ដោយៈរ៉ាណេត
ភ្នំពេញៈ គិតមកត្រឹមសប្ដាហ៍ទី១ នៃខែកញ្ញា ឆ្នាំ២០២០នេះ កំណើននៃចំនួនសំណង់អាគារខ្ពស់ៗចាប់ពី៥ជាន់ឡើង ទៅនៅទូទាំងរាជធានីភ្នំពេញ បានកើនឡើងជិត ១៥០០អគារ ខណៈដែលកាលពីឆ្នាំ២០១៨ មានត្រឹមជាង ១០០០អគារតែប៉ុណ្ណោះ។
យោងតាមរបាយការណ៍ ដែលបង្ហាញដោយក្រុមប្រឹក្សារាជធានីភ្នំពេញ បានបញ្ជាក់ឱ្យដឹងថា គិតត្រឹមដើមខែកញ្ញា ឆ្នាំ២០២០នេះ កំណើននៃចំនួនអគារខ្ពស់ៗ ដែលមានកម្ពស់ចាប់ពី៥ជាន់ឡើង ទៅមានកំណើនរហូតដល់ ១៤៨៤អគារ នៅក្នុង ១៤ខណ្ឌ ទូទាំងរាជធានីភ្នំពេញ ដោយក្នុងនោះអគារដែលមានកម្ពស់ ចាប់ពី ៥ជាន់ដល់ ៩ជាន់ មានចំនួន ៨១៥អគារ។
ដោយឡែក អគារដែលមានកម្ពស់ចាប់ពី១០ជាន់ ដល់១៩ជាន់មានចំនួន៤០៦អគារ ហើយអគារដែលមានកម្ពស់ចាប់ពី២០ដល់ ២៩ជាន់ មានចំនួន ១០៧អគារ។ អគារដែលមានកម្ពស់ចាប់ពី៣០ដល់ ៣៩ជាន់ មានចំនួន៥៩អគារ និងអគារដែលមានកម្ពស់ចាប់ពី៤០ជាន់ឡើងទៅមានចំនួន៣៧អាគារ។
លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ បានបង្ហាញពីភាពមោទនចំពោះភាពរីកចម្រើន ដែលបញ្ជាក់ពីសមិទ្ធផលនៃអនុវត្តន៍តាមប្លង់គោល នៅតាមខណ្ឌទាំង ១៤ខណ្ឌ ប្រកបដោយជោគជ័យ។
ដោយឡែកចំពោះការបញ្ជាក់ពីទូរលេខ នៃចំនួនអគារដែលមានកម្ពស់ខ្ពស់ចាប់ពី ៥ជាន់ទៅដល់៤០ជាន់ឡើង ដែលមានរហូតទៅដល់ ១៤៨៤ អគារខាងលើនេះ លោកក៏បានបង្ហាញពីវឌ្ឍនភាពរបស់ប្រទេសកម្ពុជា ក្រោមការដឹកនាំប្រកបដោយភាពឆ្លាតវៃរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
នៅក្នុងចំណោមអគារចំនួន១៤៨៤ នៅទូទាំងរាជធានីភ្នំពេញនេះ ត្រូវបានគេដឹងផងដែរថា មានអគារខុនដូ ឬលំនៅដ្ឋានសហកម្មសិទ្ធិសរុប៦០គម្រោង និងអគារអាផាតម៉ិនមានជាង ៤០០អគារ។
លោក ឡៅទិព្វ សីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ធ្លាប់បានមានប្រសាសន៍ថា ស្ថានភាពទីផ្សារវិស័យសំណង់ គឺមានភាពល្អប្រសើរ ពិសេសទីផ្សារដីធ្លី វិស័យលំនៅដ្ឋាន និងអគារខ្ពស់។ វិស័យនេះ បានចូលរួមចំណែកយ៉ាងសំខាន់ នៅក្នុងការទ្រទ្រង់កំណើនសេដ្ឋកិច្ចជាតិ និងបានលើកកម្ពស់កម្រិតជីវភាពរបស់ប្រជាពលរដ្ឋកម្ពុជាផងដែរ។
លោកបញ្ជាក់ទៀតថា “វិស័យនេះបាននិងកំពុងផ្តល់ការងារ និងបទពិសោធន៍ ព្រមទាំងចូលរួមបណ្តុះបណ្តាលការងារបច្ចេកទេស ដល់អ្នកជំនាញនៅកម្ពុជាបានមួយកម្រិតធំ” ។ លោកបន្តថា “សំណង់អគារខ្ពស់ៗនៅក្នុងភ្នំពេញសព្វថ្ងៃ បានចូលរួមចំណែកបង្ហាញពីសក្តានុពលរបស់កម្ពុជា ទាំងផ្នែកសេដ្ឋកិច្ច និងសកម្មភាពទិញលក់នៅក្នុងវិស័យអលនទ្រព្យ” ។
លោកបន្តថា ជាពិសេសក្នុងរយៈពេលចុងក្រោយនេះ កម្ពុជាមានអគារខ្ពស់ៗកើនឡើងច្រើន ដែលបង្ហាញឱ្យឃើញពីជំនឿទុកចិត្ត ចំពោះរាជរដ្ឋាភិបាលក្រមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី៕
