តម្លៃហាងឆេងមាសបានធ្លាក់ថ្លៃចុះនៅថ្ងៃសុក្រនេះ ខណៈមានការបង្ហើបបេក្ខជនប្រធានធនាគារកណ្តាលអាមេរិកថ្មី

ដោយ: គង់ លាងហួរ
អន្តរជាតិ: តម្លៃហាងឆេងមាសបានធ្លាក់ថ្លៃចុះក្នុងការជួញដូរនៅព្រឹកថ្ងៃសុក្រនេះ ខណៈកាសែត Bloomberg បានរាយការណ៍ថា អភិបាលធនាគារកណ្តាលអាមេរិក (Fed) លោក Christopher Waller ជាបេក្ខជន ដែលអាចមកជំនួសតំណែងជាប្រធានធនាគារ Fed របស់លោក Jerome Powell ដែលនឹងត្រូវអាណត្តិនៅថ្ងៃទី១៥ ខែឧសភា ឆ្នាំ២០២៦។

តួយ៉ាង តម្លៃមាស Spot Gold បានធ្លាក់ចុះ០,២៩ភាគរយដល់៣.៣៨៧ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង១,១៧ភាគរយដល់៣៤៩៤,២ដុល្លារក្នុងមួយអោនគិតត្រឹមម៉ោង៩:៣២នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩២,៧ភាគរយ ដែលធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៧ ខែកញ្ញាខាងមុខ។

ចំណែក សន្ទស្សន៍ប្រាក់ដុល្លារ ដែលវាស់វែងប្រាក់ដុល្លារអាមេរិកធៀបនឹងរូបិយបណ្ណសំខាន់ៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះដល់៩៨,១២ពិន្ទុនៅព្រឹកថ្ងៃសុក្រនេះ បន្ទាប់ពីបានបិទការជួញដូរត្រឹម៩៨,៤០ពិន្ទុកាលពីថ្ងៃព្រហស្បតិ៍ម្សិលមិញ៕