ដោយវុត្ថា
ភ្នំពេញៈ ភាពស្រមើស្រមៃរបស់ស្ថាបត្យករ បានជំរុញឱ្យពួកគេមានគំនិតច្នៃប្រឌិតក្នុងការគូរប្លង់អគារប្រកបដោយភាពទាក់ទាញ និងជា Landmark ព្រមទាំងជានិមិត្តរូបនៃប្រទេសណាមួយ ក្នុងការទាក់ទាញទេសចរណ៍ និងវិនិយោគមកពីគ្រប់ទិសទីឱ្យចាប់អារម្មណ៍។
គេហទំព័រPropertyarea.asia សូមលើកយកស្ថាបត្យកម្មសំណង់ នៃទីក្រុង Panama របស់ប្រទេសPanama ដែលបាននឹងកំពុងមានភាពទាក់ទាញ ចំពោះរចនាប្លង់របស់ស្ថាបត្យករ គឺអគារF&F ដែលមានរូបរាងវិលជារង្វង់។
យោងតាមការផ្សព្វផ្សាយរបស់សារព័ត៌មាននានា បានបង្ហាញថា អគារ F&F ដែលកាលពីមុន ត្រូវបានគេស្គាល់ថាអគារRevolution Tower គឺជាអគារការិយាល័យដ៏ទាក់ទាញមួយរបស់ទីក្រុង Panama របស់ប្រទេស Panama ។ អគារនេះ ត្រូវបានជ្រើសរើសដោយគេហទំព័រEmoris ដែលជាក្រុមហ៊ុនប្រមូលទិន្ន័យអគារខ្ពស់ៗ នៅលើពិភពលោក ហើយបានជ្រើសរើសអាគារនេះ ជាអគារខ្ពស់កបពពកល្អបំផុត ក្នុងចំណោមអាគារ១០ ក្នុងពិភពលោកក្នុងឆ្នាំ ២០១១។
អគារនេះស្ថិតនៅក្នុងលេខរៀងទី៧ ដោយទទួលពានEmporis Skyscraper Award ដែលមានស្ថាបត្យកម្មល្អបំផុត និងរចនាប្លង់នៃអគារស្ទើតែឥតខ្ចោះ។ អគារនេះ គឺជានិមិត្តរូបនៃទីក្រុងPanama ។ អគារដែលមានភាពលេចធ្លោរនៅក្នុងទីក្រុងនេះ បានរចនាប្លង់ដោយក្រុមហ៊ុនក្នុងស្រុក ឈ្មោះPinzón Lozano & Asociados ។
អគារដ៏អស្ចារ្យនេះ ត្រូវបានចាប់ផ្តើមសាងសង់នៅក្នុងឆ្នាំ២០០៨ និងបញ្ចប់នៅក្នុងឆ្នាំ២០១១ ដែលជាប្រភេទអគារការិយាល័យដ៏ទើប មានកម្ពស់២៤២ ម៉ែត្រ និង ៥២ ជាន់។
រចនាសម្ព័ននៃអគារនេះ មានស្ថានភាពវិលជុំ ដែលមានជញ្ជាំងធ្វើពីកញ្ចក់ និងបេតុង គឺមានការលាយឡំជាមួយនឹងស្ថាបត្យកម្មទំនើប ដែលមនុស្សមួយចំនួនមិនដែលបានស្គាល់៕
