អ្នកជំនាញៈ គំរោងផ្សារទំនើបតូចធំចំនួន១០កំពុងបន្តសាងសង់ដើម្បីបញ្ចប់ នៅចុងឆ្នាំនេះ

ដោយវុត្ថា

ភ្នំពេញៈ អ្នកជំនាញបានឱ្យដឹងថា រហូតមដល់ពេលនេះ គម្រោងសាងសង់ផ្សារទំនើបនៅក្នុងប្រទេសកម្ពុជា មិនទាន់មានការប្រកាសផ្អាកសកម្មភាពសាងសង់នៅឡើយទេក្នុងត្រីមាសទី១កន្លងមកនេះ  ខណៈគម្រោងផ្សារទំនើបចំនួន១០គ្រោងនឹងបញ្ចប់សាងសង់នៅក្នុងឆ្នាំ២០២០នេះ។

លោកស្រីអាន សុធីតា នាយិការប្រចាំប្រទេសនៃក្រុមហ៊ុនCBRE Cambodia  បានប្រាប់គេហទំព័រPropertyarea.asia នៅថ្ងៃទី៦ ខែមេសា ឆ្នាំ ២០២០ នេះ ឱ្យដឹងថា រហូតមដល់ពេលនេះ មិនទាន់ឃើញមានគម្រោងណាមួយ ប្រកាសផ្អាកសាងសង់នៅឡើយទេ ប៉ុន្តែការរាតត្បាតជាសកលនៃជំងឺCovid-19 អូសបន្លាយវានឹងធ្វើឱ្យមានការប៉ះពាល់មិនខាន។

លោកស្រីបន្តថា “សកម្មភាពសាងសង់យើងមិនទាន់ឃើញផ្អាកទេ តែបើវាអូសបន្លាយយូទៅមុខទៀត នៃការរីករាលដាលជំងឺCovid-19 វានឹងទទួលផលប៉ះពាល់មិនខាន ដោយសារមានការផ្អាកការនាំចូល នៃសម្ភារៈសំណង់សម្រាប់ផ្គត់ផ្គង់ នៅក្នុងប្រទេ​ស ជាពិសេសការសាងសង់វិស័យសំណង់”។

យោងតាមរបាយការណ៍របស់ក្រុមហ៊ុន CBRE Cambodia បានឱ្យដឹងថា ក្នុងត្រីមាសទី១ឆ្នាំ ២០២០នេះ មានផ្សារទំនើបចំនួន២ គឺ The Sky Mall  និងSamai Square  បានបើកដំណើរការ ដែលមានទំហំប្រមាណជិត៧ពាន់ម៉ែត្រការ៉េ ដែលធ្វើឱ្យទំហំនេះ កើនឡើងប្រមាណ២,១ភាគរយនៃផ្សារទំនើបសរុប។

របាយការណដែលបន្តថា តែសម្រាប់តម្លៃជួលវិញផ្សារទំនើបវិញ ក្នុងត្រីមាសទី១ ឆ្នាំ ២០២០ នេះមានការធ្លាក់ចុះទៅតាមប្រភេទផ្សារដោយក្នុងនោះ ផ្សារទំនើបបែបសហគមន៍ (Community Mall0 មានការធ្លាក់ចុះប្រមាណ៩,២ភាគរយ និងផ្សារទំនើបផ្សេងទៀ (Retail Podium) ធ្លាក់ចុះ១០,៥ ភាគរយ  ដោយសារការរីករាលដាលជាសកលនៃជំងឺ Covid-19៕