា Land Mark ថ្មីមួយនៃទីក្រុងភ្នំពេញ ដែលជាមោទនភាពរបស់ប្រជាពលរដ្ឋកម្ពុជា។
ទីក្រុងកោះនរា មានទំហំផ្ទៃដី១២៥ហិកតា ដែលបច្ចុប្បន្នកំពុងចាក់បំពេញដោយខ្សាច់និងថ្ម។ ទីក្រុងរណបថ្មីនេះ ស្ថិតនៅក្នុងខ័៍ណ្ឌច្បារអំពៅ ជាខ័ណ្ឌថ្មីមួយនៃរាជធានីភ្នំពេញ ដែលមានការរីកចម្រើនយ៉ាងឆាប់រហ័ស៕
