ទីផ្សារអចលនទ្រព្យក្នុងតំបន់អាស៊ីប៉ាស៊ីហ្វិក បានបង្ហាញភាពធន់ក្នុងឆមាសទី១ ឆ្នាំនេះ

ដោយ: គង់ លាងហួរ
អន្តរជាតិ: ទីផ្សារអចលនទ្រព្យក្នុងតំបន់អាស៊ីប៉ាស៊ីហ្វិកក្នុងឆមាសទី១ ឆ្នាំ២០២៥នេះ បានបង្ហាញភាពធន់ ដោយគ្របដណ្តប់និន្នាការខុសៗគ្នានៃការវិនិយោគលើផ្នែកនីមួយៗ ស្របពេលសេដ្ឋកិច្ចពិភពលោកស្ថិតក្នុងស្ថានភាពមិនច្បាស់លាស់។

ទី១: ផ្នែកការិយាល័យ

តម្រូវការផ្តោតលើអគារការិយាល័យដែលមានគុណភាពខ្ពស់។ ទីផ្សារការិយាល័យនៅប្រទេសនានាដូចជា ប្រទេសអូស្ត្រាលី ប្រទេសកូរ៉េខាងត្បូង និងប្រទេសសិង្ហបុរី បានបង្ហាញពីតម្រូវការជួលខ្ពស់។

អត្រាការិយាល័យទំនេរនៅក្នុងទីក្រុងតូក្យូរបស់ប្រទេសជប៉ុននៅតែមានកម្រិតទាបក្រោម៤ភាគរយ ខណៈអត្រាការិយាល័យទំនេរនៅក្នុងទីក្រុងសេអ៊ូលរបស់ប្រទេសកូរ៉េខាងត្បូងមានកម្រិតប្រមាណ៣ភាគរយ។

ទី២: ឧស្សាហកម្ម និងភស្តុភារ

ទីផ្សារអចលនទ្រព្យឧស្សាហកម្ម ដូចជា ឃ្លាំង និងរោងចក្រនៅតែរីកចម្រើន ជាពិសេសនៅក្នុងប្រទេសឥណ្ឌា និងទីក្រុងសេអ៊ូល។ ទោះជាយ៉ាងណាក្តី អត្រាអចលនទ្រព្យឧស្សាហកម្មទំនេរ(Vacancy Rate) របស់ប្រទេសចិននៅតែមានកម្រិតខ្ពស់ក្នុងរង្វង់២០ភាគរយ ហើយតម្លៃជួលនៅតែបន្តធ្លាក់ចុះ។

ទី៣: ការលក់រាយ

ទីផ្សារអចលនទ្រព្យលក់រាយនៅតំបន់អាសុីបានងើបឡើងវិញយ៉ាងសន្សឹមៗ ខណៈសកម្មភាពតម្រូវការរបស់អ្នកជួលកំពុងមានសភាពប្រសើរឡើង ជាពិសេសការជួលទីតាំងលក់រាយនៅតាមផ្សារទំនើបប្រណីតៗ។

ការលក់រាយនៅតាមតំបន់ពាណិជ្ជកម្មកណ្តាលនានា (CBDs) របស់ប្រទេសវៀតណាមមានស្ថានភាពល្អប្រសើរជាងប្រទេសចិន ខណៈតម្លៃជួលទីតាំងលក់រាយក្នុងប្រទេសចិននៅតែបន្តធ្លាក់ចុះ។

ទី៤: ផ្នែកលំនៅដ្ឋាន

តម្រូវការជួលលំនៅដ្ឋាននៅក្នុងទីក្រុងតូក្យូ និងទីក្រុងសេអ៊ូលបានបង្ហាញស្ថានភាពរឹងមាំ ជាពិសេសយូនីតលំនៅដ្ឋានតូចៗ និងការរស់នៅរួមគ្នា(Co-living)។

តម្លៃជួលលំនៅដ្ឋាននៅក្នុងទីក្រុងធំៗរបស់ប្រទេសឥណ្ឌាដូចជា ទីក្រុង Mumbai ទីក្រុង Bengaluru ទីក្រុង Delhi-NCR ទីក្រុង Hyderabad និងទីក្រុង Chennai បានកើនឡើងចន្លោះពី៧ភាគរយទៅ៩ភាគរយ នៅក្នុងឆមាសទី១៕ប្រភព: CBRE & The Times of india៕