ដោយៈ រ៉ាណេត
ភ្នំពេញៈ ស្ថិតនៅក្នុងស្ថានភាពដែលប្រឈម ទៅនឹងវិបត្តិសេដ្ឋកិច្ចនាពេលបច្ចុប្បន្នគម្រោងអភិវឌ្ឍន៍មួយចំនួន ត្រូវបានកត់សម្គាល់ឃើញថា បានផ្អាកសកម្មភាពដំណើរការសាងសង់ ដែលរូបភាពនេះត្រូវបានអ្នកជំនាញ ក្នុងវិស័យអចលនទ្រព្យបញ្ជាក់ថាមិនគួរកើតមាននោះទេ ផ្ទុយទៅវិញម្ចាស់គម្រោងគួរតែបន្តសកម្មភាព ដើម្បីបញ្ចប់គម្រោងសម្រាប់ត្រៀមលក់ចេញក្រោយពេលបញ្ចប់វិបត្តិ។
ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោកឃាង ពុទ្ធី បានមានប្រសាសន៍នៅរសៀលថ្ងៃទី១៣ ខែមករា ឆ្នាំ២០២១នេះថា ការផ្អាកសកម្មភាពសាងសង់របស់ម្ចាស់គម្រោងមួយចំនួន គឺជាការដាក់សម្ពាធទៅលើគម្រោងរបស់ខ្លួន ហើយអាចនឹងជួបវិបត្តិទីផ្សារថែមទៀតផង។
លោកបានបន្តថា “សកម្មភាពសាងសង់គឺចលករមួយយ៉ាងសំខាន់ ក្នុងការបង្ហាញឱ្យឃើញពីសក្ដានុពល និងភាពប្រាកដប្រជារបស់គម្រោងទៅដល់អតិថិជន ហើយក៏ជាចំណុចជួយធ្វើឱ្យទីផ្សារ នៃការលក់ទទួលបានភាពជោគជ័យ ក្នុងអត្រាមួយខ្ពស់ផងដែរ”។ អ្វីដែលសំខាន់អតិថិជនគោលដៅ នៃវិស័យសំណង់លំនៅដ្ឋានគឺជាអ្នកនៅក្នុងស្រុក មិនមែនជាជនបរទេសនោះទេ ដូច្នេះការផ្អាកនូវសកម្មភាពសាងសង់ មិនមែនជាវិធីសា ស្ត្រនោះទេ”។
នៅក្នុងដំណាក់កាលនេះ ជាពេលវេលាល្អសម្រាប់អ្នកអភិវឌ្ឍន៍ ដើម្បីបញ្ចប់គម្រោងរបស់ខ្លួន។ ក្នុងកាលទេសៈនេះ កម្លាំងពលកម្មមានច្រើន តម្លៃជួលមិនសូវខ្ពស់ ហើយសម្ភារៈសំណង់ក៏មានតម្លៃទាប ដូច្នេះទាំងអស់នេះសុទ្ធតែជាឱកាសចំណេញ សម្រាប់អ្នកអភិវឌ្ឍន៍ទាំងអស់ ដែលមិនគួរឱ្យរំលងនោះទេ។
លោកឃាង ពុទ្ធី បានមានប្រសាសន៍បន្តថា “យើងសម្រុកសាងសង់នៅពេលនេះ ហើយក្រោយពេលបញ្ចប់វិបត្តិ ក្នុងពេលឆាប់ៗខាងមុខនេះ យើងមានលំនៅដ្ឋាន១០០ភាគរយសម្រាប់លក់។ ធម្មតាបើសំណង់លំនៅដ្ឋានកំពុងសាងសង់ និងលំនៅដ្ឋានដែលបញ្ចប់ការសាងសង់ ដាក់លក់ក្នុងតម្លៃប្រហាក់ប្រហែលគ្នា អតិថិជនពិតជាជ្រើសយកលំនៅដ្ឋានបញ្ចប់ការសាងសង់ ដូច្នេះឱកាសនៃការទទួលបានចំណែកទីផ្សារ គឺមានច្រើន ហើយអត្រាចំណេញក៏ខ្ពស់ផងដែរ”៕
