ដោយៈ គង់ ហ្វីអូណា
ភ្នំពេញៈ ថ្នាក់ដឹកនាំខេត្តព្រះសីហនុ និងថ្នាក់ដឹកនាំខេត្តជាំងស៊ូ របស់ប្រទេសចិន បានបង្ហាញឆន្ទៈរៀងៗខ្លួន នឹងបន្តពង្រីកកិច្ចសហប្រតិបត្តិការលើវិស័យអាទិភាព រវាងខេត្តទាំង២ឱ្យឈានៅសម្រេចបានលទ្ធផលជាផ្លែផ្កា និងបន្តខ្លាំងក្លាតទៅមុខទៀត រួមមានលើវិស័យឧស្សាហកម្ម ពាណិជ្ជកម្ម និងការវិនិយោគ។
ការបង្ហាញជំហរនេះ ធ្វើឡើងនាឱកាសដែលអភិបាលខេត្តព្រះសីហនុលោក គួច ចំរើន បានដឹកនាំគណៈប្រតិភូទៅបំពេញទស្សនកិច្ចនៅខេត្តជាំងស៊ូ នៃសាធារណរដ្ឋប្រជាមានិតចិន និងបានសម្តែងការគួរសម ពិភាក្សាការងារជាមួយអភិបាលខេត្ត លោក ស៊ី ឃុនលីន កាលពីថ្ងៃទី១៤ ខែវិច្ឆិកា ឆ្នាំ២០២៣។
យោងតាមរដ្ឋបាលខេត្តព្រះសីហនុ ក្នុងឱកាសនោះ លោកស៊ី ឃុនលី បានណែនាំអំពីការអភិវឌ្ឍសេដ្ឋកិច្ច និងសង្គម នៃខេត្តជាំងស៊ូ និងបានបញ្ជាក់ថា សាធារណរដ្ឋប្រជាមានិតចិន និងព្រះរាជាណាចក្រកម្ពុជា មានទំនាក់ទំនងមិត្តភាពជាប្រពៃណី យ៉ាងជ្រាលជ្រៅ ហើយការឯកភាពដ៏សំខាន់ ដែលសម្រេចបានដោយមេដឹកនាំនៃប្រទេសទាំង២ បានចង្អុលបង្ហាញទិសដៅ សម្រាប់កិច្ចសហប្រតិបត្តិការក្នុងតំបន់ឱ្យកាន់តែស៊ីជម្រៅ។
ពាក់ព័ន្ធសក្តានុពលខេត្ត ព្រះសីហនុវិញលោកថ្លែងថា ខេត្តព្រះសីហនុ ជាច្រកដ៏សំខាន់សម្រាប់កម្ពុជា ក្នុងការបើកចំហទៅកាន់ពិភពខាងក្រៅ ហើយខេត្តព្រះសីហនុ គឺជាខេត្តមិត្តភាពរបស់ខេត្តជាំងស៊ូ និងជាដៃគូដ៏សំខាន់សម្រាប់ខេត្តជាំងស៊ូ ក្នុងការចូលរួមក្នុងការកសាងរួមគ្នានៃ “ខ្សែក្រវាត់ និងផ្លូវ” ហើយកិច្ចសហប្រតិបត្តិការរវាងខេត្តទាំង២ សម្រេចបានលទ្ធផលជាផ្លែផ្កា និងបន្តខ្លាំងក្លាតទៅមុខទៀត។
លោកបានបញ្ជាក់ថា ខេត្តជាំងស៊ូ មានឆន្ទៈក្នុងការបន្តធ្វើការរួមគ្នា ដើម្បីអនុវត្តជាក់ស្តែងនូវការផ្លាស់ប្តូរ និងកិច្ចសហប្រតិបត្តិការលើគ្រប់វិស័យអាទិភាព ពិសេសបន្តពង្រីកការផ្លាស់ប្តូរសេដ្ឋកិច្ច និងពាណិជ្ជកម្ម ពង្រឹង និងពង្រីកការផ្លាស់ប្តូរវប្បធម៌ រួមគ្នាលើកកម្ពស់ការអភិវឌ្ឍ ប្រកបដោយគុណភាពខ្ពស់ ដើម្បីផលប្រយោជន៍ទៅវិញទៅមក។
ជាការឆ្លើយតប លោក គួច ចំរើន បានថ្លែងអំណរគុណដល់ខេត្តជាំងស៊ូ សម្រាប់ការគាំទ្រដល់ការអភិវឌ្ឍ នៅខេត្តព្រះសីហនុកន្លងមក ជាពិសេសគាំទ្រដល់តំបន់សេដ្ឋកិច្ច ពិសេសក្រុងព្រះសីហនុ ខណៈលោកថា ខេត្តព្រះសីហនុ គឺជាចំណុចសំខាន់នៃ “គំរោងគំនិតផ្តួចផ្តើមខ្សែក្រវាត់ និងផ្លូវ” ហើយការសាងសង់តំបន់សេដ្ឋកិច្ចពិសេសក្រុងព្រះសីហនុ បានទទួលការយកចិត្តទុកដាក់យ៉ាងខ្លាំងពីថ្នាក់ដឹកនាំនៃប្រទេសទាំង២។
លោកបង្ហាញក្តីសង្ឃឹមថា “ខេត្តទាំង២ នឹងសហការគ្នាយ៉ាងជិតស្និទ្ធលើវិស័យសេដ្ឋកិច្ច ពាណិជ្ជកម្ម និងមនុស្សធម៌ ហើយសហគ្រាសខេត្តជាំងស៊ូ កាន់តែច្រើននឹងមកបណ្តាក់ទុន នៅខេត្តព្រះសីហនុ ដើម្បីសម្រេចបាននូវវិបុលភាពរួម និងផ្តល់ប្រយោជន៍ដល់ប្រជាជននៃខេត្តទាំង២។
អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា លោក ហុង វណ្ណៈ បានបង្ហាញការគាំទ្រចំពោះខេត្តទាំង២ ដែលមានឆន្ទៈដើម្បីជំរុញ និងលើកកម្ពស់កិច្ចសហប្រតិបត្តិការលើវិស័យអាទិភាពរួមគ្នា ដែលនឹងផ្តល់ផលប្រយោជន៍ឱ្យគ្នាទៅវិញទៅមក។
លោកបន្តថា “ប្រសិនបើវិនិយោគិនចិន មកសិក្សាស្វែងយល់ពីសក្ដានុពលពីខេត្តព្រះសីហនុបន្ថែម ហើយចង់ធ្វើការវិនិយោគនៅកម្ពុជាពិតមែន នោះជាសញ្ញាល្អ និងបង្ហាញពីការរួមចំណែកធានា ដល់និរន្តរភាពសេដ្ឋកិច្ចរយៈពេលវែងរបស់កម្ពុជា”៕
