រដ្ឋាភិបាលឥណ្ឌូនេស៊ីគ្រោងចំណាយទុនរាប់លានដុល្លារទាក់ទាញតារាល្បីលំដាប់ពិភពលោកមកប្រគំតន្ត្រីក្នុងប្រទេសរបស់ខ្លួន

ដោយ: គង់ លាងហួរ

អន្តរជាតិ: រដ្ឋមន្ត្រីក្រសួងទេសចរណ៍ឥណ្ឌូនេស៊ី លោក Sandiaga Uno បានថ្លែងថា ប្រទេសរបស់លោកមានឆន្ទៈ ក្នុងការសហការជាមួយសិង្ហបុរី ដើម្បីទាក់ទាញសិល្បករល្បីៗនៅលើពិភពលោក សម្រាប់រៀបចំការប្រគុំឆាកតន្ត្រីធំៗ។

នៅក្នុងអំឡុងពេលបំពេញដំណើរទស្សនកិច្ច ទៅកាន់ប្រទេសសិង្ហបុរី នាពេលថ្មីៗនេះ លោក Sandiaga បានលើកឡើងថា “អ្នកទៅទស្សនាកម្មវិធីប្រគុំតន្ត្រី របស់កំពូលតារាចម្រៀងអាមេរិក គឺអ្នកនាង Taylor Swift នៅក្នុងប្រទេសសិង្ហបុរី បានចំណាយប្រាក់ច្រើនជាងភ្ញៀវទេសចរធម្មតាចំនួន៥ដង។យោងតាមសារព័ត៌មាន The Straits Times បានរាយការណ៍ថា មនុស្សជាង៣៦៨.០០០នាក់ បានចូលរួមទស្សនាការប្រគុំតន្ត្រី    រយៈពេល៦យប់របស់អ្នកនាង Taylor Swift នៅប្រទេសសិង្ហបុរីចាប់ពីថ្ងៃទី២ ដល់ថ្ងៃទី៩ ខែមីនា ដែលធ្វើឱ្យតម្លៃសំបុត្រយន្តហោះ និងតម្លៃបន្ទប់សណ្ឋាគារ បានហក់ឡើងខ្ពស់កប់ពពក។

ប្រភពដដែលបានបន្ថែមថា ការសម្តែងរបស់អ្នកនាង Taylor Swift នៅក្នុងប្រទេសសិង្ហបុរី ជំរុញឱ្យតម្រូវការស្វែងរកកន្លែងស្នាក់នៅ មានការកើនឡើង៣០ភាគរយ។

លោក Sandiaga បានអះអាងថា រដ្ឋាភិបាលឥណ្ឌូនេស៊ីគ្រោងនឹងបង្កើតមូលនិធិទេសចរណ៍ ដែលមានតម្លៃ១២៨លានដុល្លារ ក្នុងគោលដៅគាំទ្រ ដល់អ្នករៀបចំព្រឹត្តិការណ៍ក្នុងស្រុក ដើម្បីធ្វើការសម្តែងស្រដៀង នឹងកម្មវិធីប្រគុំតន្ត្រីរបស់អ្នកនាង Taylor Swift នៅប្រទេសសិង្ហបុរី។

លោកក៏បានប្តេជ្ញាចិត្តផងដែរ ក្នុងការកែលម្អហេដ្ឋារចនាសម្ព័ន្ធ ការចេញលិខិតអនុញ្ញាត និងធនធានមនុស្ស ដើម្បីទាក់ទាញតារាលំដាប់ពិភពលោក ឱ្យរៀបចំការប្រគុំតន្ត្រី នៅក្នុងប្រទេសឥណ្ឌូនេស៊ី។

ប្រទេសឥណ្ឌូនេស៊ីបានស្វាគមន៍ ភ្ញៀវទេសចរបរទេសចំនួន១១,៧លាននាក់កាលពីឆ្នាំមុន ហើយប្រទេសដែលមានចំនួនប្រជាជនច្រើនជាងគេទី៤ របស់ពិភពលោកមួយនេះ បានដាក់ចេញគោលដៅទាក់ទាញភ្ញៀវទេសចរបរទេស ឱ្យបានចំនួន១៤លាននាក់នៅឆ្នាំនេះ។

ប្រទេសឥណ្ឌូនេស៊ី គ្រោងលើកលែងទិដ្ឋាការ សម្រាប់ពលរដ្ឋមកពីបណ្តាប្រទេសជាច្រើនទៀត និងសម្រួលលិខិតអនុញ្ញាត ដើម្បីបង្កភាពងាយស្រួល សម្រាប់អ្នករៀបចំព្រឹត្តិការណ៍ក្នុងស្រុក៕