ដោយ ៖ រ៉ាណេត
ភ្នំពេញ ៖ ជាការចាប់ផ្តើមបង្ហាញពីសញ្ញាវិជ្ជមាននៃទីផ្សារអចលនទ្រព្យដែលផុសចេញពីតម្រូវការក្នុងស្រុកនាដើមឆ្នាំ២០២១នេះ អ្នកជំនាញនៅក្នុងវិស័យអចលនទ្រព្យបានសាទរជាមួយនឹងក្ដីរំពឹងថា ភាពល្អប្រសើរអាចនឹងចាប់ផ្តើមមានឡើងវិញនៅត្រឹមឆមាសទី២នៃឆ្នាំនេះ។
ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជា លោក ច្រឹក សុខនីម បានមានប្រសាសន៍នៅល្ងាចថ្ងៃទី៦ ខែមករា ឆ្នាំ២០២១ថា ពេលនេះសញ្ញាវិជ្ជមាននៃទីផ្សារអចលនទ្រព្យចាប់ផ្តើមបង្ហាញបន្តិចម្ដងៗទៅតាមជំហានដែលបានផុសចេញពីតម្រូវការជាក់ស្ដែងនៅក្នុងស្រុកបន្ទាប់ពីភាពគំរាមកំហែងនៃវិបត្តិឆ្លងជំងឺនៅក្នុងសហគមន៍ត្រូវបានបញ្ចប់។
លោកបានបន្តថា “ខ្ញុំនិយាយតែចំពោះទីផ្សារលំនៅដ្ឋាន បើទោះបីជាស្ថិតនៅក្នុងស្ថានភាពប្រឈមកាលពីអំឡុងឆ្នាំ២០២០ សកម្មភាពទិញលក់មួយចំនួននៅតែបន្តមានសកម្មភាព ប៉ុន្តែទើបតែនៅចុងឆ្នាំ២០២០តែប៉ុណ្ណោះដែលធ្វើឱ្យទីផ្សារលំនៅដ្ឋានត្រូវរងនូវភាពស្ងប់ស្ងាត់ដោយសារតែការគំរាមកំហែងពីវិបត្តិនៃជំងឺឆ្លងនៅក្នុងសហគមន៍ ដែលមនុស្សមិនហ៊ានចេញចេញដើរក្រៅ និងអនុវត្តតាមវិធានការដែលណែនាំដោយរាជរដ្ឋាភិបាលកម្ពុជា” ។
លោកបញ្ជាក់ថា “សម្រាប់ដើមឆ្នាំ២០២១ដែលទើបតែឈានចូលមកដល់ថ្មីៗនេះ យើងឃើញថា សកម្មភាពទិញលក់នៃទីផ្សារលំនៅដ្ឋានចាប់ផ្តើមកម្រើកឡើងវិញបន្ទាប់ពីព្រឹត្តិការណ៍នៃ២៨វិច្ឆិកាត្រូវបានប្រកាសបញញចប់ជាស្ថាពរ។ ប៉ុន្តែទាំងនេះវាគ្រាន់តែជាសញ្ញាវិជ្ជមានមួយដែលបង្ហាញពីការចាប់ផ្តើមតែប៉ុណ្ណោះ ហើយតាមការរំពឹងទុកអាចចំណាយពេលរហូតដល់ពាក់កណ្តាលឆ្នាំ ឬអំឡុងឆមាសទី២ ទើបស្ថានភាពល្អប្រសើររបស់ទីផ្សារចាប់ផ្តើមមានសកម្មភាពខ្លាំងឡើងវិញ” ។
អគ្គនាយកក្រុមហ៊ុន PREMUIM Group លោក ម៉ាន់ ច័ន្ទឌី ដែលជាអ្នកអភិវឌ្ឍន៍នៅក្នុងវិស័យលំនៅដ្ឋានកម្រិតមធ្យមនៅតាមតំបន់ជាយក្រុងបានមានប្រសាសន៍ថា ទីផ្សារលំនៅដ្ឋានតម្លៃមធ្យមហាក់មិនរងនូវផលប៉ះពាល់ធ្ងន់ធ្ងរខ្លាំងនោះទេ ជាក់ស្ដែងនៅត្រឹមដើមឆ្នាំ២០២១នេះ សំណង់លំនៅដ្ឋានរបស់លោកត្រូវបានលក់ចេញអស់គ្មានសល់នោះទេ។
លោកបញ្ជាក់ថា “នៅដើមឆ្នាំនេះ គម្រោងរបស់ខ្ញុំត្រូវបានលក់អស់ហើយ ហើយខ្ញុំក៏កំពុងរៀបចំគម្រោងថ្មីដែលនឹងត្រូវចាប់ផ្តើមបុកគ្រឹះសាងសង់នៅក្នុងពេលឆាប់ៗខាងមុខនេះ” ។ លោកបញ្ជាក់ថា “ចាប់តាំងពីដើមឆ្នាំ២០២១ នេះទៅ ប្រសិនបើស្ថានភាពនៃការទប់ស្កាត់វិបត្តិជំងឺឆ្លងមានភាពល្អប្រសើរដូចបច្ចុប្បន្ន ហើយការនាំយកវ៉ាក់សាំងមកកាន់កម្ពុជាសម្រាប់ចាក់ជូនប្រជាជនដោយឥតគិតថ្លៃប្រកបដោយប្រសិទ្ធភាព នោះវាគឺជារឿងដ៏ល្អបំផុតដែលអាចជួយជំរុញឱ្យវិស័យអចលនទ្រព្យ ជាពិសេសទីផ្សារលំនៅដ្ឋានកាន់តែមានសកម្មភាពទ្វេដង” ៕
