ដោយ វុត្ថា
ភ្នំពេញ៖ រដ្ឋាភិបាលលតាមរយៈក្រសួងពាណិជ្ជកម្ម បានចេញសេចក្តីថ្លែងការណ៍ភ្លាមៗ ដើម្បីឆ្លើយតបនឹងការសម្រេចយកពន្ធដោយសហភាពអឺរ៉ុប មកលើអង្ករ (Indica Rice) នាំចេញពីកម្ពុជាទៅកាន់សហភាពអឺរ៉ុប។
សេចក្តីថ្លែងការណ៍ដែលចុះហត្ថលេខាដោយ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចេញផ្សាយកាលពីយប់ នៅថ្ងៃទី១៧ ខែមករា ឆ្នាំ២០១៩កន្លងមកនេះ បានសម្តែងការសោកស្តាយយ៉ាងខ្លាំង ចំពោះសេចក្តីសម្រេចនេះដែលមិនឆ្លុះមិនឆ្លុះបញ្ចាំងពីទិដ្ឋភាពច្បាប់ពាណិជ្ជកម្មអន្តរជាតិ បទដ្ឋានបច្ចេកទេស និងសច្ចភាព ព្រមទាំងកិច្ចសហប្រតិបត្តិការដ៏ល្អកន្លងមករវាងកម្ពុជា និងសហភាពអឺរ៉ុប។
រដ្ឋាភិបាលកម្ពុជាក៏បានបង្ហាញពីផលប៉ះពាល់ ដែលនឹងកើតដល់ប្រជាកសិករកម្ពុជា ដោយសារតែការសម្រេចរបស់សហភាពអឺរ៉ុបផងដែរ ដោយនៅក្នុងសេចក្តីថ្លែងការណ៍នោះបញ្ជាក់ថា ការសម្រេចដាក់វិធានការការពារទីផ្សារដោយសហភាពអឺរ៉ុប មកលើអង្ករ ដែលមានប្រភពដើមមកពីកម្ពុជា មានឥទិ្ធពលគ្រប់គ្រាន់ សម្រាប់ដកហូតចំណូលរបស់ប្រជាកសិករក្រីក្រកម្ពុជា និងជាអាវុធធ្វើឃាតពួកគាត់ និងក្រុមគ្រួសារ ដែលកំពុងជាប់បំណុល ជាមួយនឹងស្ថាប័នឥណទាន ដែលបានផ្តល់ប្រាក់កម្ចីដល់ពួកគាត់។
សេចក្តីថ្លែងការណ៍បន្តទៀតថា ក្រសួងពាណិជ្ជកម្មកម្ពុជា កំពុងពិនិត្យផ្ទៀងផ្ទាត់សេចក្តីសម្រេចនេះ ដោយផ្អែកលើទិដ្ឋភាពច្បាប់ និងវិធានការពាណិជ្ជកម្មអន្តរជាតិ ដើម្បីបន្តតវ៉ានឹងសេចក្តីសម្រេច ដែលប្រជាជនកម្ពុជាយល់ថា ជាសេចក្តីសម្រេចដែលគ្មានសុក្រឹតភាពនិងសច្ចភាពសង្គមនិងសេដ្ឋកិច្ច។
យ៉ាងក៏ដោយរដ្ឋាភិបាលនៅតែស្នើរឲ្យសហភាពអឺរុប ពិចារណានិង ពិនិត្យឡើងវិញនូវការសម្រេចរបស់ខ្លួន ដោយផ្អែកលើវិធានការពាណិជ្ជកម្មអន្តរជាតិ និងបំណងកិច្ចសហប្រតិបត្តិការល្អជាប្រពៃណីរវាងកម្ពុជានិងសហភាពអឺរ៉ុប។
លោក ឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានគូសបញ្ជាក់ថាការសម្រេចដកពន្ធមកលើការនាំចូលអង្ករកម្ពុជាទៅកាន់សភាពអឺរ៉ុប បង្កឲ្យមានផលប៉ះពាល់ការនាំចេញអង្កររបស់កម្ពុជា ដោយសារតម្លៃនៃនាំចេញត្រូវបង់ពន្ធ ២០០ ដុល្លារក្នុងមួយតោន ដូច្នេះវាមានទំហំធំណាស់សម្រាប់ប្រទេសកម្ពុជា បើគិតការនាំចេញមួយកុងតឺនើ យើងត្រូវបង់លុយច្រើនណាស់ បើធៀបជាមួយនឹងការអត់យកពន្ធសភាពអឺរ៉ុប។
លោកឧកញ៉ាបន្តទៀតថា “ដើម្បីដោះស្រាយបញ្ហានេះ រដ្ឋាភិបាលកម្ពុជាត្រូវតែរកទីផ្សារមួយទៀត ជាពិសេសត្រូវពឹងផ្អែកទីផ្សាររបស់ប្រទេសចិនជាធំ។ លោកបន្តថា “ការចំណាយនឹងកាត់បន្ថយខ្លះ ដោយសារប្រមុខរដ្ឋាភិបាលសម្តេចតេជោ ហ៊ុន សែន បានដកមន្ត្រីតាមព្រំដែនច្រើន ស្ថាប័នដើម្បីកាត់បន្ថយការចំណាយ តែយ៉ាងណាតម្លៃនៃការដឹកជញ្ជូន និងការយកពន្ធនៅតែខ្ពស់ពិបាកក្នុងការបប្រកួតប្រជែងក្នុងទីផ្សារ។
យ៉ាងណាក៏ដោយ លោកឧកញ៉ាលឹម ហេង មិនទាន់ហ៊ានអត្ថាធិប្បាយពីការប៉ះពាល់កម្រិតណា ឬយូវអង្វែងយ៉ាងណជុំវិញសហភាពអឺរ៉ុប សម្រេចយកពន្ធការនាំចូលអង្ករពីកម្ពុជានោះទេ ដោយរងចាំមើលស្ថានភាពជាក់ស្តែង។
សហភាពអឺរ៉ុបបានចេញសេចក្តីសម្រេចកាលពីពេលថ្មីៗនេះ នឹងយកពន្ធលើអង្ករពីកម្ពុជា និងមីយ៉ាន់ម៉ាចាប់ផ្តើមនៅថ្ងៃសុក្រនេះ ដើម្បីការពារទីផ្សារសហភាពអឺរ៉ុប។ ការសម្រេចនេះ នឹងចូលជាធរមានរយៈពេល ៣ឆ្នាំ តាមវិធានការ«ការពារ»កាលពីខែមីនាឆ្នាំមុន បន្ទាប់ពីមានសំណើពីរដ្ឋាភិបាលអ៊ីតាលី៕
