ដោយៈ គង់ សិរីជេស៊ីកា
ភ្នំពេញ/កណ្តាលៈ អ្នកវិនិយោគក្នុងស្រុកធំៗជាច្រើន បានចាប់ផ្តើមមានភាពសុទិដ្ឋិនិយមឡើងវិញ ដោយបានបោះទុនវិនិយោគសាងសង់បុរីធំៗ តម្លៃរាប់លានដុល្លារអាមេរិកនៅតាមតំបន់ផ្លូវជាតិសំខាន់ៗ ដែលកៀកនឹងក្រុងភ្នំពេញ។
បុរីដែលសាងសង់ទាំងនោះ រូមមានបុរី Mekong City ស្ថិតនៅលើផ្លូវជាតិលេខ៦អា ដែលវិនិយោគដោយលោកឧកញ៉ាជាម ឃុនណាត និងចូលរួមជាអធិបតីភាពដោយលោកបណ្ឌិតហ៊ុន ម៉ាណែតអគ្គមេបញ្ជាការកងទ័ពជើងកោក។
បុរី Hi Tech នឹងបើកសម្ភោធគំរោងរបស់ខ្លន នៅក្នុងឃុំជ្រោយអំពិល ស្រុកកៀនស្វាយ លើផ្ទៃដី១២ហិកតា ដែលបុរីនេះ នឹងបើកការដ្ឋានសាងសង់នៅថ្ងៃទី៥ ធ្នូខាងមុខនេះ។
បុរីភ្នំពេញថ្មី ម្ចាស់បុរីនេះបានពង្រីកការវិនិយោគ ទៅកាន់ជាយរាជធានីភ្នំពេញ គឺឆ្ពោះទៅកាន់ក្រុងតាខ្មៅ ខេត្តកណ្តាល។ បុរីនេះបានបើកការដ្ឋានសាងសង់កាលពីពេលថ្មីៗនេះ។
បុរីវិមានសំណាង ជាបុរីមួយស្ថិតនៅភាគខាងជើងរាជធានីភ្នំពេញ ដែលមានទីតាំងជាប់នឹងមហាវិថីហាណូយ តភ្ជាប់ទៅកាន់ផ្លូវជាតិលេខ៥។ បុរីនេះវិនិយោគដោយលោកឧកញ៉ាគីម ហ៊ាង និងលោកជំទាវឧកញ៉ាគង់ សំណាង។
បុរីវិមានសំណាង នឹងបើកការដ្ឋានសាងសង់ និងដំណើរការលក់ជាផ្លូវការនៅដើមឆ្នាំ២០២២ឋខាងមុខនេះ។
អ្នកឧកញ៉ាលី ហួរប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានមានប្រសាសន៍ថា សមាជិកសមាគមសុទ្ឋតែជាជើងខ្លាំង នៅក្នុងការវិនិយោគបុរីនៅកម្ពុជា ដោយបច្ចុប្បន្ននេះ បុរីជាច្រើនបានបង្ហាញវត្តមាន និងចាប់ផ្តើមសាងសង់នៅក្រុងភ្នំពេញ និងតំបន់ជាយក្រុងភ្នំពេញ។
អ្នកឧកញ៉ាបានបន្តថា “អតិថិជនទិញបុរី មានទាំងអ្នកចាស់ និងអ្នកថ្មី ដែលភាគច្រើនពួកគេទិញទុកសម្រាប់កូនរបស់ពួកគេ ក្រោយពេលរៀបការ ហើយត្រូវបែកចេញពីគ្រួសារ”៕
