ដោយ : គង់ សូរិយា
ភ្នំពេញ : ប្រៃសណីយ៍កម្ពុជាបានបង្កើត និងដាក់ឲ្យប្រើប្រាស់បច្ចេកវិទ្យាហិរញ្ញវត្ថុប្រៃសណីយ៍ ដែលមានឈ្មោះថា Post Transfer ដែលផ្តោតសំខាន់ទៅលើផ្តល់សេវា ផ្ញើលុយក្នុងស្រុក និងក្រៅប្រទេសព្រមទាំងការទូទាត់ផ្សេងៗ។
ប្រតិភូរាជរដ្ឋាភិបាល ទទួលបន្ទុកជាអគ្គនាយកប្រៃសណីយកម្ពុជា លោក អោក បូរ៉ា បានមានប្រសាសន៍ ក្នុងពិធីសម្ពោធដាក់ឲ្យប្រើប្រាស់ សេវាប៉ុស្តិ៍ផ្ទេប្រាក់ ដំណើរការនៅលើ App នេះថា ជាមួយនឹង post transfer នេះកាលពីព្រឹកថ្ងៃទី៨ មិថុនាកន្លងមកថា App នេះនឹងជួយបង្កលក្ខណៈសម្បត្តិ ឲ្យប្រៃសណីយ៍បានពង្រីកសក្តានុពលនៅក្នុងប្រទេស ក្នុងការពង្រីកភ្នាក់ងារផ្ទេរប្រាក់ អ្នកប្រើប្រាស់សេវាដោយផ្ទាល់ ហើយកាត់បន្ថយក្នុងការប្រើប្រាស់ឯកសារ ជាតម្រូវការបញ្ជាក់អត្តសញ្ញាណ គឺបញ្ជាក់តែម្តងនៅពេលចុះឈ្មោះ ហើយប្រើបានរហូត។
Post Transfer នេះជាសេវាថ្មីបំផុត ដែលបានអភិវឌ្ឍន៍កែលម្អឲ្យកាន់តែប្រសើរឡើងថែមទៀតដោយ UPU បានបង្កើតឡើងទៅជា App សម្រាប់ប្រើបាននៅគ្រប់ទំរង់នៃទូរស័ព្ទវ័យឆ្លាត និងកំព្យូទ័រ ដែលបានចុះបញ្ជីដោយ UPU នៅឆ្នាំ២០១៧។ ក្នុងនោះ ប្រៃសណីយ៍កម្ពុជា បានចុះកិច្ចព្រមព្រៀងរួចហើយ ក្នុងការប្រើប្រាស់និម្មិតសញ្ញា PosTransfer trademark ជាអន្តរជាតិសម្រាប់វិស័យប្រៃសណីយ៍។
បច្ចុប្បន្នេះ UPU និង PosTranfer Group កំពុងរៀបចំផែនការយុទ្ធសាស្ត្រ និងជម្រុញឲ្យប្រើប្រាស់សេវាផ្ទេរប្រាក់ ឆ្លងប្រទេសឲ្យកាន់តែទូលំទូលាយ ដើម្បីឆ្លើយទៅនឹង សេដ្ឋកិច្ចសាកល ដែលមានចលនាពលករចំណាកស្រុកច្រើន អន្តោប្រវេសន្តធ្វើការនៅក្រៅប្រទេស ក៏ដូចជាកំណើនទេសចរបំលាស់ទី គ្រប់ទីកន្លែង ហើយពួកគេអាចផ្ទេរប្រាក់កំរិតប្រើប្រាស់ក្នុងគ្រួសារ ដែលមានកម្រៃសេវាទាប ប្រកបដោយសុវត្ថិភាព និងតម្លាភាព។
រដ្ឋលេខាធិកាក្រសួងប្រៃសណីយ៍ និងទូរគមនាគមន៍ លោកសារ៉ាក់ ខាន់បានមានប្រសាសន៍ថា ដើម្បីកែលម្អគុណភាពសេវារបស់ស្ថាប័នសាធារណៈ ប្រកបដោយភាពជឿជាក់ រហ័ស ធ្វើសេវាខ្លួនឯង ផាត់ចោល ការចំណាយពេលវេលា និងមធ្យោបាយធ្វើដំណើទៅបង់ថ្លៃសេវា អគ្គីសនី ទឹក ពន្ធការបង់ថ្លៃសិក្សា ដែលឆ្លើយតបទៅនឹងតម្រូវការនៃការផ្តល់កាតព្វសេវាប្រៃសណីយ៍សកល របស់ UPU ។
លោកជម្រុញ និងលើកទឹកចិត្ត ដល់ស្ថាប័នសាធារណៈមាន ដូចជា អគ្គីសនីកម្ពុជា រដ្ឋករទឹក អាជ្ញាធរអប្សារាពិចារណាក្នុងការប្រើប្រាស់សេវា Post Transfer ចាប់ផ្តើមពិភាក្សាជាមួយប្រៃសណីយ៍កម្ពុជា លើការទូរទាត់វិក្ក័យបត្រ អគ្គីសនីប្រើប្រាស់ទឹក របស់ប្រជាពលរដ្ឋយើង លក់សំបុត្រជូនភ្ញៀវទេសចរណ៍ ព្រោះបច្ចេកវិទ្យាថ្មីមួយនេះអាចជួយកាត់បន្ថយថ្លៃដើម របស់ស្ថាប័នខាងនេះ ដូចជា មិនចាំបាច់បោះពុម្ពវិក្កយបត្រ មិនចាំបាច់ចំណាយលើអ្នកចែកវិក្កយបត្រដល់ផ្ទះអ្នកប្រើប្រាស់ និងមិនបាច់បង់ថ្លៃសេវាប្រមូល ឬទទួលលុយពីអតិថជន និងក៏ជួយផាត់ការចំណាយផ្សេងៗ របស់អតិថិជនទៅលើមធ្យោបាយបង់ថ្លៃ ប្រើប្រាស់សេវាកម្ម ដោយគ្រាន់តែស្ថាប័នខាងលើ ផ្តល់ការងារនេះមកឲ្យប្រៃសណីយ៍កម្ពុជាជាអ្នកចែកវិក្កយបត្រ និងប្រមូលចំណូលជូនវិញ៕
